ନୂଆପଡ଼ାରେ ମାଦକ ବିରୋଧୀ ଲଢ଼େଇକୁ ଆହୁରି ତୀବ୍ର କରିବାକୁ ଜିଲ୍ଲାପାଳଙ୍କ ନିର୍ଦ୍ଦେଶ।

ନୂଆପଡ଼ା -୦୫/୦୮- ନୂଆପଡ଼ା ଜିଲ୍ଲାସ୍ତରୀୟ ନାର୍କୋ ସମନ୍ୱୟ କେନ୍ଦ୍ର (ଏନ୍‌ସିଓଆର୍ଡି) ମେକାନିଜମ କମିଟିର ବୈଠକ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଜିଲ୍ଲା ମୁଖ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ବୈଠକରେ ଜିଲ୍ଲାରେ ଅବୈଧ ମାଦକଦ୍ରବ୍ୟ କାରବାର ରୋକିବା, ଜନସଚେତନତାକୁ ବ୍ୟାପକ କରିବା ଏବଂ ବିଭିନ୍ନ ବିଭାଗ ମଧ୍ୟରେ ସମନ୍ୱିତ କାର୍ଯ୍ୟପଦ୍ଧତିକୁ ସୁଦୃଢ଼ କରିବା ନେଇ ବିସ୍ତୃତ ଆଲୋଚନା କରାଯାଇଥିଲା।
ବୈଠକର ପ୍ରାରମ୍ଭରେ ଇନ୍ସପେକ୍ଟର ଅଫ୍ ପୋଲିସ ବି. ରୁଦ୍ରିୟା ସମସ୍ତଙ୍କୁ ସ୍ୱାଗତ ଜଣାଇ ବୈଠକର ଉଦ୍ଦେଶ୍ୟ ଉପସ୍ଥାପନ କରିଥିଲେ। ଜିଲ୍ଲାପାଳ ଶ୍ରୀ ଦାଶ ଜିଲ୍ଲା ସାମାଜିକ ସୁରକ୍ଷା କାର୍ଯ୍ୟାଳୟ, ଶିକ୍ଷା ବିଭାଗ ଓ ସ୍ୱାସ୍ଥ୍ୟ ବିଭାଗକୁ ସମନ୍ୱିତ ଭାବେ କାର୍ଯ୍ୟ କରି ମାଦକ ବିରୋଧୀ ସଚେତନତା ଅଭିଯାନକୁ ଅଧିକ ଜନମୁଖୀ କରିବାକୁ ନିର୍ଦ୍ଦେଶ ଦେଇଥିଲେ। ପ୍ରତିମାସରେ ସାଂସ୍କୃତିକ ସଚେତନତା କାର୍ଯ୍ୟକ୍ରମ ଆୟୋଜନ କରି ଯୁବପିଢ଼ି ଓ ସାଧାରଣ ଲୋକଙ୍କ ମଧ୍ୟରେ ମାଦକ ବିରୋଧୀ ସକାରାତ୍ମକ ବାର୍ତ୍ତା ପହଞ୍ଚାଇବାକୁ ସେ ଆହ୍ୱାନ ଦେଇଥିଲେ।
ଅବୈଧ ମାଦକ କାରବାରକୁ ରୋକିବା ପାଇଁ ପୋଲିସ ଓ ଅବକାରୀ ବିଭାଗ ପ୍ରତିମାସରେ ଅତି କମରେ ଥରେ ମିଳିତ ଚଢ଼ାଉ କରିବା ସହ କଠୋର ଆଇନଗତ ପଦକ୍ଷେପ ନେବାକୁ ମଧ୍ୟ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ।
