Home ରାଜ୍ୟନୂଆପଡ଼ାରେ ଭକ୍ତି ଓ ନିଷ୍ଠାର ସହ ପାଳିତ ହେଉଛି ମହାପର୍ବ ଛଟ୍ ପୂଜା ।

ନୂଆପଡ଼ାରେ ଭକ୍ତି ଓ ନିଷ୍ଠାର ସହ ପାଳିତ ହେଉଛି ମହାପର୍ବ ଛଟ୍ ପୂଜା ।

ତେଲିପଡ଼ା ପୋଖରୀରେ ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ; ୩୬ ଘଣ୍ଟାର ନିର୍ଜଳା ଉପବାସରେ ବ୍ରତଧାରୀ।

by Maraguda Express
0 comments
ନୂଆପଡ଼ା – ୧୫/୧୧- ବିହାର ରାଜ୍ୟବାସୀଙ୍କ ପ୍ରମୁଖ ତଥା ଲୋକଆସ୍ଥାର ମହାନ ପର୍ବ ଛଟ୍ ପୂଜା ଏବେ କେବଳ ବିହାରରେ ସୀମିତ ନରହି ସାରା ଦେଶରେ ଭକ୍ତି ଓ ଶ୍ରଦ୍ଧାର ସହ ପାଳିତ ହେଉଛି। ଏହି ପରିପ୍ରେକ୍ଷୀରେ ନୂଆପଡ଼ା ଜିଲ୍ଲା ସଦର ମହକୁମାରେ ବସବାସ କରୁଥିବା ବିହାରୀ ସମ୍ପ୍ରଦାୟର ପରିବାରଗୁଡ଼ିକ ପକ୍ଷରୁ ଚାରିଦିନ ବ୍ୟାପୀ ପାରମ୍ପରିକ ରୀତିନୀତି ଓ ଧାର୍ମିକ ନିଷ୍ଠାର ସହ ଛଟ୍ ପୂଜା ଆୟୋଜିତ ହେଉଛି।
ଏହି ଅବସରରେ ଆଜି ନୂଆପଡ଼ା ସହରର ତେଲିପଡ଼ା ପୋଖରୀଠାରେ ଶ୍ରଦ୍ଧାଳୁମାନେ ଏକତ୍ରିତ ହୋଇ ଅସ୍ତଗାମୀ ସୂର୍ଯ୍ୟଦେବଙ୍କୁ ଅର୍ଘ୍ୟ ପ୍ରଦାନ କରିଛନ୍ତି। ପାରମ୍ପରିକ ପୂଜା ସାମଗ୍ରୀ, ଫଳମୂଳ, ଠେକୁଆ ଓ ଅନ୍ୟାନ୍ୟ ପ୍ରସାଦ ସହ ଶ୍ରଦ୍ଧାଳୁମାନେ ଛଟୀ ମାଆଙ୍କ ଆରାଧନା କରିଥିଲେ। ପୋଖରୀ କୂଳରେ ଭକ୍ତିମୟ ପରିବେଶ ସୃଷ୍ଟି ହେବା ସହ ପୂଜାର୍ଚ୍ଚନା ଓ ଛଟୀ ମାଆଙ୍କ ଜୟଧ୍ୱନିରେ ସମଗ୍ର ପରିବେଶ ଆଧ୍ୟାତ୍ମିକ ହୋଇଉଠିଥିଲା।
ଛଟ୍ ପୂଜାର ସବୁଠାରୁ ବିଶେଷ ଦିଗ ହେଉଛି ବ୍ରତଧାରୀମାନଙ୍କ କଠୋର ନିଷ୍ଠା ଓ ତ୍ୟାଗ। ଏହି ପର୍ବରେ ଅନେକ ବ୍ରତଧାରୀ ପ୍ରାୟ ୩୬ ଘଣ୍ଟା ଧରି ନିର୍ଜଳା ଉପବାସ ପାଳନ କରି ସୂର୍ଯ୍ୟଦେବ ଓ ଛଟୀ ମାଆଙ୍କ ନିକଟରେ ପରିବାରର ସୁଖ, ସମୃଦ୍ଧି, ସୁସ୍ଥତା ଓ ମଙ୍ଗଳ କାମନା କରିଥାନ୍ତି। ଏହି ପୂଜାରେ ଉଦୟମାନ ସୂର୍ଯ୍ୟଙ୍କ ସହ ଅସ୍ତଗାମୀ ସୂର୍ଯ୍ୟଙ୍କୁ ମଧ୍ୟ ଅର୍ଘ୍ୟ ପ୍ରଦାନ କରିବାର ଏକ ଅନନ୍ୟ ପରମ୍ପରା ରହିଛି।
