ନୂଆପଡ଼ାରେ ସମନ୍ୱିତ ଶିଶୁ ବିକାଶ ଯୋଜନା ସମୀକ୍ଷା ବୈଠକ। ଶିଶୁ ମୃତ୍ୟୁ ପାଇଁ ସୁପରଭାଇଜରଙ୍କୁ କୈଫତ ତଲବ, ଦରମା ବନ୍ଦ ନିର୍ଦ୍ଦେଶ l

ନୂଆପଡ଼ା -୨୭/୩- ନୂଆପଡ଼ା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ସମନ୍ୱିତ ଶିଶୁ ବିକାଶ ଯୋଜନା ସମ୍ପର୍କିତ ଜିଲ୍ଲାସ୍ତରୀୟ ସମୀକ୍ଷା ବୈଠକ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି।
ବୈଠକରେ ଜିଲ୍ଲାପାଳ ଶିଶୁ ଓ ମାତୃ ମୃତ୍ୟୁହାରକୁ ଶୂନ୍ୟକୁ ଆଣିବା ପାଇଁ ସମସ୍ତ ବିଭାଗକୁ ସମନ୍ୱିତ ଭାବେ କାମ କରିବାକୁ ନିର୍ଦ୍ଦେଶ ଦେଇଥିଲେ। ଶିଶୁ ଓ ମାତୃ ମୃତ୍ୟୁ ଘଟଣା ପ୍ରତି ଅସନ୍ତୋଷ ବ୍ୟକ୍ତ କରି ସେ କହିଥିଲେ ଯେ, କୌଣସି ଯୁକ୍ତିସଙ୍ଗତ କାରଣ ବିନା ଏପରି ମୃତ୍ୟୁ ଘଟିଲେ ତାହାକୁ ସାମୁହିକ ବିଫଳତା ଭାବେ ଗଣାଯିବ। ଏହି ପରିପ୍ରେକ୍ଷିରେ କୋମନା ଅଞ୍ଚଳରେ ଜଣେ ସୁପରଭାଇଜରଙ୍କୁ କାରଣ ଦର୍ଶାଅ ନୋଟିସ ଜାରି ସହ ମାର୍ଚ୍ଚ ମାସର ଦରମା ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା।
ଅଙ୍ଗନୱାଡ଼ି କେନ୍ଦ୍ରଗୁଡିକ ସଫା ଓ ପରିଚ୍ଛନ୍ନତା ଉପରେ ଗୁରୁତ୍ୱ ଦେଇ ଜିଲ୍ଲାପାଳ “ଗାଁ ପରିମଳ–ଗାଁ ମୁଣ୍ଡରୁ” ଅଭିଯାନକୁ ସକ୍ରିୟ ଭାବେ କାର୍ଯ୍ୟକାରୀ କରିବାକୁ କହିଥିଲେ। ସେହିପରି ଶିଶୁ ବିକାଶ ପ୍ରକଳ୍ପ ଅଧିକାରୀମାନଙ୍କୁ ନିୟମିତ ଭାବେ ଅଙ୍ଗନୱାଡ଼ି କେନ୍ଦ୍ର ପରିଦର୍ଶନ କରିବାକୁ ଓ ଜିଲ୍ଲା ସମାଜ କଲ୍ୟାଣ ଅଧିକାରୀ ଓ ଉପ-ଜିଲ୍ଲାପାଳଙ୍କୁ ସର୍ବାଧିକ ସଂଖ୍ୟକ କେନ୍ଦ୍ର ପରିଦର୍ଶନ କରିବାକୁ ନିର୍ଦ୍ଦେଶ ଦେଇଥିଲେ।
ବୈଠକରେ ଦେଓବାହାଲ ଅଞ୍ଚଳର ପ୍ଲାଷ୍ଟିକ ମୁକ୍ତ ଅଙ୍ଗନୱାଡ଼ି କେନ୍ଦ୍ରକୁ ଆଦର୍ଶ ଭାବେ ପ୍ରଦର୍ଶନ କରାଯାଇଥିଲା। ଏହା ସହିତ ସମସ୍ତ ଆଇସିଡ଼ିଏସ କର୍ମଚାରୀଙ୍କ ମଧ୍ୟରେ ସଚେତନତା ବୃଦ୍ଧି ପାଇଁ “ଝିଅ ହୋଇଇ ନେବି ମୁଁ ଶହେ ଜନମ” ଡାଏଲର ଟ୍ୟୁନ୍ ରୂପେ ବ୍ୟବହାର କରିବାକୁ କରାଯାଇଥିଲା।
ବୈଠକରେ ଉପ-ଜିଲ୍ଲାପାଳ ଶ୍ରୀମତୀ ସୂର୍ମି ସୋରେନ, ଜିଲ୍ଲା ସମାଜ କଲ୍ୟାଣ ଅଧିକାରୀ ଶ୍ରୀମତୀ ଏସ୍‌. ଗୀତା, ଶିଶୁ ବିକାଶ ପ୍ରକଳ୍ପ ଅଧିକାରୀମାନେ, ସୁପରଭାଇଜର ଓ ଅନ୍ୟାନ୍ୟ ସମ୍ପୃକ୍ତ କର୍ମଚାରୀମାନେ ଉପସ୍ଥିତ ଥିଲେ।