ଖରିଆର ରୋଡ଼ ସହର ବିକାଶ କୁ ମିଳିଲା ନୂଆ ଗତି : ₹୯.୩୦ କୋଟିର ବିକାଶ ପ୍ରକଳ୍ପକୁ ମଞ୍ଜୁରି, ଶୀଘ୍ର ଆରମ୍ଭ ହେବ ଟେଣ୍ଡର ପ୍ରକ୍ରିୟା।

ନୂଆପଡା -୨/୦୭- ଖରିଆର ରୋଡ଼ କୁ ସ୍ମାର୍ଟ, ସ୍ୱଚ୍ଛ, ସୁନ୍ଦର ଓ ଆଧୁନିକ ସହରରେ ପରିଣତ କରିବା ଦିଗରେ ଆଉ ଏକ ବଡ଼ ପଦକ୍ଷେପ ନିଆଯାଇଛି। ଓଡ଼ିଶା ର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଙ୍କ ଦ୍ୱାରା ଖରିଆର ରୋଡ଼ ର ପୂର୍ବରୁ ଘୋଷିତ ବିଭିନ୍ନ ବିକାଶ ପ୍ରକଳ୍ପ ପାଇଁ ₹୯ କୋଟି ୩୦ ଲକ୍ଷ ଟଙ୍କା ମଞ୍ଜୁର କରାଯାଇଛି। ଏହି ମଞ୍ଜୁରି ପରେ ଖରିଆର ରୋଡ଼ ଏନଏସି ପକ୍ଷରୁ ଖୁବ୍ ଶୀଘ୍ର ସମସ୍ତ ପ୍ରକଳ୍ପର ଟେଣ୍ଡର ପ୍ରକ୍ରିୟା ଆରମ୍ଭ କରାଯିବ।ଏହି ଉନ୍ନୟନ ଯୋଜନାକୁ ନେଇ ଡା. ସୋନିଆ ଜୈନ କହିଛନ୍ତି, “ଯାହା କହିଥିଲୁ, ତାହା କରି ଦେଖାଉଛୁ। ସ୍ମାର୍ଟ ଖରିଆର ରୋଡ଼ ଗଢ଼ିବାର ସଂକଳ୍ପକୁ ପର୍ଯ୍ୟାୟକ୍ରମେ ବାସ୍ତବ ରୂପ ଦିଆଯାଉଛି।” ସେ ଏଥିପାଇଁ ମୁଖ୍ୟମନ୍ତ୍ରୀଙ୍କୁ ହୃଦୟରୁ କୃତଜ୍ଞତା ଓ ଧନ୍ୟବାଦ ଜଣାଇଛନ୍ତି।
ମଞ୍ଜୁରି ପାଇଥିବା ପ୍ରମୁଖ ବିକାଶ ପ୍ରକଳ୍ପ ଗୁଡ଼ିକ ହେଲା
* ୱାର୍ଡ ନଂ–୪ : ମଙ୍ଗଳ ବଜାରକୁ ମଡେଲ୍ ମାର୍କେଟ୍ (ମିନି କୋଲ୍ଡ ଷ୍ଟୋରେଜ୍ ସହିତ) ଭାବେ ବିକଶିତ କରାଯିବ – ₹୩ କୋଟି।
* ୱାର୍ଡ ନଂ–୧୮ ଓ ୩ ମଧ୍ୟରେ ଇନ୍ଡୋର ଷ୍ଟାଡିୟମ୍ ପଛପାର୍ଶ୍ୱରେ ଆଧୁନିକ ଚଉପାଟି ନିର୍ମାଣ – ₹୨ କୋଟି।
* ୱାର୍ଡ ନଂ–୧୩ ଓ ୪ରେ ସ୍ମାର୍ଟ ପାର୍କ ନିର୍ମାଣ – ₹୨ କୋଟି ୫୦ ଲକ୍ଷ।
* ସର୍ବାଧୁନିକ ସୁବିଧାଯୁକ୍ତ ଆମ୍ବୁଲାନ୍ସ କ୍ରୟ – ₹୫୦ ଲକ୍ଷ।
* ରୋଡ୍ ସ୍ୱିପିଂ ମେସିନ୍ କ୍ରୟ – ₹୧ କୋଟି ୩୦ ଲକ୍ଷ।
* ଆଧୁନିକ ଲାଇବ୍ରେରୀ ନିର୍ମାଣ – ₹୧୫ ଲକ୍ଷ।
ଡା. ସୋନିଆ କହିଛନ୍ତି ଯେ, ଡବଲ୍ ଇଞ୍ଜିନ ସରକାରଙ୍କ ନେତୃତ୍ୱରେ ଖରିଆର ରୋଡ଼ ର ବିକାଶକୁ ନୂତନ ଦିଗ ମିଳିଛି। ସହରକୁ ସ୍ମାର୍ଟ, ସ୍ୱଚ୍ଛ, ସୁନ୍ଦର ଏବଂ ଆଧୁନିକ ନଗରରେ ପରିଣତ କରିବାର ସଂକଳ୍ପ କୁ ପଦକ୍ଷେପେ ସ୍ବପ୍ନ ସାକାର କରାଯାଉଛି। ଏହି ସମସ୍ତ ପ୍ରକଳ୍ପ କାର୍ଯ୍ୟକାରୀ ହେଲେ ଖରିଆର ରୋଡ଼ ର ସହରୀୟ ଭିତ୍ତିଭୂମି, ସ୍ୱାସ୍ଥ୍ୟ ସେବା, ପରିବେଶ ଓ ଜନ ସୁବିଧାରେ ଆମୂଳ ଚୂଳ ପରିବର୍ତ୍ତନ ଆସିବ ବୋଲି ସାଧାରଣରେ ଆଶା ପ୍ରକାଶ ପାଇଛି। ( ଉପରୋକ୍ତ ଖବର ରେ ୩ ଗୋଟି ଫାଇଲ ଫଟୋ ବ୍ୟବହାର କରାଯାଇଛି।)