ଆଜି ସନ୍ଧ୍ୟାରେ ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ ପରେ ଆସନ୍ତାକାଲି ପ୍ରାତଃକାଳରେ ପୁନର୍ବାର ତେଲିପଡ଼ା ପୋଖରୀଠାରେ ଶ୍ରଦ୍ଧାଳୁମାନେ ଏକତ୍ରିତ ହୋଇ ଉଦିତ ସୂର୍ଯ୍ୟଦେବଙ୍କୁ ଅର୍ଘ୍ୟ ଅର୍ପଣ କରିବେ। ଏହାପରେ ପାରମ୍ପରିକ ପୂଜାବିଧି ସମାପନ ସହ ଚାରିଦିନିଆ ଛଟ୍ ପୂଜାର ଉଦଯାପନ ହେବ। ଆଜି ଏହି ଛଟି ମାଁ ଙ୍କ ମହା ଆୟୋଜନ ରେ ନୂଆପଡ଼ା ବିଧାୟକ ଜୟ ଢୋଲକିଆ ଯୋଗ ଦେଇ ସମସ୍ତଙ୍କୁ ଉତ୍ସାହିତ କରିଥିଲେ ।
ଏହି ଧାର୍ମିକ ଆୟୋଜନରେ ଛଟୀ ମାଆଙ୍କ ଭକ୍ତ ଶମ୍ଭୁପ୍ରସାଦ ଗୁପ୍ତା, ଲଳନ ଗୁପ୍ତା, ଗୋପାଳ ଗୁପ୍ତା, ନିଲେଶ ଗୁପ୍ତା, ଅନିଲ ଗୁପ୍ତା, ରାମ ନିବାସ ସିଂ, ସିଉଦଦତ୍ ସିଂ, ଶ୍ରୀକାନ୍ତ ସିଂ ଓ ସୁନୀଲ ଗୁପ୍ତା ପ୍ରମୁଖ ନେତୃତ୍ୱ ନେଇଥିଲେ।
ଛଟ୍ ପୂଜା କେବଳ ଏକ ଧାର୍ମିକ ଉତ୍ସବ ନୁହେଁ, ବରଂ ପ୍ରକୃତି, ସୂର୍ଯ୍ୟ ଉପାସନା, ଶୁଦ୍ଧତା, ତ୍ୟାଗ, ଶୃଙ୍ଖଳା ଓ ପାରିବାରିକ ମଙ୍ଗଳର ଏକ ଅନନ୍ୟ ପ୍ରତୀକ। ନୂଆପଡ଼ା ମାଟିରେ ଏହି ପର୍ବର ଆୟୋଜନ ମାଧ୍ୟମରେ ଭାଇଚାରା, ସାଂସ୍କୃତିକ ଏକତା ଓ ଧାର୍ମିକ ସହାବସ୍ଥାନର ସୁନ୍ଦର ଚିତ୍ର ପ୍ରତିଫଳିତ ହୋଇଛି।

You may also like

Leave a Comment

Maraguda Express is a dynamic and reliable digital news platform committed to delivering fast, accurate, and unbiased news to the people. Rooted in journalistic integrity, Maraguda Express covers a wide range of topics including breaking news, politics, current affairs, development, culture, and regional issues, with a special focus on the voice of local communities

Useful Links

Edtior's Picks

Latest Articles

All Right Reserved. Designed and Developed by Web Odisha