ଖଡ଼ିଆଳରେ ବିଶ୍ୱ ଶିଶୁ ଶ୍ରମିକ ନିରୋଧ ଦିବସ ପାଳିତ: ଶିଶୁ ଶ୍ରମିକମାନଙ୍କ ଉଦ୍ଧାର ଓ ଥଇଥାନ ଉପରେ ଗୁରୁତ୍ୱ।

ନୂଆପଡ଼ା -୧୩/୦୬ ଜିଲ୍ଲା ଆଇନ ସେବା ପ୍ରାଧିକରଣ ଓ ଜିଲ୍ଲା ଶ୍ରମ ବିଭାଗର ମିଳିତ ଆନୁକୂଲ୍ୟରେ ନୂଆପଡ଼ା ଜିଲ୍ଲା ଖଡ଼ିଆଳ ବ୍ଲକ ସ୍ଥିତ କ୍ଷେତ୍ରୀୟ ସମାଜ ସଭାଗୃହ ରେ ଗତକାଲି ବିଶ୍ଵ ଶିଶୁ ଶ୍ରମିକ ନିରୋଧ ଦିବସ ବେଶ୍ ଗାମ୍ଭୀର୍ଯ୍ୟ ସହକାରେ ପାଳିତ ହୋଇଯାଇଛି। ସଚେତନତା ଦ୍ୱାରା ହିଁ ସମାଜରୁ ଶିଶୁ ଶ୍ରମିକ ପ୍ରଥାର ଉଚ୍ଛେଦ ସମ୍ଭବ ବୋଲି ଏହି ଅବସରରେ ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି।
କାର୍ଯ୍ୟକ୍ରମର ପ୍ରାରମ୍ଭରେ ସର୍ବସାଧାରଣଙ୍କ ମଧ୍ୟରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଏକ ବିଶାଳ ଶୋଭା ଯାତ୍ରାର ଆୟୋଜନ କରାଯାଇଥିଲା। ଏହି ଶୋଭାଯାତ୍ରା ବ୍ଲକ୍ ଛକରୁ ବାହାରି ଶିଶୁ ଶ୍ରମିକ ନିରୋଧ ସମ୍ପର୍କିତ ବିଭିନ୍ନ ସ୍ଲୋଗାନ ଦେଇ ଥାନା ଛକ ପର୍ଯ୍ୟନ୍ତ ଯାଇଥିଲା।
ଏହି ରାଲି କୁ ଖଡ଼ିଆଳ ତାଲୁକ ଆଇନ ସେବା ସମିତିର ଅଧ୍ୟକ୍ଷା ତଥା ବରିଷ୍ଠ ଦେୱାନୀ ଜଜ୍ ଇଶା ପତି, ଖଡ଼ିଆଳ ଏନଏସି ର କାର୍ଯ୍ୟନିର୍ବାହୀ ଅଧିକାରୀ ସ୍ଵାଧୀନ କେତନ ମହାରଣା , ଜିଲ୍ଲା ଶ୍ରମ ଅଧିକାରୀ ଓ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ପତାକା ଦେଖାଇ ଶୁଭାରମ୍ଭ କରିଥିଲେ।
ଶୋଭାଯାତ୍ରା ପରେ ଏକ ସ୍ୱତନ୍ତ୍ର ସଚେତନତା ଶିବିର ଅନୁଷ୍ଠିତ ହୋଇଥିଲା। ଏଥିରେ ଶିଶୁ ଶ୍ରମିକ ନିରୋଧ ଆଇନ, ଜାତୀୟ ଆଇନ ସେବା ପ୍ରାଧିକରଣ ର ‘ଆଶା ଯୋଜନା’ ଏବଂ ‘ସେବା ବନାମ ଭାରତ ସଂଘ (୨୦୨୪)’ ମାମଲାରେ ମାନ୍ୟବର ସର୍ବୋଚ୍ଚ ନ୍ୟାୟାଳୟ (ସୁପ୍ରିମକୋର୍ଟ) ପ୍ରଦାନ କରିଥିବା ଗୁରୁତ୍ଵପୂର୍ଣ୍ଣ ରାୟ ସମ୍ବନ୍ଧରେ ବିସ୍ତୃତ ଆଲୋଚନା କରାଯାଇଥିଲା।
ଅତିଥିଙ୍କ ପ୍ରମୁଖ ବକ୍ତବ୍ୟ :
