ନୂଆପଡ଼ା ବ୍ଲକ ବିଦ୍ୟାଳୟ କ୍ରୀଡ଼ା ସଂଗଠନର ସାଧାରଣ ବୈଠକ : କ୍ରୀଡ଼ା ପ୍ରତିଭାଙ୍କୁ ଆଗେଇ ନେବାକୁ ଗୁରୁତ୍ୱ।

ନୂଆପଡ଼ା -୧୨/୮- ନୂଆପଡ଼ା ବ୍ଲକ ବିଦ୍ୟାଳୟ କ୍ରୀଡ଼ା ସଂଗଠନର ସାଧାରଣ ବୈଠକ ବୁଧବାର ବାଳିକା ଉଚ୍ଚ ବିଦ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି। ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପ୍ରଜ୍ଞା ପରମିତା ବିଶ୍ୱାଳଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଡ. ରେଶମ ଲାଲ ନାଏକ ମୁଖ୍ୟ ଅତିଥି ଭାବେ ଯୋଗଦେଇଥିଲେ।ବୈଠକରେ ଜିଲ୍ଲା ଶାରୀରିକ ଶିକ୍ଷା ଅଧିକାରୀ ରତନ ସିଂ ବାରିକ, ପିଏମ୍ ଶ୍ରୀ ବାଳିକା ଉଚ୍ଚ ବିଦ୍ୟାଳୟ, ଖରିଆର ରୋଡ଼ର ପ୍ରଧାନ ଶିକ୍ଷକ ପ୍ରବୋଧ ହୋତା, ପିଏମ୍ ଶ୍ରୀ ନେସନାଲ ଉଚ୍ଚ ବିଦ୍ୟାଳୟ, ନୂଆପଡ଼ାର ପ୍ରଧାନ ଶିକ୍ଷକ ଗୋଲାପ ସାହୁ, ପିଏମ୍ ଶ୍ରୀ ଗୋପବନ୍ଧୁ ଉଚ୍ଚ ବିଦ୍ୟାଳୟ, ଖରିଆର ରୋଡ଼ର ପ୍ରଧାନ ଶିକ୍ଷକ ଦୀନବନ୍ଧୁ ଦାସ ଏବଂ କଣାଭଏଁରା ଉଚ୍ଚ ବିଦ୍ୟାଳୟ, ଟାନୱାଟର ପ୍ରଧାନ ଶିକ୍ଷକ ବିନୋଦ ପାଢ଼ୀ ପ୍ରମୁଖ ସମ୍ମାନିତ ଅତିଥି ଭାବେ ମଞ୍ଚାସୀନ ଥିଲେ।ନୂଆପଡ଼ା ବ୍ଲକ ବିଦ୍ୟାଳୟ କ୍ରୀଡ଼ା ସଂଗଠନର ସମ୍ପାଦକ ମହତାବ ଆଡଯୁଆଡ଼ ଗତବର୍ଷ ଜିଲ୍ଲା, ରାଜ୍ୟ ଓ ଜାତୀୟସ୍ତରରେ ବିଦ୍ୟାଳୟଗୁଡ଼ିକ ହାସଲ କରିଥିବା କ୍ରୀଡ଼ା ସଫଳତା ସମ୍ପର୍କରେ ବିସ୍ତୃତ ତଥ୍ୟ ଉପସ୍ଥାପନ କରିଥିଲେ। ଏଥିସହ ଚଳିତ ବର୍ଷ ହେବାକୁ ଥିବା ବିଭିନ୍ନ କ୍ରୀଡ଼ା ପ୍ରତିଯୋଗିତାର ନୀତିନିୟମ ଓ ଅଂଶଗ୍ରହଣ ପାଇଁ ଆବଶ୍ୟକ କାଗଜପତ୍ର ସମ୍ପର୍କରେ ସମସ୍ତଙ୍କୁ ଅବଗତ କରାଯାଇଥିଲା।

