ଆଇନ୍ ସମ୍ମତ ପୋଷ୍ୟ ସନ୍ତାନ ଗ୍ରହଣ, ଜିଲ୍ଲାରେ ସୃଷ୍ଟି ହେଲା ନୂତନ ପରମ୍ପରା।

ନୂଆପଡା- ୫/୧୨(ସୁରେନ୍ଦ୍ର ତିୱାରୀ) ନୂଆପଡା ଜିଲ୍ଲାରେ ପ୍ରଥମଥର ପାଇଁ ପୋଷ୍ୟ ସନ୍ତାନ ଗ୍ରହଣ ପ୍ରକ୍ରିୟା ସଫଳ ଭାବେ ସମ୍ପନ୍ନ ହୋଇଛି। ଜିଲ୍ଲା ଶିଶୁ ସୁରକ୍ଷା ବିଭାଗ ଏବଂ ସ୍ୱତନ୍ତ୍ର ଗ୍ରହଣ ସଂସ୍ଥା ନୂଆପଡା ମଧ୍ୟସ୍ଥତା ରେ ଗୋଟିଏ ଶିଶୁ କନ୍ୟାକୁ ଅନ୍ୟ ରାଜ୍ୟ , ତାମିଲନାଡୁର ଏକ ପରିବାର ଦ୍ୱାରା ଦତ୍ତକ ଗ୍ରହଣ କରାଯାଇଛି। ପୋଷ୍ୟ କନ୍ୟାର ସମ୍ପୂର୍ଣ୍ଣ ଶିକ୍ଷା, ସେବା ଓ ସୁରକ୍ଷା ଦାୟିତ୍ବ ନୂଆ ପରିବାର ଆଇନ୍ ସମ୍ମତ ହିସାବରେ ନେଇଛନ୍ତି।ଆଗରୁ ନୂଆପଡାର ଏଭଳି ପୋଷ୍ୟ ସନ୍ତାନ ଦାନ କଳାହାଣ୍ଡି ଜିଲ୍ଲା ମାର୍ଫତ ରେ ହେଉଥିଲା ।ଏବେ ଜିଲ୍ଲାପାଳ ମଧୁସୂଦନ ଦାଶଙ୍କ ସ୍ଵତନ୍ତ୍ର ପ୍ରଚେଷ୍ଟା ବଳରେ ଜିଲ୍ଲାରେ ଏସଏଏ କାର୍ଯ୍ୟକ୍ଷମ ହୋଇ ପାରିଛି I ଏହି ଘଟଣା ଜିଲ୍ଲାରେ ପୋଷ୍ୟ ସନ୍ତାନ ସୁରକ୍ଷା ଓ ସେବା ମାମଲାରେ ଏକ ମାଇଲଷ୍ଟୋନ୍‌ ହେବ ବୋଲି ବୁଦ୍ଧିଜୀବି ମାନେ ମତ ପ୍ରକାଶ କରିଛନ୍ତି। ଜିଲ୍ଲାପାଳ ଶ୍ରୀ ଦାଶଙ୍କ ନିର୍ଦ୍ଦେଶରେ ଶିଶୁ ସୁରକ୍ଷା ବିଭାଗ ଭାର ପ୍ରାପ୍ତ ଅଧିକାରୀ ଚିନ୍ମୟ ସାଗର ଓ ଜିଲ୍ଲା ଶିଶୁ ମଙ୍ଗଳ ସମିତି ଏହି କାର୍ଯ୍ୟକ୍ରମକୁ ସଫଳ କରିବା ପାଇ ଆବଶ୍ୟକ ବିଧି ବ୍ୟବସ୍ଥା ଗ୍ରହଣ କରିଥିଲେ l ଏହି ନୂତନ ପଦକ୍ଷେପ ଜିଲ୍ଲାରେ ଅନ୍ୟ ଆବାସିକ ଶିଶୁମାନଙ୍କ ପାଇଁ ନୂତନ ଆଶା ସୃଷ୍ଟି କରିଛି। ସମାଜ ସେବୀ ସଂଗଠନମାନେ ଏହି ପଦକ୍ଷେପକୁ ସ୍ୱାଗତ କରି ଅଧିକ ନିସନ୍ତାନ ପରିବାରଙ୍କୁ ପୋଷ୍ୟ ସନ୍ତାନ ଗ୍ରହଣ ପ୍ରତି ଆଗ୍ରହୀ ହେବାକୁ ଆହ୍ୱାନ କରିଛନ୍ତି।