କୋମନାରେ ଏସିଡ୍ ମାଡ଼ ବିରୋଧରେ ସଚେତନତା:ଆଇନ ସହାୟତା ଓ ପୀଡ଼ିତ କ୍ଷତିପୂରଣ ଯୋଜନା ନେଇ ଛାତ୍ରଛାତ୍ରୀଙ୍କୁ ସୂଚନା।

ନୂଆପଡ଼ା -୨୯/୦୯- କୋମନା ସ୍ଥିତ ପଞ୍ଚାୟତ ସମିତି ଉଚ୍ଚ ମାଧ୍ୟମିକ ବିଦ୍ୟାଳୟ ପରିସରରେ ଜିଲ୍ଲା ଆଇନ ସେବା ପ୍ରାଧିକରଣଙ୍କ ଆନୁକୂଲ୍ୟରେ ଏସିଡ୍ ମାଡ଼ ପୀଡ଼ିତଙ୍କ ପାଇଁ ଆଇନ ସହାୟତା, ବିଭିନ୍ନ ଦଣ୍ଡବିଧାନ ଏବଂ ପୀଡ଼ିତ କ୍ଷତିପୂରଣ ଯୋଜନା ସମ୍ପର୍କିତ ଏକ ସଚେତନତା କାର୍ଯ୍ୟକ୍ରମ ଓ ପଥପ୍ରାନ୍ତ ନାଟକ ଅନୁଷ୍ଠିତ ହୋଇଯାଇଛି।
କାର୍ଯ୍ୟକ୍ରମରେ ନାଲ୍ସା (ଏସିଡ୍ ମାଡ଼ ପୀଡ଼ିତଙ୍କୁ ଆଇନ ସହାୟତା) ଯୋଜନା, ୨୦୧୬, ବିଭିନ୍ନ ଦଣ୍ଡବିଧାନ ଏବଂ ପୀଡ଼ିତ କ୍ଷତିପୂରଣ ଯୋଜନା, ୨୦୧୭ ସମ୍ପର୍କରେ ଉପସ୍ଥିତ ଛାତ୍ରଛାତ୍ରୀଙ୍କୁ ବିସ୍ତୃତ ଭାବେ ସଚେତନ କରାଯାଇଥିଲା। ଏସିଡ୍ ମାଡ଼ ଭଳି ଗୁରୁତର ଅପରାଧର ଶିକାର ହେଲେ ଆଇନଗତ ସହାୟତା କିପରି ପାଇପାରିବେ ଏବଂ ପୀଡ଼ିତଙ୍କ ପାଇଁ ଉପଲବ୍ଧ କ୍ଷତିପୂରଣ ବ୍ୟବସ୍ଥା ସମ୍ପର୍କରେ ମଧ୍ୟ ସୂଚନା ଦିଆଯାଇଥିଲା।
ଏହି ସଚେତନତା କାର୍ଯ୍ୟକ୍ରମରେ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ନବନୀତା ଦାଶ, ଜିଲ୍ଲା ସମାଜ କଲ୍ୟାଣ କାର୍ଯ୍ୟାଳୟର ଜିଲ୍ଲା ସଂଯୋଜକ ରଞ୍ଜନ କୁମାର ସାହୁ, ବିଦ୍ୟାଳୟର ଅଧ୍ୟକ୍ଷ ଡ଼ଃ ଦୀପକ କୁମାର ଦାଶ, ଦରବାର ସାହିତ୍ୟ ସଂସଦର ଜିଲ୍ଲା ସଂଯୋଜିକା ବୈଦେହୀ ସେଠିଆଙ୍କ ସମେତ ଜିଲ୍ଲା ଆଇନ ସେବା ପ୍ରାଧିକରଣର ଅଧିକାର ମିତ୍ରମାନେ ଉପସ୍ଥିତ ଥିଲେ।
ନାଟକ ମାଧ୍ୟମରେ ଏସିଡ୍ ମାଡ଼ ବିରୋଧରେ ବାର୍ତ୍ତା
କାର୍ଯ୍ୟକ୍ରମର ଏକ ପ୍ରମୁଖ ଆକର୍ଷଣ ଥିଲା ଛାତ୍ରଛାତ୍ରୀମାନଙ୍କ ଦ୍ୱାରା ପ୍ରଦର୍ଶିତ ଏସିଡ୍ ମାଡ଼ ସମ୍ପର୍କିତ ସଚେତନତାମୂଳକ ନାଟକ। ନାଟକ ମାଧ୍ୟମରେ ଏସିଡ୍ ମାଡ଼ର ଭୟାବହ ପରିଣାମ, ପୀଡ଼ିତଙ୍କ ଅଧିକାର ଏବଂ ଏଭଳି ଅପରାଧ ବିରୋଧରେ ସମାଜର ଦାୟିତ୍ୱ ସମ୍ପର୍କରେ ବାର୍ତ୍ତା ପ୍ରଦାନ କରାଯାଇଥିଲା।
ଛାତ୍ରଛାତ୍ରୀଙ୍କ ଏହି ସଚେତନତାମୂଳକ ପ୍ରଦର୍ଶନ ଉପସ୍ଥିତ ଦର୍ଶକଙ୍କ ମଧ୍ୟରେ ଆଇନ ସଚେତନତା ସୃଷ୍ଟି କରିବା ସହ ଏସିଡ୍ ମାଡ଼ ଭଳି ଅପରାଧ ବିରୋଧରେ ସମାଜକୁ ଅଧିକ ସଚେତନ ହେବାର ବାର୍ତ୍ତା ଦେଇଥିଲା।
ଏହା ପରେ ଦରବାର ସାହିତ୍ୟ ସଂସଦ ପକ୍ଷରୁ ଅଧିକାର ମିତ୍ରମାନଙ୍କ ପାଇଁ ଏକ ତାଲିମ ଶିବିର ଆୟୋଜନ କରାଯାଇଥିଲା। ଏଥିରେ ଲୋକମାନଙ୍କ ମଧ୍ୟରେ ଆଇନ ସଚେତନତା ବୃଦ୍ଧି, ଆଇନଗତ ସହାୟତା ପାଇବାର ପ୍ରକ୍ରିୟା ଏବଂ ପୀଡ଼ିତଙ୍କ ଅଧିକାର ସମ୍ପର୍କରେ ଅଧିକାର ମିତ୍ରମାନଙ୍କୁ ଆବଶ୍ୟକୀୟ ତାଲିମ ଓ ସୂଚନା ପ୍ରଦାନ କରାଯାଇଥିଲା।
ସମାଜରେ ଆଇନ ସଚେତନତା ବୃଦ୍ଧି କରିବା ସହ ଏସିଡ୍ ମାଡ଼ ଭଳି ଅପରାଧର ଶିକାର ହେଉଥିବା ବ୍ୟକ୍ତିଙ୍କୁ ଆଇନଗତ ସହାୟତା ଓ ନ୍ୟାୟ ପ୍ରଦାନରେ ଏଭଳି କାର୍ଯ୍ୟକ୍ରମ ଗୁରୁତ୍ୱ ବହନ କରୁଛି।