ନୂଆପଡ଼ା ପ୍ରଶାସନର ମେଗା ଆକ୍ସନ : ଜିଲ୍ଲାବ୍ୟାପୀ ଚଢ଼ାଉ, ୧୦୦ କେଜିରୁ ଅଧିକ ନିଷିଦ୍ଧ ପ୍ଲାଷ୍ଟିକ ଜବତ।

ନୂଆପଡ଼ା -୧୪/୬ ପରିବେଶ ସୁରକ୍ଷା, ସ୍ୱଚ୍ଛତା ଏବଂ ପ୍ଲାଷ୍ଟିକ ମୁକ୍ତ ସମାଜ ଗଠନ ପାଇଁ ନୂଆପଡ଼ା ଜିଲ୍ଲା ପ୍ରଶାସନ ପକ୍ଷରୁ ଶନିବାର ଦିନ ଏକ ବଡ଼ଧରଣର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏକକ ବ୍ୟବହାରଯୋଗ୍ୟ ପ୍ଲାଷ୍ଟିକ ବିରୋଧରେ ଜିଲ୍ଲାପାଳ ମଧୁସୂଦନ ଦାଶଙ୍କ ପ୍ରତ୍ୟକ୍ଷ ନେତୃତ୍ୱରେ ବୋଡେନ ବଜାର ଏବଂ ପ୍ରସିଦ୍ଧ ଧାର୍ମିକ ପୀଠ ପାତାଳଗଙ୍ଗାରେ ବ୍ୟାପକ ଚଢ଼ାଉ କରାଯାଇଛି।
ବୋଡେନ ବଜାର ରେ ଚଢ଼ାଉ : ପ୍ଲାଷ୍ଟିକ ସହ ବେଆଇନ ମଦ ଜବତ- ଅଭିଯାନ ସମୟରେ ବିଭିନ୍ନ ଦୋକାନ, ହୋଟେଲ ଓ ବ୍ୟବସାୟିକ ପ୍ରତିଷ୍ଠାନରେ ଯାଞ୍ଚ କରାଯାଇ ୧୯.୫ କିଲୋଗ୍ରାମ ନିଷିଦ୍ଧ ପ୍ଲାଷ୍ଟିକ ଜବତ କରାଯିବା ସହ ନିୟମ ଉଲ୍ଲଂଘନକାରୀଙ୍କ ଠାରୁ ୫ ହଜାର ଟଙ୍କା ଜରିମାନା ଆଦାୟ କରାଯାଇଛି।
ବଡ଼ ଖବର : ଚଢ଼ାଉ ବେଳେ ବୋଡେନ ବଜାରର “ରାମ ଦଣ୍ଡସେନା ହୋଟେଲ”ରୁ ବେଆଇନ ଭାବେ ଗଚ୍ଛିତ ଅବକାରୀ ସାମଗ୍ରୀ (ମଦ) ଠାବ କରାଯାଇଛି। ଏହାକୁ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ପାଇଁ ବୋଡେନ ଅବକାରୀ ବିଭାଗକୁ ହସ୍ତାନ୍ତର କରାଯାଇଛି। ପ୍ରଶାସନର ଏହି ତତ୍ପରତାକୁ ସ୍ଥାନୀୟ ଲୋକେ ଉଚ୍ଚ ପ୍ରଶଂସା କରିଛନ୍ତି।

ଜିଲ୍ଲାବ୍ୟାପୀ ମେଗା ଡ୍ରାଇଭ୍‌ ର ରିପୋର୍ଟ କାର୍ଡ –
ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜିଲ୍ଲାବ୍ୟାପୀ ୮ ଟି ସ୍ୱଚ୍ଛ ଦଳ ସମସ୍ତ ବ୍ଲକ୍ ଓ ଏନ୍‌ଏସି ଅଞ୍ଚଳରେ ଏକକାଳୀନ ଚଢ଼ାଉ କରିଥିଲେ।ପ୍ରଶାସନ ର ଚେତାବନୀ କଡ଼ା : ଭବିଷ୍ୟତରେ ଯଦି କୌଣସି ପ୍ରତିଷ୍ଠାନ ନିଷିଦ୍ଧ ପ୍ଲାଷ୍ଟିକ ବ୍ୟବହାର କରନ୍ତି, ତେବେ ସେମାନଙ୍କର ବିଦ୍ୟୁତ୍ ଓ ଜଳ ସଂଯୋଗ ବିଚ୍ଛିନ୍ନ କରାଯିବା ସହ ଦୋକାନକୁ ସିଲ୍ କରାଯିବ।
ପାତାଳଗଙ୍ଗା ରେ ଜିଲ୍ଲାପାଳଙ୍କ ସରଳତା – ‘ବର୍ତ୍ତନ ବ୍ୟାଙ୍କ’ ଜରିଆରେ ସଚେତନତା ବାର୍ତ୍ତା
ପ୍ରସିଦ୍ଧ ପୀଠ ପାତାଳଗଙ୍ଗା ପରିସରରେ ଜିଲ୍ଲାପାଳ ମଧୁସୂଦନ ଦାଶଙ୍କ ଏକ ଭିନ୍ନ ରୂପ ଦେଖିବାକୁ ମିଳିଥିଲା। ସେ କୌଣସି ପ୍ରୋଟୋକଲ୍ ନରଖି ସାଧାରଣ ଲୋକଙ୍କ ସହ ତଳେ ବସି ପ୍ରଶାସନର ‘ବର୍ତ୍ତନ ବ୍ୟାଙ୍କ’ ଯୋଜନାର ଷ୍ଟିଲ୍ ବାସନରେ ପ୍ରସାଦ ସେବନ କରିଥିଲେ। ପ୍ଲାଷ୍ଟିକର ବିକଳ୍ପ ଭାବେ ପୁନଃବ୍ୟବହାରଯୋଗ୍ୟ ବାସନ କୁସନ ବ୍ୟବହାର କରିବାକୁ ସେ ଜନସାଧାରଣଙ୍କୁ ଆହ୍ୱାନ ଦେଇଛନ୍ତି। ଜିଲ୍ଲାପାଳଙ୍କ ଏହି ସରଳ ଓ ପରିବେଶବନ୍ଧବ ପଦକ୍ଷେପ ଶ୍ରଦ୍ଧାଳୁ ଓ ସ୍ଥାନୀୟ ଲୋକଙ୍କୁ ବେଶ୍ ପ୍ରଭାବିତ କରିଛି।
ଏହି ବ୍ୟାପକ ଚଢାଉରେ ବୋଡେନ ବିଡିଓ ଚିନ୍ମୟ ସାଗରଙ୍କ ସହ ଜିଲ୍ଲା ସ୍ୱଚ୍ଛ ଟିମ୍‌ର ଶିବ ପ୍ରସାଦ ସ୍ୱାଇଁ, ପାର୍ଥ ସାରଥୀ ଦୋରା, ହରେକୃଷ୍ଣ ହାଁସଦା, ଜିଲ୍ଲା ସଂଯୋଜକ ଅନିଲ ଲେଙ୍କା, ବ୍ଲକ ସଂଯୋଜକ ହେରମ୍ବ ବିଶ୍ୱାଳଙ୍କ ସମେତ ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀ ପ୍ରମୁଖ ସାମିଲ ହୋଇଥିଲେ।