Table of Contents
ନୂଆପଡ଼ା -୧୨/୦୮ – ଚଳିତ ଖରିଫ-୨୦୨୬ ଋତୁରେ ନୂଆପଡ଼ା ଜିଲ୍ଲାର କୃଷକମାନଙ୍କୁ ଆବଶ୍ୟକ କୃଷି ସାମଗ୍ରୀର ସୁବ୍ୟବସ୍ଥିତ ଯୋଗାଣ ଏବଂ ବିଭିନ୍ନ କୃଷି ଯୋଜନାର ସଫଳ ରୂପାୟଣ ନେଇ ଜିଲ୍ଲାସ୍ତରୀୟ କୃଷି ରଣନୀତି (Kharif Strategy) କମିଟି ବୈଠକ ଅନୁଷ୍ଠିତ ହୋଇଛି। ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଜିଲ୍ଲା ମୁଖ୍ୟାଳୟ ସମ୍ମିଳନୀ କକ୍ଷରେ ଏହି ବୈଠକ ହୋଇଥିଲା।
ବୈଠକରେ ଜିଲ୍ଲା ମୁଖ୍ୟ କୃଷି ଅଧିକାରୀ ପ୍ରଣତିରାଣୀ ପ୍ରଧାନ ଜିଲ୍ଲାରେ ଚାଲୁଥିବା କୃଷି ଯୋଜନା, ବିଭିନ୍ନ କାର୍ଯ୍ୟକଳାପ ଏବଂ ଚଳିତ ଖରିଫ ଋତୁ ପାଇଁ ପ୍ରସ୍ତୁତ କୃଷି ରଣନୀତି ସମ୍ପର୍କରେ ବିସ୍ତୃତ ତଥ୍ୟ ଉପସ୍ଥାପନ କରିଥିଲେ। ଏହାସହ ଉଦ୍ୟାନ କୃଷି ବିଭାଗର ସହକାରୀ ନିର୍ଦ୍ଦେଶକ, କୃଷି ବିଜ୍ଞାନ କେନ୍ଦ୍ରର ବରିଷ୍ଠ ବୈଜ୍ଞାନିକ ତଥା ମୁଖ୍ୟ ଏବଂ ପିଡି, ୱାଟରସେଡ୍ ନିଜ ନିଜ ବିଭାଗର କାର୍ଯ୍ୟସୂଚୀ ଓ ଖରିଫ କାର୍ଯ୍ୟଯୋଜନା ସମ୍ପର୍କରେ ଅବଗତ କରାଇଥିଲେ।
ବୈଠକରେ ଜିଲ୍ଲାପାଳ ସାରର ସୁବ୍ୟବସ୍ଥିତ ବିତରଣ ଏବଂ ନିୟମାନୁପାଳନ ସୁନିଶ୍ଚିତ କରିବାକୁ ଗୁରୁତ୍ୱ ଦେଇଥିଲେ। ହୋଲସେଲରମାନଙ୍କ ବିକ୍ରୟ ବିବରଣୀକୁ ସମ୍ପୃକ୍ତ ରିଟେଲରଙ୍କ ପ୍ରକୃତ ଷ୍ଟକ୍ ସହ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି। ବିକ୍ରୟ ରେକର୍ଡ ଓ ପ୍ରକୃତ ଷ୍ଟକ୍ ମଧ୍ୟରେ ଅସଙ୍ଗତି ମିଳିଲେ ତୁରନ୍ତ ନିୟମାନୁସାରେ କାର୍ଯ୍ୟାନୁଷ୍ଠାନ ହେବ।ଜିଲ୍ଲାପାଳ ସ୍ପଷ୍ଟ କରିଥିଲେ ଯେ ନିର୍ଦ୍ଧାରିତ ମୂଲ୍ୟ ୨୬୬–୨୬୭ ଟଙ୍କାଠାରୁ ଅଧିକ ଦରରେ ୟୁରିଆ ବିକ୍ରି କଲେ ବେସରକାରୀ ରିଟେଲରଙ୍କ ବିରୋଧରେ କଠୋର ପଦକ୍ଷେପ ନିଆଯିବ। ଆବଶ୍ୟକ ହେଲେ ଲାଇସେନ୍ସ ବାତିଲ ସହ ବ୍ଲାକ୍ଲିଷ୍ଟିଂ ଭଳି ପଦକ୍ଷେପ ମଧ୍ୟ ଗ୍ରହଣ କରାଯିବ।