ଜିଲ୍ଲା ଶାରୀରିକ ଶିକ୍ଷା ଅଧିକାରୀ ରତନ ସିଂ ବାରିକ ଜିଲ୍ଲା ଓ ରାଜ୍ୟସ୍ତରୀୟ ବିଭିନ୍ନ କ୍ରୀଡ଼ାର ଖେଳସୂଚୀ ସମ୍ପର୍କରେ ସୂଚନା ଦେଇଥିଲେ। ଚଳିତ ବର୍ଷ ନୂଆପଡ଼ା ଜିଲ୍ଲାର କ୍ରୀଡ଼ାବିତ୍‌ମାନେ ରାଜ୍ୟସ୍ତରରେ ଉତ୍ତମ ପ୍ରଦର୍ଶନ କରି ଜିଲ୍ଲାର ଗୌରବ ବଢ଼ାଇବେ ବୋଲି ସେ ଆଶା ପ୍ରକାଶ କରିଥିଲେ।

ମୁଖ୍ୟ ଅତିଥି ଡ. ରେଶମ ଲାଲ ନାଏକ ତାଙ୍କ ଦିଗ୍‌ଦର୍ଶନରେ ପ୍ରତ୍ୟେକ ବିଦ୍ୟାଳୟରୁ ୧୪ ବର୍ଷ ଓ ୧୭ ବର୍ଷରୁ କମ୍ ବୟସର ବାଳକ ଓ ବାଳିକାମାନଙ୍କୁ ସକ୍ରିୟ ଭାବେ କ୍ରୀଡ଼ାରେ ଅଂଶଗ୍ରହଣ କରାଇବା ଉପରେ ଗୁରୁତ୍ୱାରୋପ କରିଥିଲେ। ଏଥିସହ ଜନ୍ମ ପ୍ରମାଣପତ୍ର ସମେତ ଆବଶ୍ୟକ ଦସ୍ତାବିଜ୍‌ପତ୍ର ପ୍ରସ୍ତୁତ ରଖିବା ନେଇ ମଧ୍ୟ ସେ ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଥିଲେ।ଆଞ୍ଚଳିକ ସାଧନ କର୍ମୀ, ଜୋନାଲ ସଭାପତି ଓ ସମ୍ପାଦକମାନଙ୍କୁ ଜୋନାଲସ୍ତରୀୟ ସମସ୍ତ ପ୍ରତିଯୋଗିତା ଶୃଙ୍ଖଳିତ ଓ ସଫଳତାର ସହ ଆୟୋଜନ କରିବା ପାଇଁ ମାର୍ଗଦର୍ଶନ ଦିଆଯାଇଥିଲା।

ବୈଠକରେ ସମସ୍ତଙ୍କ ସହ ଆଲୋଚନା ଓ ସହମତିକ୍ରମେ ବ୍ଲକସ୍ତରୀୟ ବିଭିନ୍ନ କ୍ରୀଡ଼ା କାର୍ଯ୍ୟକ୍ରମର ସ୍ଥାନ, ସମୟ ଓ ଖେଳସୂଚୀର ଖସଡ଼ା ଚୂଡ଼ାନ୍ତ କରାଯାଇଥିଲା।ଏହି କାର୍ଯ୍ୟକ୍ରମରେ ବ୍ଲକ ଅଧୀନ ସମସ୍ତ ବିଦ୍ୟାଳୟର ପ୍ରଧାନ ଶିକ୍ଷକ/ଶିକ୍ଷୟିତ୍ରୀ, ଶିକ୍ଷକ, ଖେଳ ଶିକ୍ଷକ ଓ ଆଞ୍ଚଳିକ ସାଧନ କର୍ମୀମାନେ ବହୁ ସଂଖ୍ୟାରେ ଯୋଗଦେଇଥିଲେ। ଶୋଭା ରମ ରାଉତ ମଞ୍ଚ ପରିଚାଳନା କରିଥିଲେ।