ଭାରପ୍ରାପ୍ତ ଜିଲ୍ଲା ଶିକ୍ଷା ଅଧିକାରୀ ରେଶମଲାଲ ନାୟକ ସୂଚନା ଦେଇଥିଲେ ଯେ, ଜିଲ୍ଲାର ସମସ୍ତ ବିଦ୍ୟାଳୟରେ ମାଦକ ବିରୋଧୀ ସଚେତନତା କାର୍ଯ୍ୟକ୍ରମ ସମ୍ପନ୍ନ ହୋଇଛି ଏବଂ ଆସନ୍ତା ସପ୍ତାହରେ ମଧ୍ୟ ଏହା ଜାରି ରହିବ। ସେହିପରି ନବମ ଓ ଏକାଦଶ ଶ୍ରେଣୀର ଛାତ୍ରୀମାନଙ୍କୁ “ବ୍ରାଣ୍ଡ ଆମ୍ବାସାଡର” ଭାବେ ମନୋନୀତ କରାଯାଇ “ଡ୍ରଗ୍ସକୁ ନା” ବାର୍ତ୍ତାକୁ ଘରେ ଘରେ ପହଞ୍ଚାଇବା ପାଇଁ ପଦକ୍ଷେପ ନିଆଯିବ।
ବୈଠକରେ ଜୁଲାଇ-୨୦୨୬ ପର୍ଯ୍ୟନ୍ତ ପୋଲିସ ଓ ଅବକାରୀ ବିଭାଗର ମାଦକ ବିରୋଧୀ କାର୍ଯ୍ୟର ସମୀକ୍ଷା କରାଯାଇଥିଲା। ପୋଲିସ ପକ୍ଷରୁ ଚଳିତ ବର୍ଷ ୬ଟି ଏନ୍‌ଡିପିଏସ୍‌ ମାମଲା ରୁଜୁ କରାଯାଇ ୮ ଜଣଙ୍କୁ ଗିରଫ କରାଯାଇଥିବା ସହ ୪୨.୮ କିଲୋଗ୍ରାମ ଗଞ୍ଜେଇ ଓ ୨୦ ଲିଟର କଫ୍ ସିରପ୍ ଜବତ କରାଯାଇଛି। ଅନ୍ୟପଟେ ଅବକାରୀ ବିଭାଗ ୬୦୯ଟି ମାମଲା ଚିହ୍ନଟ କରି ୫୨୩ ଜଣଙ୍କୁ ଗିରଫ କରିଥିବା ସହ ବିପୁଳ ପରିମାଣର ଦେଶୀ ମଦ, ପୋଚ, ତାଡ଼ି, ବିଦେଶୀ ମଦ, ଗଞ୍ଜେଇ ଓ ମହୁଲ ଫୁଲ ଜବତ କରିଥିବା ସୂଚନା ଦିଆଯାଇଥିଲା।
ଜିଲ୍ଲାପାଳ କହିଥିଲେ ଯେ, ମାଦକମୁକ୍ତ ସମାଜ ଗଠନ କେବଳ ଆଇନ ପ୍ରୟୋଗ ଦ୍ୱାରା ସମ୍ଭବ ନୁହେଁ; ବରଂ ଜନସଚେତନତା, ପରିବାର, ଶିକ୍ଷାନୁଷ୍ଠାନ ଓ ସମସ୍ତ ସରକାରୀ ବିଭାଗର ସକ୍ରିୟ ସହଯୋଗ ଏଥିପାଇଁ ଅତ୍ୟାବଶ୍ୟକ। ଜିଲ୍ଲାକୁ ମାଦକମୁକ୍ତ କରିବା ପାଇଁ ସମସ୍ତ ବିଭାଗ ସମନ୍ୱିତ ଭାବେ କାର୍ଯ୍ୟ କରିବାକୁ ସେ ଆହ୍ୱାନ ଜଣାଇଥିଲେ।
ଏହି ବୈଠକରେ ଅତିରିକ୍ତ ଆରକ୍ଷୀ ଅଧିକ୍ଷକ ରଞ୍ଜିତ ନାୟକ, ଉପଜିଲ୍ଲାପାଳ ସୁର୍ମୀ ସୋରେନ, ଭାରପ୍ରାପ୍ତ ସିଡିଏମ୍‌ଓ ଡ. ଦ୍ୱାରିକାନାଥ ଶତପଥୀ, ସିଡିଏଓ ପ୍ରଣତିରାଣୀ ପ୍ରଧାନ, ଅବକାରୀ ଅଧିକ୍ଷକ ସଂଘମିତ୍ରା ପ୍ରଧାନ, ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଅନନ୍ତ କୁମାର ହେମ୍ବ୍ରମ, ଭାରପ୍ରାପ୍ତ ଜିଲ୍ଲା ଶିକ୍ଷା ଅଧିକାରୀ ରେଶମଲାଲ ନାୟକ, ଡ୍ରଗ୍ସ ଇନ୍ସପେକ୍ଟର ପ୍ରସନ୍ନଜିତ ମହାନ୍ତିଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।