ବନ୍ୟା ବିପର୍ଯ୍ୟୟ ପରେ ନୂଆପଡ଼ା ପାଇଁ ସ୍ୱତନ୍ତ୍ର ଆର୍ଥିକ ପ୍ୟାକେଜ୍ ଦାବି : ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଓ ଏସଆରସିଙ୍କୁ ବିଧାୟକ ଜୟ ଢୋଳକିଆଙ୍କ ପତ୍ର।

ନୂଆପଡ଼ା -୩୧/୦୭- ଗତ ୨୮ ଓ ୨୯ ଜୁଲାଇ ରେ ଲଗାଣ ବର୍ଷା ଓ ଗଭୀର ଅବପାତ ପ୍ରଭାବରେ ନୂଆପଡ଼ା ଜିଲ୍ଲାର ବିଭିନ୍ନ ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟିଛି। ପ୍ରବଳ ବର୍ଷା ଯୋଗୁଁ ବହୁ ଗ୍ରାମୀଣ ରାସ୍ତା, ପୋଲ, କଲଭର୍ଟ ଓ ସୁରକ୍ଷା ବନ୍ଧ ଗୁରୁତର ଭାବେ କ୍ଷତିଗ୍ରସ୍ତ ହୋଇଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଏହାର ପ୍ରଭାବରେ ହଜାର ହଜାର ଲୋକ ଯାତାୟାତ, ସ୍ୱାସ୍ଥ୍ୟସେବା, ଶିକ୍ଷା ଓ ଦୈନନ୍ଦିନ ଜୀବନରେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି।
ଏହି ଗୁରୁତର ପରିସ୍ଥିତିକୁ ଦୃଷ୍ଟିରେ ରଖି ନୂଆପଡ଼ା ବିଧାୟକ ତଥା ଜିଲ୍ଲା ଯୋଜନା କମିଟିର ଅଧ୍ୟକ୍ଷ ଜୟ ଢୋଳକିଆ ଓଡ଼ିଶାର ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଏବଂ ସ୍ୱତନ୍ତ୍ର ରିଲିଫ କମିଶନର (ଏସଆରସି) ଙ୍କୁ ପୃଥକ ପୃଥକ ପତ୍ର ଲେଖି ନୂଆପଡ଼ା ଜିଲ୍ଲାରେ ବନ୍ୟା କ୍ଷତିଗ୍ରସ୍ତ ସମସ୍ତ ଗ୍ରାମୀଣ ରାସ୍ତା, ପୋଲ ଓ କଲଭର୍ଟର ତୁରନ୍ତ ପୁନରୁଦ୍ଧାର ପାଇଁ ସ୍ୱତନ୍ତ୍ର ଆର୍ଥିକ ପ୍ୟାକେଜ୍ ମଞ୍ଜୁର କରିବାକୁ ଦୃଢ଼ ଦାବି ଜଣାଇଛନ୍ତି।
ବିଧାୟକ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ଯେ, ନୂଆପଡ଼ା ବ୍ଲକରେ ୧୬୪.୮ ମି.ମି. ଏବଂ କୋମନା ବ୍ଲକରେ ୧୩୦ ମି.ମି. ବର୍ଷା ରେକର୍ଡ ହୋଇଥିବାରୁ ଅନେକ ଗୁରୁତ୍ୱପୂର୍ଣ୍ଣ ଗ୍ରାମୀଣ ସଡ଼କ, କଲଭର୍ଟ, ବନ୍ଧ ଓ ସୁରକ୍ଷା ବ୍ୟବସ୍ଥା ଭାଙ୍ଗିଯାଇଛି। ବହୁ ସ୍ଥାନରେ ରାସ୍ତା ସମ୍ପୂର୍ଣ୍ଣ ବିଚ୍ଛିନ୍ନ ହୋଇଥିବା ସହ ଯାତାୟାତ ଠପ୍ ହୋଇପଡ଼ିଛି।
