ନୂଆପଡ଼ା -୫/୭- ଉଦ୍ଘାଟନ କୁ ବାକି ଅଛି ମାତ୍ର ୫ ଦିନ, କିନ୍ତୁ ଏହା ପୂର୍ବରୁ ହିଁ ପ୍ରକଳ୍ପର ସ୍ଥାୟୀତ୍ଵ କୁ ନେଇ ସୃଷ୍ଟି ହୋଇଛି ବିରାଟ ପ୍ରଶ୍ନବାଚୀ। ନୂଆପଡ଼ା ଜିଲ୍ଲା ଖଡ଼ିଆଳ ବସଷ୍ଟାଣ୍ଡ ଉଦ୍ଘାଟନ ହେବା ପୂର୍ବରୁ ଏହାର ସୁଉଚ୍ଚ ପାଚେରୀ ଭୁଶୁଡ଼ି ପଡ଼ିବା ଘଟଣା ଏବେ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ସହ ଚର୍ଚ୍ଚାର ବିଷୟ ପାଲଟିଛି। ଓଡ଼ିଶା ହାଉସିଙ୍ଗ ବୋର୍ଡ ପକ୍ଷରୁ ପ୍ରାୟ ୯ କୋଟି ଟଙ୍କା ବ୍ୟୟ ଅଟକଳରେ ନିର୍ମିତ ଏହି ହାଇଟେକ୍ ବସଷ୍ଟାଣ୍ଡ ର କାର୍ଯ୍ୟ କେତେ ନିମ୍ନମାନର, ତାହା ଏହି ଘଟଣାରୁ ସ୍ପଷ୍ଟ ପ୍ରମାଣିତ ହେଉଥିବା ଜନସାଧାରଣ ଅଭିଯୋଗ କରିଛନ୍ତି।
ଆସନ୍ତା ଜୁଲାଇ ୧୦ ତାରିଖ ଦିନ ନବନିର୍ମିତ ଖଡ଼ିଆଳ ବସଷ୍ଟାଣ୍ଡର ଭବ୍ୟ ଉଦ୍ଘାଟନ ପାଇଁ ଦିନ ଧାର୍ଯ୍ୟ ହୋଇଛି ବୋଲି କୁହାଯାଉଛି। ପ୍ରଶାସନ ପକ୍ଷରୁ ଜୋରସୋରରେ ପ୍ରସ୍ତୁତି ଚାଲିଥିବା ବେଳେ ଆଜି ବସଷ୍ଟାଣ୍ଡ କୁ ଲାଗି ରହିଥିବା ଆମ୍ବେଦକର ପଡ଼ା ସ୍ଥିତ ରାଜୁ ତାଣ୍ଡି ଙ୍କ ଘର ଉପରକୁ ପ୍ରାୟ ୪୦ ରୁ ୫୦ ଫୁଟ ଲମ୍ବର ପାଚେରୀ କାନ୍ଥ ଟି ହଠାତ ଧସେଇ ପଡ଼ିଥିଲା। ପରବର୍ତ୍ତୀ ସମୟରେ ଜେସିବି ସାହାଯ୍ୟରେ ଘର ଉପରେ ପଡ଼ିଥିବା ପାଚେରୀ ର ଭଙ୍ଗା ମଲମା ଓ ଆବର୍ଜନାକୁ କଢ଼ାଯାଇଥିବା ସୂଚନା ମିଳିଛି।
