ନୂଆପଡ଼ାରେ ଅବକାରୀ ବିଭାଗର ସମୀକ୍ଷା ବୈଠକ: ଏମ୍‌ଆର୍‌ପି ଉଲ୍ଲଂଘନ ରୋକିବାକୁ ଅଚାନକ ଯାଞ୍ଚ ଉପରେ ଜିଲ୍ଲାପାଳଙ୍କ ଗୁରୁତ୍ୱ।

ନୂଆପଡ଼ା -୧୪/୦୮- ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଜିଲ୍ଲା ମୁଖ୍ୟାଳୟସ୍ଥିତ ସମ୍ମିଳନୀ କକ୍ଷରେ ଅବକାରୀ ବିଭାଗର ମାସିକ ସମୀକ୍ଷା ବୈଠକ ଅନୁଷ୍ଠିତ ହୋଇଛି। ବୈଠକରେ ଜିଲ୍ଲାରେ ଅବୈଧ ମଦ କାରବାର ନିୟନ୍ତ୍ରଣ, ଆଇନ ପ୍ରବର୍ତ୍ତନ ଓ ରାଜସ୍ୱ ଆଦାୟ ଉପରେ ଗୁରୁତ୍ୱ ଦିଆଯାଇଥିଲା।ପ୍ରାରମ୍ଭରେ ଜିଲ୍ଲା ଅବକାରୀ ଅଧିକ୍ଷକ ସଂଘମିତ୍ରା ପ୍ରଧାନ ବିଭାଗ ପକ୍ଷରୁ ଚାଲିଥିବା ଆଇନ ପ୍ରବର୍ତ୍ତନ, ଅବୈଧ ମଦ ବିରୋଧୀ ଚଢ଼ାଉ, ରାଜସ୍ୱ ଆଦାୟ ଓ ବିଭାଗୀୟ କାର୍ଯ୍ୟଦକ୍ଷତା ସମ୍ପର୍କରେ ବିସ୍ତୃତ ତଥ୍ୟ ଉପସ୍ଥାପନ କରିଥିଲେ।

“ଜୁଲାଇରେ ୧୯୩ ମାମଲା, ୧୦୮ ଗିରଫ”

ଜୁଲାଇ ମାସରେ ଜିଲ୍ଲାରେ ୧୯୩ଟି ମାମଲା ରୁଜୁ ହୋଇଥିବା ବେଳେ ୧୦୮ ଜଣଙ୍କୁ ଗିରଫ କରାଯାଇଛି। ଏଥିମଧ୍ୟରୁ ୬୮ଟି ମାମଲା କୋର୍ଟକୁ ପଠାଯାଇଛି। ଅବୈଧ ମଦ ବିରୋଧୀ ଅଭିଯାନରେ ୨,୨୮୨ ଲିଟର ଆଇଡି ମଦ, ୮୭୭.୪ ବଲ୍କ ଲିଟର ଓଏସ୍‌ ମଦ ଏବଂ ୪୪,୫୩୦ ଲିଟର ଫରମେଣ୍ଟେଡ୍‌ ମହୁଲି ୱାଶ୍‌ ଜବତ କରାଯାଇଛି।

💰 ରାଜସ୍ୱ ଆଦାୟରେ ୮.୦୭% ବୃଦ୍ଧି

୨୦୨୬-୨୭ ଆର୍ଥିକ ବର୍ଷ ପାଇଁ ଜିଲ୍ଲାର ଅବକାରୀ ରାଜସ୍ୱ ଆଦାୟ ଲକ୍ଷ୍ୟ ୩୨ କୋଟି ୫୭ ଲକ୍ଷ ଟଙ୍କା ଧାର୍ଯ୍ୟ କରାଯାଇଛି। ଜୁଲାଇ ଶେଷ ସୁଦ୍ଧା ୭ କୋଟି ୨୯ ଲକ୍ଷ ୯୦ ହଜାର ୬୨୪ ଟଙ୍କା ଆଦାୟ ହୋଇଛି, ଯାହା ବାର୍ଷିକ ଲକ୍ଷ୍ୟର ୨୨.୪୧%। ଗତବର୍ଷର ସମାନ ଅବଧି ତୁଳନାରେ ରାଜସ୍ୱ ଆଦାୟରେ ୮.୦୭% ବୃଦ୍ଧି ଘଟିଥିବା ଜଣାପଡ଼ିଛି।

⚠️ MRP ଉଲ୍ଲଂଘନ ଉପରେ କଡ଼ା ନଜର

ବୈଠକରେ ଜିଲ୍ଲାପାଳ ମଦ ଦୋକାନଗୁଡ଼ିକରେ ନିର୍ଦ୍ଧାରିତ ସର୍ବାଧିକ ଖୁଚୁରା ବିକ୍ରୟ ମୂଲ୍ୟ (MRP) ଠାରୁ ଅଧିକ ଦରରେ ମଦ ବିକ୍ରୟ ହେଉଛି କି ନାହିଁ, ତାହା ନିୟମିତ ଯାଞ୍ଚ କରିବାକୁ ନିର୍ଦ୍ଦେଶ ଦେଇଥିଲେ। ଏଥିପାଇଁ ଅଚାନକ ଚଢ଼ାଉ ଓ ଯାଞ୍ଚକୁ ଅଧିକ ଗୁରୁତ୍ୱ ଦେବା ସହ ନିୟମ ଉଲ୍ଲଂଘନ ହେଲେ ଦୃଢ଼ ପଦକ୍ଷେପ ନେବାକୁ ସେ କହିଥିଲେ।
ସେହିପରି ଚୋରା ମଦ କାରବାର ବିରୋଧରେ ଚଢ଼ାଉକୁ ଆହୁରି ଜୋରଦାର କରିବା ସହ ଅବୈଧ କାରବାର ଉପରେ ନିୟମିତ ନଜର ରଖିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ।
ବୈଠକରେ ଅବକାରୀ ନିରୀକ୍ଷକ ହୀରାବତୀ ଥାଟି, ସେକ୍ସନ ଅଫିସର ସୌମ୍ୟକାନ୍ତ ଓଟ୍ଟା, ଅବକାରୀ ଉପ-ନିରୀକ୍ଷକ ବୃନ୍ଦାବତୀ ଭୁଆ, ଅବକାରୀ ସହକାରୀ ଉପ-ନିରୀକ୍ଷକ ବଳଭଦ୍ର ରାଉତଙ୍କ ସମେତ ବିଭାଗର ଅନ୍ୟାନ୍ୟ ଅଧିକାରୀ ଉପସ୍ଥିତ ଥିଲେ।