ନୂଆପଡ଼ା ରେ ‘ବେଟି ବଚାଓ, ବେଟି ପଢ଼ାଓ’ ଓ ଅନ୍ତର୍ଜାତୀୟ ଯୁବ ଦିବସ ପାଳିତ: ସାଇବର ସୁରକ୍ଷା ଓ ଡିଜିଟାଲ ସାକ୍ଷରତା ଉପରେ ଜିଲ୍ଲାସ୍ତରୀୟ କର୍ମଶାଳା।

ନୂଆପଡ଼ା -୧୨/୦୮-ନୂଆପଡ଼ା ଜିଲ୍ଲା ମହିଳା ସଶକ୍ତିକରଣ କେନ୍ଦ୍ର ପକ୍ଷରୁ ‘ବେଟି ବଚାଓ, ବେଟି ପଢ଼ାଓ’ ଯୋଜନା ଅଧୀନରେ ଏକ ଜିଲ୍ଲାସ୍ତରୀୟ କର୍ମଶାଳା ଏବଂ ଅନ୍ତର୍ଜାତୀୟ ଯୁବ ଦିବସ ସ୍ଥାନୀୟ ସଦଭାବନା ସଭାଗୃହରେ ଆଡ଼ମ୍ବର ସହକାରେ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ଡିଜିଟାଲ ଓ ଆର୍ଥିକ ସାକ୍ଷରତା, ସାମାଜିକ, ଅର୍ଥନୈତିକ ଓ ରାଜନୈତିକ ଅଧିକାର ଏବଂ ସାଇବର ସୁରକ୍ଷା ସମ୍ବନ୍ଧରେ ବ୍ୟାପକ ଆଲୋଚନା କରାଯାଇଥିଲା।
🔷 ସାଇବର ସଚେତନତା:
କାର୍ଯ୍ୟକ୍ରମକୁ ଉଦ୍‌ଘାଟନ କରି ଜିଲ୍ଲାପାଳ ମଧୁସୁଦନ ଦାଶ ସାଇବର ଠକେଇ ପ୍ରତି ସତର୍କ ରହିବା ସହ ଡିଜିଟାଲ ମାଧ୍ୟମର ସୁରକ୍ଷିତ ବ୍ୟବହାର ଉପରେ ଗୁରୁତ୍ୱାରୋପ କରିଥିଲେ। ଠକେଇର ଶିକାର ହେଲେ ତୁରନ୍ତ ହେଲ୍ପଲାଇନ୍ ନମ୍ବର ୧୯୩୦ କିମ୍ବା ଜାତୀୟ ସାଇବର କ୍ରାଇମ୍ ରିପୋର୍ଟିଂ ପୋର୍ଟାଲରେ ଅଭିଯୋଗ କରିବାକୁ ସେ ଆହ୍ୱାନ ଦେଇଥିଲେ।
🔷 ଯୁବ ଶକ୍ତି ଓ ସ୍ୱାମୀ ବିବେକାନନ୍ଦଙ୍କ ଆଦର୍ଶ :
ଅନ୍ତର୍ଜାତୀୟ ଯୁବ ଦିବସ ଅବସରରେ ଜିଲ୍ଲାପାଳ ଯୁବପିଢ଼ିଙ୍କୁ ସ୍ୱାମୀ ବିବେକାନନ୍ଦଙ୍କ ଆଦର୍ଶରେ ଅନୁପ୍ରାଣିତ ହୋଇ ନିଜର ଶକ୍ତି, ପ୍ରତିଭା ଓ ଦକ୍ଷତାକୁ ଦେଶ ଗଠନରେ ବିନିଯୋଗ କରିବାକୁ ପରାମର୍ଶ ଦେଇଥିଲେ।
🔷 ମହିଳା ସଶକ୍ତିକରଣ ଓ ଡିଜିଟାଲ୍ ସୁରକ୍ଷା:
ଜିଲ୍ଲା ସମାଜ ମଙ୍ଗଳ ଅଧିକାରୀ ପ୍ରେମଲତା ସେଠୀ ଅତିଥି ପରିଚୟ ପ୍ରଦାନ କରି ମହିଳା ଓ କିଶୋରୀମାନଙ୍କୁ ଆର୍ଥିକ ଓ ଡିଜିଟାଲ୍ ସାକ୍ଷର କରିବା ଏବଂ ଅନଲାଇନ୍ ଜଗତରେ ସୁରକ୍ଷିତ ରଖିବା ଏହି କର୍ମଶାଳାର ମୁଖ୍ୟ ଲକ୍ଷ୍ୟ ବୋଲି ପ୍ରକାଶ କରିଥିଲେ।
