ଗୋଷ୍ଠୀ ଶିକ୍ଷା କାର୍ଯ୍ୟାଳୟ ନୂଆପଡ଼ାରେ ଚୈତରାମ ନାଏକଙ୍କୁ ଭାବପୂର୍ଣ୍ଣ ବିଦାୟ ସମ୍ବର୍ଦ୍ଧନା।

ନୂଆପଡ଼ା -୦୫/୦୮- ଆଜି ଗୋଷ୍ଠୀ ଶିକ୍ଷା କାର୍ଯ୍ୟାଳୟ, ନୂଆପଡ଼ା ପରିସରରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଡ଼. ରେଶମ ଲାଲ ନାଏକଙ୍କ ସଭାପତିତ୍ୱରେ ଅବସରପ୍ରାପ୍ତ ସହ ଗୋଷ୍ଠୀ ଶିକ୍ଷା ଅଧିକାରୀ ଚୈତରାମ ନାଏକଙ୍କ ଅବସର କାଳୀନ ବିଦାୟ ସମ୍ବର୍ଦ୍ଧନା ସଭା ଗରିମାମୟ ପରିବେଶରେ ଅନୁଷ୍ଠିତ ହୋଇଯାଇଛି। ଦୀର୍ଘ କର୍ମଜୀବନରେ ଶିକ୍ଷା କ୍ଷେତ୍ର ପ୍ରତି ତାଙ୍କର ନିଷ୍ଠା, ଦାୟିତ୍ୱବୋଧ ଓ ସେବାଭାବକୁ ଉପସ୍ଥିତ ସମସ୍ତେ ଉଚ୍ଚ ପ୍ରଶଂସା କରିଥିଲେ।
ଏହି ବିଦାୟ ସମାରୋହରେ କାର୍ଯ୍ୟାଳୟର ସେକ୍ସନ ଅଫିସର କୁମୁଦିନୀ ସେଠୀ, କାର୍ଯ୍ୟାଳୟର ସମସ୍ତ କର୍ମଚାରୀ, ପ୍ରାଥମିକ ଶିକ୍ଷକ ସଂଘର ସଭାପତି ଅମିଲାଲ ଶବର, ରାଜ୍ୟ ପ୍ରାଥମିକ ଶିକ୍ଷକ ସଂଘର ସହ-ସମ୍ପାଦକ ସଞ୍ଜୟ କୁମାର ପାଢ଼ୀ, ଓଡ଼ିଶା ପ୍ରାଥମିକ ଶିକ୍ଷକ ସଂଘର ସଭାପତି ଜିତେନ୍ଦ୍ର ଖମାରୀ, ପ୍ରଧାନ ଶିକ୍ଷକ ପ୍ରମୋଦ ମିଶ୍ର, ହେମଦାସ ମାଣିକପୁରୀ, ବିନୋଦ ଠାକୁର, ପ୍ରଧାନ ଶିକ୍ଷୟିତ୍ରୀ ସରସ୍ୱତୀ ଶବର, ସବ୍ରତା ଦାଶଙ୍କ ସମେତ ଅନେକ ଶିକ୍ଷାବିତ୍ ଓ ଶିକ୍ଷକ ଉପସ୍ଥିତ ରହିଥିଲେ।
ବକ୍ତାମାନେ ଶ୍ରୀ ନାଏକଙ୍କ ସହ ବିତାଇଥିବା କର୍ମମୟ ଦିନଗୁଡ଼ିକର ସ୍ମୃତିଚାରଣ କରି ତାଙ୍କର କର୍ତ୍ତବ୍ୟନିଷ୍ଠା, ସରଳ ବ୍ୟକ୍ତିତ୍ୱ ଏବଂ ଶିକ୍ଷା ପ୍ରଶାସନରେ ରହିଥିବା ଉଲ୍ଲେଖନୀୟ ଅବଦାନକୁ ସ୍ମରଣ କରିଥିଲେ।
ଅଧ୍ୟକ୍ଷୀୟ ଅଭିଭାଷଣରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଡ଼. ରେଶମ ଲାଲ ନାଏକ ଅବସରପ୍ରାପ୍ତ ଚୈତରାମ ନାଏକଙ୍କ ସୁସ୍ଥ, ସୁଖମୟ ଓ ଶାନ୍ତିପୂର୍ଣ୍ଣ ଅବସର ଜୀବନ କାମନା କରିବା ସହ ତାଙ୍କ ଭବିଷ୍ୟତ ଜୀବନ ପାଇଁ ଶୁଭେଚ୍ଛା ଜଣାଇଥିଲେ।
ଶେଷରେ ବିଆରଟି ଉପେନ୍ଦ୍ର ସାମଲ ଧନ୍ୟବାଦ ଅର୍ପଣ କରିଥିଲେ। ଏହାପରେ ଅବସରପ୍ରାପ୍ତ ଅଧିକାରୀଙ୍କୁ ସମ୍ମାନନା ପ୍ରଦାନ କରାଯାଇଥିଲା ଏବଂ ଭାବବିହ୍ୱଳ ପରିବେଶ ମଧ୍ୟରେ ବିଦାୟ ସମ୍ବର୍ଦ୍ଧନା ସଭାର ସମାପ୍ତି ଘୋଷଣା କରାଯାଇଥିଲା।