ଉମି ଡାନିଏଲ (ଶ୍ରମିକ ଚାଲାଣ ବିଶେଷଜ୍ଞ) : ଆଭାସୀ ମାଧ୍ୟମରେ ଯୋଗଦେଇ ଜାତୀୟ ଓ ଆନ୍ତର୍ଜାତୀୟ ସ୍ତରରେ ଦାଦନ ଏବଂ ଶ୍ରମିକ ଚାଲାଣ ର ଭୟାବହତା ଉପରେ ନିଜର ବକ୍ତବ୍ୟ ରଖିଥିଲେ।
ନବନୀତା ଦାଶ (ସଚିବ, ଜିଲ୍ଲା ଆଇନ ସେବା ପ୍ରାଧିକରଣ) : ଶିଶୁମାନଙ୍କୁ ବିପଦପୂର୍ଣ୍ଣ କାର୍ଯ୍ୟକ୍ଷେତ୍ରରେ ନିୟୋଜିତ ନକରି ସେମାନଙ୍କ ଶିକ୍ଷା ଅଧିକାର ସୁରକ୍ଷିତ ରଖିବାକୁ ଆହ୍ୱାନ ଦେଇଥିଲେ। ଏଥିସହ ପ୍ରାଧିକରଣ ଦ୍ୱାରା ମିଳୁଥିବା ମାଗଣା ଆଇନ ସେବା ବିଷୟରେ ସୂଚନା ଦେଇଥିଲେ।
ରବୀନ୍ଦ୍ର ବାର୍ଲା (ବିଭାଗୀୟ ଶ୍ରମ ଆୟୁକ୍ତ) : ଆଇନ ଅନୁଯାୟୀ ବେଆଇନ ଭାବେ କାର୍ଯ୍ୟ କରୁଥିବା ଶିଶୁ ଶ୍ରମିକ ଙ୍କ ଉଦ୍ଧାର ଏବଂ ସେମାନଙ୍କ ର ସଠିକ୍ ଥଇଥାନ ପ୍ରକ୍ରିୟା ଉପରେ ଗୁରୁତ୍ୱାରୋପ କରିଥିଲେ।
ଆଲୋକ ତିୱାରୀ (ଅଧିବକ୍ତା, ଖଡ଼ିଆଳ ଓକିଲ ସଂଘ) : ସେବା ବନାମ ଭାରତ ସଂଘ (୨୦୨୪) ମାମଲାରେ କୋର୍ଟ ଙ୍କ ନିର୍ଦ୍ଦେଶାବଳୀ କୁ ସହଜ ଭାଷାରେ ବୁଝାଇଥିଲେ।

ଏହି ଶିବିରରେ ଖଡ଼ିଆଳ ବ୍ଲକ୍ ଅଧ୍ୟକ୍ଷା ପୁଷ୍ପାଞ୍ଜଳୀ ନନ୍ଦ, ଜିଲ୍ଲା ଶ୍ରମ ଅଧିକାରୀ ଜସ୍ମିନ୍ ସାହୁ, ସହକାରୀ ଶ୍ରମ ଅଧିକାରୀ ନିଖିଳ ଅଗ୍ରୱାଲ ଓ ମୁରଲୀଧର ପକଲ ଉପସ୍ଥିତ ଥିଲେ।
ଏଥିସହ ପୂର୍ବତନ ଶିଶୁ କଲ୍ୟାଣ ସମିତି ଅଧ୍ୟକ୍ଷ ଫଣିନ୍ଦମ୍ ସିଂହ ଦେଓ, ସଦସ୍ୟ ଗଙ୍ଗାଧର ପାଣିଗ୍ରାହୀ, ଶିଶୁ ହେଲ୍ପଲାଇନ ର ଜିଲ୍ଲା ସଂଯୋଜକ ରଞ୍ଜନ କୁମାର ସାହୁ, ଆଇଜେଏମ ଓ ଶ୍ରମବାହିନୀ ର ସୁରେନ୍ଦ୍ର ଛତ୍ରିଆ ଙ୍କ ସମେତ ବହୁ ସ୍ୱେଚ୍ଛାସେବୀ, ଛାତ୍ରଛାତ୍ରୀ ଏବଂ ପ୍ରାଧିକରଣ ର ଅଧିକାରମିତ୍ର ମାନେ ଯୋଗ ଦେଇ କାର୍ଯ୍ୟକ୍ରମକୁ ସଫଳ କରାଇଥିଲେ।
“ଶିଶୁ ଶ୍ରମିକ ପ୍ରଥାର ଉଚ୍ଛେଦ କରିବା ପ୍ରତ୍ୟେକ ନାଗରିକଙ୍କ ସାମାଜିକ ଓ ସାମ୍ବିଧାନିକ କର୍ତ୍ତବ୍ୟ” ବୋଲି ସଭାରେ ସମସ୍ତେ ଏକମତ ପ୍ରକାଶ କରିଥିଲେ।