ନୂଆପଡାରେ ଜାତୀୟ କନ୍ୟା ଦିବସ ପାଳନ ଅବସରରେ ପଦଯାତ୍ରା ଓ ସାଇକେଲ୍ ରାଲି ଆୟୋଜିତ l

ନୂଆପଡା -୨୨/୧ (ସୁରେନ୍ଦ୍ର ତିୱାରୀ) ସପ୍ତାହବ୍ୟାପୀ ଜାତୀୟ କନ୍ୟା ଦିବସ–୨୦୨୬ ପାଳନ ଅବସରରେ ଆଜି ନୁଆପଡ଼ା ଜିଲ୍ଲାରେ ଏକ ପଦଯାତ୍ରା ଓ ସାଇକେଲ୍ ରାଲି ଆୟୋଜିତ ହୋଇଥିଲା। ଏହି ସଚେତନତା ମୂଳକ କାର୍ଯ୍ୟକ୍ରମଟି ଜିଲ୍ଲା ମହିଳା ସଶକ୍ତିକରଣ ହବ୍ ଓ ଜିଲ୍ଲା ସାମାଜିକ କଲ୍ୟାଣ କାର୍ଯ୍ୟାଳୟ ଦ୍ୱାରା ଜିଲ୍ଲା ପ୍ରଶାସନ ର ସହଯୋଗରେ ଅନୁଷ୍ଠିତ ହୋଇଥିଲା।ଏହି କାର୍ଯ୍ୟକ୍ରମକୁ ଜିଲ୍ଲାପାଳ ମଧୁସୂଦନ ଦାଶ ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ। ଅତିରିକ୍ତ ଜିଲ୍ଲାପାଳ ସୁବାଷ ଚନ୍ଦ୍ର ରଇତ, ଉପ-ଜିଲ୍ଲାପାଳ ଶ୍ରୀମତୀ ସୁର୍ମି ସୋରେନ, ଏସ ଗୀତା, ଜିଲ୍ଲା ସମାଜ କଲ୍ୟାଣ ଅଧିକାରୀଙ୍କ ସହ ଅନ୍ୟାନ୍ୟ ଜିଲ୍ଲାସ୍ତରୀୟ ଅଧିକାରୀ, ବିଭିନ୍ନ ବିଭାଗର କର୍ମଚାରୀ, ବିଦ୍ୟାଳୟର ଛାତ୍ରଛାତ୍ରୀ, ସିଡ଼ିପିଓ, ସୁପରଭାଇଜର , ଶିକ୍ଷକ ବହୁ ସଂଖ୍ୟାରେ ଉତ୍ସାହର ସହିତ ଅଂଶଗ୍ରହଣ କରିଥିଲେ।
ଏହି ପଦଯାତ୍ରା ଓ ସାଇକେଲ୍ ରାଲି ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରୁ ଆରମ୍ଭ ହୋଇ ସହରର ମୁଖ୍ୟ ରାସ୍ତା ଦେଇ ଏକତା ଛକ ପର୍ଯ୍ୟନ୍ତ ଗତି କରିଥିଲା। ରାଲି ସମୟରେ ଅଂଶଗ୍ରହଣକାରୀମାନେ ବିଭିନ୍ନ ସଚେତନତାମୂଳକ ପ୍ଲାକାର୍ଡ, ସ୍ଲୋଗାନ୍ ଓ ବ୍ୟାନର୍ ମାଧ୍ୟମରେ କନ୍ୟାଶିଶୁଙ୍କ ମହତ୍ତ୍ୱ, ସମାନ ଅଧିକାର, ଶିକ୍ଷାର ଆବଶ୍ୟକତା ଓ ସୁରକ୍ଷା ସମ୍ପର୍କରେ ସନ୍ଦେଶ ପ୍ରସାର କରିଥିଲେ।ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା ସମାଜରେ କନ୍ୟାଶିଶୁଙ୍କ ସୁରକ୍ଷା ଓ ସମ୍ମାନ ସୁନିଶ୍ଚିତ କରିବା, କନ୍ୟା ଶିକ୍ଷାକୁ ପ୍ରୋତ୍ସାହନ ଦେବା, ଲିଙ୍ଗଭେଦ ମନୋଭାବ ଦୂର କରିବା ଏବଂ କନ୍ୟା ସଶକ୍ତିକରଣ ସମ୍ପର୍କରେ ସାଧାରଣ ଜନସାଧାରଣଙ୍କୁ ସଚେତନ କରିବା। ଏହା ସହିତ ବେଟି ବଚାଓ ବେଟି ପଢ଼ାଓ ଯୋଜନାର ଲକ୍ଷ୍ୟ ଓ ସନ୍ଦେଶକୁ ଘରେଘରେ ପହଞ୍ଚାଇବା l କାର୍ଯ୍ୟକ୍ରମ ପରିଚାଳନାରେ ପ୍ରୋଗ୍ରାମ ଅଫିସର ନମିତା ପାଢ଼ୀ, ମଞ୍ଜୁଲତା ଶୁକ୍ଳା, ଆଶିଷ ରଂଜନ ଖମାରୀ, ନାରଦ ଛତାର, ସଞ୍ଜୟ ବନ୍ଦିଛୋର୍, ଇପ୍ସିତା ରାଜପୁତ, ରମାକାନ୍ତ ସେଠୀ, ଦେଶରାମ ହରିଜନ ପ୍ରମୁଖ ସହଯୋଗ କରିଥିଲେ।