କୋମନା ବହୁଚର୍ଚ୍ଚିତ ଚାନ୍ଦୋପଳା ଜମି ଜାଲିଆତି ଘଟଣା: ନକଲି ମାଲିକ ଓ ଦୁଇ ଦଲାଲଙ୍କ ସମେତ ୪ ଗିରଫ, କୋର୍ଟ ଚାଲାଣ।

ନୂଆପଡ଼ା -୦୬/୦୯- ନୂଆପଡ଼ା ଜିଲ୍ଲା କୋମନା ତହସିଲ ଅନ୍ତର୍ଗତ ଚାନ୍ଦୋପଳା ଗ୍ରାମରେ ଘଟିଥିବା ବହୁଚର୍ଚ୍ଚିତ ଜମି ଦୁର୍ନୀତି ଘଟଣାରେ ପୋଲିସକୁ ମିଳିଛି ବଡ଼ ସଫଳତା। ଜମି ଜାଲିଆତି ଅଭିଯୋଗରେ କୋମନା ପୋଲିସ ନକଲି ଜମି ମାଲିକ, ମହିଳା ସହଯୋଗୀ ଓ ଦୁଇ ଜଣ ଜମି ଦଲାଲଙ୍କ ସମେତ ମୋଟ ୪ ଜଣଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି।
କିଭଳି ହୋଇଥିଲା ଠକେଇ ?
କୋମନା ବ୍ଲକ ଚାନ୍ଦୋପଳା ଗ୍ରାମର ପ୍ରକୃତ ଜମି ମାଲିକ ସତ୍ୟ ନାରାୟଣ ପ୍ରଧାନୀ ଓ ତାଙ୍କ ଭଉଣୀ କୁମୁଦିନୀଙ୍କ ନାମରେ ଥିବା ୪ ଏକର ୪୦ ଡିସମିଲ ଜମିକୁ ଜାଲିଆତି କରି ବିକ୍ରି କରିଦିଆଯାଇଥିଲା। ସତ୍ୟ ନାରାୟଣ ମଣ୍ଡିରେ ଧାନ ବିକ୍ରି ପାଇଁ ପଞ୍ଜୀକରଣ କରୁଥିବା ସମୟରେ ତାଙ୍କ ଜମି ଚୋରି ହୋଇ ଅନ୍ୟ କାହା ନାମକୁ ଚାଲିଯାଇଥିବା ଜାଣିବାକୁ ପାଇଥିଲେ। ଏହାପରେ ପ୍ରକୃତ ଜମି ମାଲିକ କୋମନା ତହସିଲ ତଥା ସବ୍-ରେଜିଷ୍ଟ୍ରାରଙ୍କ ନିକଟରେ ଅଭିଯୋଗ କରିଥିଲେ। ତତ୍କାଳୀନ ସବ୍-ରେଜିଷ୍ଟ୍ରାର ସର୍ବେଶ୍ୱର ଜାଲ ଏନେଇ କୋମନା ଥାନାରେ ଏକ ଲିଖିତ ଏତଲା ଦାଏର କରିଥିଲେ। ଅନ୍ୟପଟେ ଏହି ଘଟଣାରେ ସଂପୃକ୍ତି ଅଭିଯୋଗରେ ପୂର୍ବରୁ ହିଁ ଜିଲ୍ଲାପାଳ କାର୍ଯ୍ୟାନୁଷ୍ଠାନ ଗ୍ରହଣ କରି ସମ୍ପୃକ୍ତ ସବ୍-ରେଜିଷ୍ଟ୍ରାର ସର୍ବେଶ୍ୱର ଜାଲ ଓ ଜଣେ ଆର୍.ଆଇ. (ARI) ଙ୍କୁ କାର୍ଯ୍ୟରୁ ନିଲମ୍ବିତ କରିସାରିଛନ୍ତି।
ଗିରଫ ଅଭିଯୁକ୍ତମାନେ:
ଅସଲି ଜମି ମାଲିକ ନକଲି ଜମି ମାଲିକଙ୍କୁ ଧରି କୋମନା ଥାନାରେ ଜିମା ଦେବା ପରେ ପୋଲିସ ପଚରାଉଚୁରା ଚଳାଇ ପୂରା ର‌୍ୟାକେଟର ପର୍ଦ୍ଦାଫାସ କରିଛି। ଗିରଫ ଅଭିଯୁକ୍ତମାନେ ହେଲେ:
🔷 ଡୁମାଲ ରଣା (ନକଲି ସତ୍ୟ ପ୍ରଧାନୀ ସାଜିଥିବା ବ୍ୟକ୍ତି, ଗ୍ରାମ: ଗୁଡ଼ଭେଲି/ଗୋହେରାପଦର, ଛତିଶଗଡ଼)
🔷 ଦେଓମତି ମାଝୀ (ନକଲି ଭଉଣୀ ସାଜିଥିବା ମହିଳା, ଗ୍ରାମ: ଦେଓଧରା, କୋମନା)
🔷 ଦୁଲ୍ଲଭ ନିଆଲ (ଜମି ଦଲାଲ, ଗ୍ରାମ: ଷୋଳବନ୍ଦ)
🔷 ତୁଳସୀ ରଣା (ଜମି ଦଲାଲ, ଗ୍ରାମ: ସମରସିଂ)
ନ୍ୟାୟ ଦାବିରେ ଜମି ମାଲିକ ଆସନ୍ତା ୭ ତାରିଖରୁ ଧାରଣା ଦେବା ପାଇଁ ଚେତାବନୀ ଦେଇଥିବା ବେଳେ ପୋଲିସର ଏହି ତ୍ୱରିତ କାର୍ଯ୍ୟାନୁଷ୍ଠାନ ଦେଖିବାକୁ ମିଳିଛି। ତେବେ ଏହି ବଡ଼ ଧରଣର ଜମି ଦୁର୍ନୀତିର ପରଦା ପଛରେ ରହି ଗୋଟି ଚାଳନା କରୁଥିବା ଅସଲି ମାଷ୍ଟରମାଇଣ୍ଡ ଓ ପ୍ରଭାବଶାଳୀ ଲୋକଙ୍କ ବିରୋଧରେ କୋମନା ପୋଲିସ କିଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଛି, ତାହା ଉପରେ ଏବେ ସମଗ୍ର ଜିଲ୍ଲାବାସୀଙ୍କ ନଜର ରହିଛି।