ଏହାର ପ୍ରଭାବ ସବୁଠାରୁ ଅଧିକ ଚାଷୀ, ଛାତ୍ରଛାତ୍ରୀ, ରୋଗୀ, ଦୈନିକ ଯାତ୍ରୀ ଓ ଗ୍ରାମବାସୀଙ୍କ ଉପରେ ପଡ଼ିଛି। ହସ୍ପିଟାଲ, ବିଦ୍ୟାଳୟ, ବଜାର, କୃଷି କ୍ଷେତ୍ର ଓ ବ୍ଲକ ମୁଖ୍ୟାଳୟ କୁ ସଂଯୋଗ କରୁଥିବା ରାସ୍ତା କ୍ଷତିଗ୍ରସ୍ତ ହେବାରୁ ଜରୁରୀ ସେବା ମଧ୍ୟ ପ୍ରଭାବିତ ହୋଇଛି।
ବିଧାୟକଙ୍କ ପ୍ରମୁଖ ଦାବି ଗୁଡ଼ିକ ହେଲା,
ବନ୍ୟାରେ କ୍ଷତିଗ୍ରସ୍ତ ସମସ୍ତ ଗ୍ରାମୀଣ ରାସ୍ତା, ପୋଲ ଓ କଲଭର୍ଟର ତୁରନ୍ତ ପୁନରୁଦ୍ଧାର ପାଇଁ ସ୍ୱତନ୍ତ୍ର ଆର୍ଥିକ ପ୍ୟାକେଜ୍ ମଞ୍ଜୁର କରାଯାଉ। ପୁନରୁଦ୍ଧାର କାର୍ଯ୍ୟ ତ୍ୱରାନ୍ୱିତ କରିବା ପାଇଁ ଜରୁରୀକାଳୀନ ପାଣ୍ଠି ଶୀଘ୍ର ମୁକ୍ତ କରାଯାଉ।
ପ୍ରକୃତ କ୍ଷୟକ୍ଷତିର ଆକଳନ ପାଇଁ ଉଚ୍ଚସ୍ତରୀୟ ବୈଷୟିକ ଦଳ ଗଠନ କରାଯାଉ।
ପୁନର୍ନିର୍ମାଣ କାର୍ଯ୍ୟ ପାଇଁ ସମସ୍ତ ପ୍ରଶାସନିକ ଓ ଆର୍ଥିକ ଅନୁମୋଦନ ଶୀଘ୍ର ପ୍ରଦାନ କରାଯାଉ।
ହସ୍ପିଟାଲ, ବିଦ୍ୟାଳୟ, ବଜାର, କୃଷି କ୍ଷେତ୍ର ଓ ବ୍ଲକ ମୁଖ୍ୟାଳୟ ସହ ସଂଯୋଗ କରୁଥିବା ସମସ୍ତ ଗୁରୁତ୍ୱପୂର୍ଣ୍ଣ ରାସ୍ତାକୁ ଯୁଦ୍ଧକାଳୀନ ଭିତ୍ତିରେ ପୁନରୁଦ୍ଧାର କରାଯାଉ।
ବିଧାୟକ ଶ୍ରୀ ଢୋଳକିଆ କହିଛନ୍ତି ଯେ, ନୂଆପଡ଼ାବାସୀଙ୍କ ସୁରକ୍ଷା, ସୁବିଧା ଓ କଲ୍ୟାଣ ତାଙ୍କର ସର୍ବୋଚ୍ଚ ପ୍ରାଥମିକତା। ଏହି ବିପଦ ସମୟରେ ସେ ଜିଲ୍ଲାବାସୀଙ୍କ ସହ ସଦା ଛିଡ଼ା ହୋଇ ରହିବେ ଏବଂ କ୍ଷତିଗ୍ରସ୍ତ ରାସ୍ତା, ପୋଲ ଓ କଲଭର୍ଟର ଶୀଘ୍ର ପୁନରୁଦ୍ଧାର ପାଇଁ ସରକାରଙ୍କ ନିକଟରେ ନିରନ୍ତର ପ୍ରୟାସ ଜାରି ରଖିବେ।
ସେ ଆହୁରି କହିଛନ୍ତି, “ନୂଆପଡ଼ାର ଦୁଃଖ ହେଉଛି ମୋର ଦୁଃଖ। ଜିଲ୍ଲାବାସୀଙ୍କ ସେବା ଓ ବିକାଶ ପାଇଁ ମୁଁ ସଦା ସମର୍ପିତ ରହିବି।”