44
ନୂଆପଡ଼ା- ୦୧/୦୮- ଚଳିତ ବନ୍ୟା ଯୋଗୁଁ ଚାଷଜମି ଓ ଫସଲରେ ହୋଇଥିବା ବିଭିନ୍ନ ସମସ୍ୟାର ତ୍ୱରିତ ପ୍ରତିକାର ଏବଂ କୃଷକମାନଙ୍କୁ ବୈଜ୍ଞାନିକ ପରାମର୍ଶ ପ୍ରଦାନ କରିବା ଉଦ୍ଦେଶ୍ୟରେ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ‘କୃଷି ସମୃଦ୍ଧି ହେଲ୍ପଲାଇନ୍’ ଆରମ୍ଭ କରାଯାଇଛି। ବନ୍ୟା ପ୍ରଭାବିତ କୃଷକମାନେ ଟୋଲ୍-ଫ୍ରି ନମ୍ବର ୧୫୫୩୩୩ରେ ଯୋଗାଯୋଗ କରି ବିଭିନ୍ନ କୃଷି ସମସ୍ୟାର ସମାଧାନ ସହ ବିଶେଷଜ୍ଞଙ୍କଠାରୁ ବୈଷୟିକ ପରାମର୍ଶ ପାଇପାରିବେ।
ଏହି ହେଲ୍ପଲାଇନ୍ ମାଧ୍ୟମରେ କୃଷକମାନଙ୍କୁ ବନ୍ୟା ପରବର୍ତ୍ତୀ ଫସଲ ପରିଚାଳନା, ରୋଗ ଓ ପୋକ ଦମନ ସମ୍ବନ୍ଧୀୟ ବୈଜ୍ଞାନିକ ପରାମର୍ଶ ପ୍ରଦାନ କରାଯିବ। କୃଷକମାନଙ୍କ ବିଭିନ୍ନ ପ୍ରଶ୍ନର ସମାଧାନ କରାଯିବା ସହ ବନ୍ୟା ପ୍ରଭାବିତ କୃଷକଙ୍କ ପାଇଁ ସରକାରଙ୍କ ପକ୍ଷରୁ ଗ୍ରହଣ କରାଯାଉଥିବା ସହାୟତା ଓ ସହଯୋଗମୂଳକ ପଦକ୍ଷେପ ସମ୍ପର୍କରେ ମଧ୍ୟ ସୂଚନା ପ୍ରଦାନ କରାଯିବ।କୃଷି ସମୃଦ୍ଧି ହେଲ୍ପଲାଇନ୍ ପ୍ରତିଦିନ ସକାଳ ୮ ଘଟିକାରୁ ସନ୍ଧ୍ୟା ୮ ଘଟିକା ପର୍ଯ୍ୟନ୍ତ କାର୍ଯ୍ୟକ୍ଷମ ରହିବ। ଜିଲ୍ଲାର ସମସ୍ତ କୃଷକଙ୍କୁ ଏହି ସମୟ ମଧ୍ୟରେ ୧୫୫୩୩୩ ଟୋଲ୍-ଫ୍ରି ନମ୍ବରରେ ନିଶୁଳ୍କ ଭାବେ ଯୋଗାଯୋଗ କରି ଏହି ସେବାର ସୁବିଧା ନେଇ ପାରବେl
ଫସଲର ସୁରକ୍ଷା ଏବଂ ଚାଷଜନିତ ସମସ୍ୟାର ସମାଧାନ ପାଇଁ କୃଷକମାନେ ‘କୃଷି ସମୃଦ୍ଧି ହେଲ୍ପଲାଇନ୍’ର ସର୍ବାଧିକ ସଦୁପଯୋଗ କରିବାକୁ ଜିଲ୍ଲା ପ୍ରଶାସନ ପକ୍ଷରୁ ଅନୁରୋଧ କରାଯାଇଛି।
