ରବି ଧାନ ଅଧିଗ୍ରହଣ ଜୋରଦାର : ଦୁଇ ଦିନରେ ବିକ୍ରି ହେଲା ୪୦ ହଜାର କ୍ୱିଣ୍ଟାଲ୍‌ ରୁ ଅଧିକ ଧାନ, ଉପକୃତ ହେଲେଣି ୪ ହଜାରରୁ ଅଧିକ ଚାଷୀ।

ନୂଆପଡ଼ା -୧୪/୬ ନୂଆପଡ଼ା ଜିଲ୍ଲା ରେ ରବି ଧାନ ଅଧିଗ୍ରହଣ ପ୍ରକ୍ରିୟା ଏବେ ବେଶ୍ ସରଗରମ ହୋଇଛି। ଜିଲ୍ଲା ପ୍ରଶାସନ, ଯୋଗାଣ ବିଭାଗ ଏବଂ ସମବାୟ ସଂସ୍ଥାଗୁଡ଼ିକର ମିଳିତ ସମନ୍ୱୟ ତଥା ସୁପରିଚାଳନା ଯୋଗୁଁ ଚଳିତ ବର୍ଷ ଧାନ କ୍ରୟ କାର୍ଯ୍ୟକ୍ରମରେ ଏକ ଉଲ୍ଲେଖନୀୟ ସଫଳତା ଦେଖିବାକୁ ମିଳିଛି।
ବିଶେଷ କରି ଗତ ଦୁଇ ଦିନ ମଧ୍ୟରେ ଜିଲ୍ଲାରେ ଧାନ କ୍ରୟ ପ୍ରକ୍ରିୟା ବେଶ୍ ଦ୍ରୁତ ଗତିରେ ଆଗେଇ ଚାଲିଛି। ଜିଲ୍ଲାର ୩୮ ଟି କାର୍ଯ୍ୟରତ ପ୍ରାଥମିକ କ୍ରୟ କେନ୍ଦ୍ର (PPC) ମାଧ୍ୟମରେ ମୋଟ ୪୦,୧୬୫.୨୮ କ୍ୱିଣ୍ଟାଲ ଧାନ ସଂଗ୍ରହ କରାଯାଇଛି।
ଦୁଇ ଦିନର ସ୍ଥିତି ଓ ଚାଷୀଙ୍କ ଅଂଶଗ୍ରହଣ :
୧୨ ଜୁନ୍ ୨୦୨୬:- ୪୦୧ ଜଣ ଚାଷୀଙ୍କଠାରୁ ୨୦,୧୦ କ୍ୱିଣ୍ଟାଲଧାନ କ୍ରୟ।
୧୩ ଜୁନ୍ ୨୦୨୬:- ୩୮୦ ଜଣ ଚାଷୀଙ୍କଠାରୁ ୨୦,୦୬୦.୨୮ କ୍ୱିଣ୍ଟାଲ ଧାନ କ୍ରୟ।
ସମୁଦାୟ:- ମାତ୍ର ୪୮ ଘଣ୍ଟା ମଧ୍ୟରେ ଜିଲ୍ଲାର ମୋଟ ୭୮୧ ଜଣ ଚାଷୀ ସଫଳତାର ସହ ନିଜ ଧାନ ବିକ୍ରି କରିଛନ୍ତି।ରିପୋର୍ଟ ଅନୁଯାୟୀ, ଚଳିତ ରବି ଧାନ କ୍ରୟ ଋତୁରେ ଜିଲ୍ଲାର ମୋଟ ୫୧ ଟି ପ୍ରାଥମିକ କ୍ରୟ କେନ୍ଦ୍ର ମଧ୍ୟରୁ ବର୍ତ୍ତମାନ ସୁଦ୍ଧା ୩୮ ଟି କେନ୍ଦ୍ର ସମ୍ପୂର୍ଣ୍ଣ କାର୍ଯ୍ୟକ୍ଷମ ରହିଛି। ଏହି କେନ୍ଦ୍ର ଗୁଡ଼ିକ ଜରିଆରେ ଏପର୍ଯ୍ୟନ୍ତ ସମୁଦାୟ ୨,୧୨,୦୬୩.୮୦ କ୍ୱିଣ୍ଟାଲ ଧାନ କ୍ରୟ କରାଯାଇ ସାରିଲାଣି। ଏହାଦ୍ୱାରା ଜିଲ୍ଲାର ପ୍ରାୟ ୪,୧୨୧ ଜଣ ଚାଷୀ ସରକାରୀ ସହାୟକ ମୂଲ୍ୟ (MSP) ପାଇ ସିଧାସଳଖ ଉପକୃତ ହୋଇଛନ୍ତି।
ପ୍ରଶାସନିକ ପ୍ରତିଶ୍ରୁତି:- “ଜିଲ୍ଲାରେ ଧାନ କ୍ରୟ ପ୍ରକ୍ରିୟାକୁ ସମ୍ପୂର୍ଣ୍ଣ ସ୍ୱଚ୍ଛ, ସୁବ୍ୟବସ୍ଥିତ ଏବଂ ଚାଷୀ-ଅନୁକୂଳ କରିବା ପାଇଁ ଜିଲ୍ଲା ପ୍ରଶାସନ ପ୍ରତିବଦ୍ଧ। ଚାଷୀମାନେ ଯେପରି କୌଣସି ଅସୁବିଧାର ସମ୍ମୁଖୀନ ନହୋଇ ନିର୍ବିଘ୍ନ ରେ ଧାନ ବିକ୍ରି କରିପାରିବେ ଏବଂ ଠିକ୍ ସମୟରେ ସେମାନଙ୍କର ପ୍ରାପ୍ୟ ଅର୍ଥ ସେମାନଙ୍କ ବ୍ୟାଙ୍କ ଆକାଉଣ୍ଟ କୁ ଯିବ, ସେଥିପାଇଁ ସମସ୍ତ ସମ୍ପୃକ୍ତ ବିଭାଗ କୁ ସତର୍କ ଓ ଗତିଶୀଳ ରହିବାକୁ ନିର୍ଦ୍ଦେଶ ଦିଆଯାଇଛି।”
ଚାଷୀମାନଙ୍କ ମଧ୍ୟରେ ଏହି ସ୍ୱଚ୍ଛ ପ୍ରକ୍ରିୟାକୁ ନେଇ ସନ୍ତୋଷ ପ୍ରକାଶ ପାଇଥିବା ବେଳେ, ଆଗାମୀ ଦିନରେ ବାକି ରହିଥିବା କେନ୍ଦ୍ରଗୁଡ଼ିକ ରେ ମଧ୍ୟ ପ୍ରକ୍ରିୟାକୁ ଆହୁରି ବ୍ୟାପକ କରାଯିବ ବୋଲି ସୂଚନା ମିଳିଛି।