🔷 ସୋସିଆଲ ମିଡିଆ ଓ ଆଇନଗତ ସୁରକ୍ଷା ସମ୍ପର୍କିତ ପରାମର୍ଶ :
କର୍ମଶାଳାରେ ଫିସିଂ, ସୋସିଆଲ ମିଡିଆର ଦୁରୁପଯୋଗ, ଡିଜିଟାଲ ବୁଲିଂ ଏବଂ ଆଇନଗତ ବ୍ୟବସ୍ଥା ଉପରେ ସମ୍ପଦ ବ୍ୟକ୍ତିମାନେ ବିସ୍ତୃତ ଆଲୋଚନା କରିଥିଲେ। ମୁଖ୍ୟ ପରାମର୍ଶ: ୧. ବ୍ୟକ୍ତିଗତ ତଥ୍ୟର ଗୋପନୀୟତା ରକ୍ଷା କରିବା। ୨. ଶକ୍ତିଶାଳୀ ପାସୱାର୍ଡ ବ୍ୟବହାର କରିବା। ୩. ଅଜଣା ଲିଙ୍କ୍, କଲ୍ ଓ ମେସେଜ୍‌ ରୁ ଦୂରେଇ ରହିବା।
‘ବେଟି ବଚାଓ, ବେଟି ପଢ଼ାଓ’ ଯୋଜନା ଅଧୀନରେ ମେଧାବୀ ଛାତ୍ରୀମାନଙ୍କୁ ‘ଗର୍ଲ ଚାମ୍ପିୟନ’ ଭାବେ ମାନପତ୍ର ଓ ନଗଦ ପୁରସ୍କାର ଦେଇ ସମ୍ମାନିତ କରାଯାଇଥିଲା :🔷 ପ୍ରତୀକ୍ଷା କୁମ୍ଭାର (କେନ୍ଦ୍ରୀୟ ବିଦ୍ୟାଳୟ, ନୂଆପଡ଼ା)
🔷 କରିଶ୍ମା ଶବର (ଏସ୍‌ଏସ୍‌ଡି ଗର୍ଲ୍ସ ହାଇସ୍କୁଲ)
🔷 ରୂପାଲୀ ଶବର (ଏକଲବ୍ୟ ମଡେଲ ଆଦର୍ଶ ବିଦ୍ୟାଳୟ)

ଏହି କାର୍ଯ୍ୟକ୍ରମରେ ଡିଏଲ୍‌ଏସ୍‌ଏ ସଚିବ ନବନୀତା ଦାସ, ଜିଲ୍ଲା ସୂଚନା ବିଜ୍ଞାନ କେନ୍ଦ୍ର ଅଧିକାରୀ ବିନୟ ତିୱାରୀ, ସାଇବର ଥାନା ଆଇଆଇସି ଦିଲୀପ ସାହୁ, ଏସ୍‌ଆଇ ଚନ୍ଦ୍ରକାନ୍ତ ବାରିକ ଏବଂ ଏସ୍‌ବିଆଇ ଆର୍‌ସେଟିର ସୁଧାକର ଶତପଥି ପ୍ରମୁଖ ବକ୍ତା ଭାବେ ଯୋଗଦେଇଥିଲେ।
ଏଥିସହ ସମସ୍ତ ବିଡିଓ, ବିଇଓ, ସିଡିପିଓ, ଶିକ୍ଷକ-ଶିକ୍ଷୟିତ୍ରୀ, ସ୍ୱୟଂ ସହାୟକ ଦଳ ସଦସ୍ୟା ଓ ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିଲେ। ଜିଲ୍ଲା ମିଶନ ସଂଯୋଜକ ଆଶିଷ ରଞ୍ଜନ ଖମାରୀ ଓ ତାଙ୍କ ଟିମ୍ କାର୍ଯ୍ୟକ୍ରମ ପରିଚାଳନା କରିଥିବା ବେଳେ ଶେଷରେ ସୁରକ୍ଷା ଅଧିକାରୀ ମଞ୍ଜୁଲତା ଶୁକ୍ଳ ଧନ୍ୟବାଦ ଅର୍ପଣ କରିଥିଲେ।