ଗରିବଙ୍କ ସ୍ୱପ୍ନକୁ ମିଳିଲା ପକ୍କାଘର, ସଫେଇ କର୍ମଚାରୀଙ୍କୁ ସୁରକ୍ଷା କିଟ୍ : ଖଡ଼ିଆଳ ଏନଏସିର ଜନହିତକର ପଦକ୍ଷେପ।

ନୂଆପଡା -୨/୦୭ – ନୂଆପଡା ଜିଲ୍ଲା ର ଖଡ଼ିଆଳ ବିଜ୍ଞାପିତ ଅଞ୍ଚଳ ପରିଷଦ (ଏନଏସି) ପକ୍ଷରୁ ବିକାଶ ଓ ଜନସେବାର ଏକ ଉଲ୍ଲେଖନୀୟ ଦୃଷ୍ଟାନ୍ତ ସୃଷ୍ଟି କରାଯାଇଛି। ଖଡ଼ିଆଳ ନୂତନ କଲ୍ୟାଣ ମଣ୍ଡପ ପରିସରରେ ଆୟୋଜିତ ଏକ ଭବ୍ୟ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଆବାସ ଯୋଜନା (ସହର) ଅଧୀନ ରେ ୧୮୫ ଜଣ ଯୋଗ୍ୟହି ତାଧିକାରୀ ଙ୍କୁ ଗୃହ ନିର୍ମାଣ କାର୍ଯ୍ୟାଦେଶ ପ୍ରଦାନ କରାଯାଇଥିବା ବେଳେ ସହରକୁ ସ୍ୱଚ୍ଛ ଓ ସୁନ୍ଦର ରଖିବାରେ ନିୟୋଜିତ ସଫେଇ କର୍ମଚାରୀମାନଙ୍କୁ ସୁରକ୍ଷା ସଫେଇ କିଟ୍ ବଣ୍ଟନ କରାଯାଇଥିଲା।
ଏହି ଅବସରରେ “ଗରିବଙ୍କୁ ପକ୍କାଘର, ସଫେଇ କର୍ମଚାରୀଙ୍କୁ ସୁରକ୍ଷା” ବାର୍ତ୍ତାକୁ ବାସ୍ତବ ରୂପ ଦେବା ସହ ସାମାଜିକ କଲ୍ୟାଣ ଓ ସହର ବିକାଶ ପ୍ରତି ଏନଏସିର ପ୍ରତିବଦ୍ଧତା ସ୍ପଷ୍ଟ ହୋଇଥିଲା।
କାର୍ଯ୍ୟକ୍ରମରେ ଖଡ଼ିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇ ଯୋଗ୍ୟ ହିତାଧିକାରୀଙ୍କୁ କାର୍ଯ୍ୟାଦେଶ ବଣ୍ଟନ କରିଥିଲେ। ସେ ନୂତନ ଗୃହ ନିର୍ମାଣ ମାଧ୍ୟମରେ ପରିବାର ଗୁଡ଼ିକର ଜୀବନଧାରା ରେ ସକାରାତ୍ମକ ପରିବର୍ତ୍ତନ ଆସିବ ବୋଲି ଆଶା ପ୍ରକାଶ କରି ସମସ୍ତ ହିତାଧିକାରୀଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଥିଲେ।
ସମ୍ମାନିତ ଅତିଥି ଭାବେ ଏନଏସି ଅଧ୍ୟକ୍ଷ ଉଜ୍ଜଳ ଗୁପ୍ତା,ଉପାଧ୍ୟକ୍ଷା ଶକୁନ୍ତଳା ରାଉତ ଏବଂ କାର୍ଯ୍ୟନିର୍ବାହୀ ଅଧିକାରୀ ସ୍ୱାଧୀନ କେତନ ମହାରଣା ଉପସ୍ଥିତ ରହି ସରକାରୀ ଯୋଜନାର ସଫଳ ରୂପାୟନ, ନାଗରିକ ସେବାର ଉନ୍ନତି ଓ ଖଡ଼ିଆଳ ସହରର ସର୍ବାଙ୍ଗୀଣ ବିକାଶ ପାଇଁ ଏନଏସିର ଅବିରତ ପ୍ରୟାସ ଉପରେ ଗୁରୁତ୍ୱାରୋପ କରିଥିଲେ।
ସହରକୁ ସ୍ୱଚ୍ଛ ରଖିବାରେ ଦିନରାତି ପରିଶ୍ରମ କରୁଥିବା ସଫେଇ କର୍ମଚାରୀମାନଙ୍କ ସୁରକ୍ଷାକୁ ପ୍ରାଥମିକତା ଦେଇ ସେମାନଙ୍କୁ ସଫେଇ କିଟ୍ ପ୍ରଦାନ କରାଯାଇଥିଲା। ଏହା ସେମାନଙ୍କର କାର୍ଯ୍ୟକୁ ଅଧିକ ସୁରକ୍ଷିତ ଓ ସୁବିଧାଜନକ କରିବାରେ ସହାୟକ ହେବ ବୋଲି ମତ ପ୍ରକାଶ ପାଇଥିଲା।
ସୂଚନାଯୋଗ୍ୟ ଯେ, ଖଡ଼ିଆଳ ଏନଏସି ଅଞ୍ଚଳରେ ବର୍ତ୍ତମାନ ସୁଦ୍ଧା ପ୍ରାୟ ୩ ହଜାର ଟି ପ୍ରଧାନମନ୍ତ୍ରୀ ଆବାସ ଘରର ବଣ୍ଟନ ଓ ନିର୍ମାଣ କାର୍ଯ୍ୟ ସଫଳତାର ସହ ସମ୍ପନ୍ନ ହୋଇସାରିଛି। ଆଗାମୀ ଦିନରେ କୌଣସି ଯୋଗ୍ୟ ହିତାଧିକାରୀ ଏହି ମହତ୍ତ୍ୱାକାଙ୍କ୍ଷୀ ଯୋଜନାରୁ ବଞ୍ଚିତ ନ ହୁଅନ୍ତୁ, ସେଥିପାଇଁ ଏନଏସି ପ୍ରଶାସନ ସମ୍ପୂର୍ଣ୍ଣ ପ୍ରତିବଦ୍ଧ ବୋଲି ଏନଏସି ଅଧ୍ୟକ୍ଷ ଓ କାର୍ଯ୍ୟନିର୍ବାହୀ ଅଧିକାରୀ ସ୍ପଷ୍ଟ କରିଥିଲେ।
ଏହି କାର୍ଯ୍ୟକ୍ରମକୁ ସଫଳ କରିବାରେ ଏନଏସିର ସମସ୍ତ କାଉନସିଲର ଙ୍କ ସହ ସିଏଲଟିସି ଶାଶ୍ୱତ କୁମାର ସାହୁ, ସିଓ ସଂଯୁକ୍ତା ପଣ୍ଡା, ଟ୍ୟାକ୍ସ ଦରୋଗା ଇଜାର ତାଣ୍ଡି ଓ ସାନିଟେସନ ଏକ୍ସପର୍ଟ ଅମିତ ସାମଲ ପ୍ରମୁଖ ଉପସ୍ଥିତ ରହି ସମ୍ପୂର୍ଣ୍ଣ ସହଯୋଗ କରିଥିଲେ।