ନୂଆପଡ଼ାରେ ଅବୈଧ ଘରୋଇ ଏଲପିଜି ବ୍ୟବହାର କରୁଥିବା ହୋଟେଲ ଉପରେ ଚଢ଼ାଉ : ଦୀପକ ହୋଟେଲ , ମାହି ରେଷ୍ଟୁରାଣ୍ଟ ଓ ହାଇଦ୍ରାବାଦୀ ବିରୟାନି ହୋଟେଲ ରୁ ମୋଟ ୧୧ ଘରୋଇ ଗ୍ୟାସ ସିଲିଣ୍ଡର ଜବତ।

ନୂଆପଡ଼ା ୨୬/୩ – ନୂଆପଡ଼ା ଜିଲ୍ଲାରେ ବିଭିନ୍ନ ହୋଟେଲ ମାନଙ୍କରେ ଘରୋଇ ଏଲପିଜି ସିଲିଣ୍ଡର କୁ ବାଣିଜ୍ୟିକ ଉଦ୍ଦେଶ୍ୟରେ ଅବୈଧ ବ୍ୟବହାର କରାଯାଉଥିବା ଅଭିଯୋଗ ଉପରେ ଗତକାଲି ଯୋଗାଣ ବିଭାଗର ଇନଫୋର୍ସମେଣ୍ଟ ସ୍କୱାଡ୍ ଦ୍ୱାରା ଚଢ଼ାଉ କରାଯାଇଥିଲା। ଏହି ଚଢ଼ାଉ ସମୟରେ ନୂଆପଡ଼ା ସହରର ବିଭିନ୍ନ ହୋଟେଲ ଓ ରେଷ୍ଟୁରାଣ୍ଟରୁ ମୋଟ ୧୧ଟି ଏଲପିଜି ସିଲିଣ୍ଡର ଜବତ କରାଯାଇଛି। ଦୀପକ ହୋଟେଲ ରୁ ୩ ଟି ଘରୋଇ ଗ୍ୟାସ ସିଲିଣ୍ଡର, ମାହୀ ରେଷ୍ଟୁରାଣ୍ଟ ରୁ ୩ ଘରୋଇ ଗ୍ୟାସ ସିଲିଣ୍ଡର ଓ ହାଇଦ୍ରାବାଦୀ ବିରୀୟାନି ହୋଟେଲ ରୁ ୫ ଟି ଘରୋଇ ଗ୍ୟାସ ସିଲିଣ୍ଡର ଜବତ କରାଯାଇଛି।
ନୂଆପଡ଼ା ଏସିଏସଓ (ମୁଖ୍ୟାଳୟ) ଶ୍ରୀମତୀ ପୂର୍ଣ୍ଣାଶା ଭୋଇଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଥିଲା ବେଳେ ନୂଆପଡ଼ା ବ୍ଲକ୍ ଯୋଗାଣ ନିରୀକ୍ଷକ ଶ୍ରୀମତୀ ସୁଭଶ୍ରୀ ଦାସ ଓ କୋମନା ବ୍ଲକ୍ ଯୋଗାଣ ନିରୀକ୍ଷକ ପୂର୍ଣ୍ଣଚନ୍ଦ୍ର ରାଉତ ଏଥିରେ ସହଯୋଗ କରିଥିଲେ।
ଯାଞ୍ଚ ସମୟରେ ଘରୋଇ ଏଲପିଜି ସିଲିଣ୍ଡର କୁ ବାଣିଜ୍ୟିକ ଉଦ୍ଦେଶ୍ୟରେ ବ୍ୟବହାର କରାଯାଉଥିବା ପ୍ରମାଣ ମିଳିଥିଲା। ନିୟମ ଉଲ୍ଲଂଘନ ହେବାରୁ ସେଗୁଡ଼ିକୁ ଜବତ କରାଯାଇଛି।
ପ୍ରଶାସନ ପକ୍ଷରୁ ଏପରି ଅବୈଧ କାର୍ଯ୍ୟରେ ଜଡିତ ବ୍ୟକ୍ତିଙ୍କ ବିରୋଧରେ ଆଗାମୀଦିନରେ କଡ଼ା କାର୍ଯ୍ୟନୁଷ୍ଠାନ ନିଆଯିବ ବୋଲି କୁହାଯାଇଛି। ସମସ୍ତ ବ୍ୟବସାୟୀଙ୍କୁ ନିୟମ ଅନୁସାରେ କେବଳ ବାଣିଜ୍ୟିକ ସିଲିଣ୍ଡର ବ୍ୟବହାର କରିବାକୁ ଅନୁରୋଧ କରାଯାଇଛି।