କୋମନା ରେ ‘ବିଶ୍ୱ ବୟସ୍କ ଦୁର୍ବ୍ୟବହାର ସଚେତନତା ଦିବସ’ ପାଳିତ: ବୟସ୍କଙ୍କ ସୁରକ୍ଷା ଓ ସମ୍ମାନ ଆମର ପରମ କର୍ତ୍ତବ୍ୟ।

ନୂଆପଡ଼ା, ୧୬/୬-  ସମାଜର ମେରୁଦଣ୍ଡ ସଦୃଶ ବରିଷ୍ଠ ନାଗରିକମାନଙ୍କ ସୁରକ୍ଷା ଓ ସେମାନଙ୍କ ଅଧିକାର ପ୍ରତି ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ଏକ ବିଶେଷ କାର୍ଯ୍ୟକ୍ରମ ଆୟୋଜନ କରାଯାଇଥିଲା। କୋମନା ସ୍ଥିତ କଲ୍ୟାଣ ମଣ୍ଡପଠାରେ ଗତକାଲି ‘ବିଶ୍ୱ ବୟସ୍କ ଦୁର୍ବ୍ୟବହାର ସଚେତନତା ଦିବସ’ ଅତ୍ୟନ୍ତ ସଫଳତାର ସହ ପାଳିତ ହୋଇଯାଇଛି।
ଏହି ବିଶେଷ ସଚେତନତା ସଭାରେ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ନବନୀତା ଦାଶ ସଭାପତିତ୍ୱ କରିଥିଲେ।
ଏହି ଗରିମାମୟ କାର୍ଯ୍ୟକ୍ରମରେ ଅଞ୍ଚଳର ବହୁ ବିଶିଷ୍ଟ ବ୍ୟକ୍ତିବିଶେଷ ଯୋଗଦେଇ ବରିଷ୍ଠ ନାଗରିକମାନଙ୍କ ସୁରକ୍ଷା ଉପରେ ନିଜର ବକ୍ତବ୍ୟ ରଖିଥିଲେ।
ଅନୁସୟା କୁମ୍ଭାର କୋମନା ବ୍ଲକ୍ ଅଧ୍ୟକ୍ଷା,
ଜୟଦେବ ପ୍ରଧାନ (ଉପାଧ୍ୟକ୍ଷ) ଓ ଭକ୍ତରାମ ଶବର ପୂର୍ବତନ ଅଧ୍ୟକ୍ଷ,
ତ୍ରିଲୋକ ଚନ୍ଦ ସୋନୀ ଜିଲ୍ଲାର ବରିଷ୍ଠ ତଥା ପୂର୍ବତନ ସରକାରୀ ଓକିଲ,
ପ୍ରଶାନ୍ତ ପାଢ଼ୀ କୋମନା ଓକିଲ ସଂଘର ବରିଷ୍ଠ ଓକିଲ,
ମୃତ୍ୟୁଞ୍ଜୟ ପାଣିଗ୍ରାହୀ କୋମନା ସରପଞ୍ଚ,
ଡଃ. ମେଜର ରାମଚନ୍ଦ୍ର ମିଶ୍ର ବରିଷ୍ଠ ଶିକ୍ଷାବିତ୍ ତଥା ପୂର୍ବତନ ନ୍ୟାସନାଲ କଲେଜ ଅଧ୍ୟକ୍ଷ,
ବୀରେନ୍ଦ୍ର ପ୍ରଧାନ ଜଗନ୍ନାଥ ବରିଷ୍ଠ ନାଗରିକ ସଂଘ, କୋମନାର ଅଧ୍ୟକ୍ଷ,
ଭକ୍ତରାମ ବୁଡ଼ୈକ ସ୍ଥାନୀୟ ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ ଓ
ବିଜୟ କୁମାର ପାଢ଼ୀ ହୋଲି ହୋମ୍ ବୃଦ୍ଧାଶ୍ରମର ପରିଚାଳକ ପ୍ରମୁଖ ମଞ୍ଚାସିନ ଥିଲେ।
ଉପସ୍ଥିତ ଅତିଥିମାନେ ନିଜ ନିଜ ବକ୍ତବ୍ୟରେ ବରିଷ୍ଠ ନାଗରିକମାନଙ୍କ ଗୁରୁତ୍ୱ ଉପରେ ଆଲୋକପାତ କରି କହିଥିଲେ ଯେ, ବୟସ୍କମାନେ ହେଉଛନ୍ତି ସମାଜର ସବୁଠାରୁ ବିଜ୍ଞ ଏବଂ ଅଭିଜ୍ଞ ବ୍ୟକ୍ତିତ୍ୱ। ପ୍ରତ୍ୟେକ ବୟସ୍କ ବ୍ୟକ୍ତିଙ୍କର ସମ୍ମାନ ଓ ସ୍ୱାଭିମାନ ର ସହ ବଞ୍ଚିବାର ସମ୍ପୂର୍ଣ୍ଣ ଆଇନଗତ ଅଧିକାର ରହିଛି। ସେମାନଙ୍କୁ ଆଦର ଓ ସୁରକ୍ଷା ଦେବା ପ୍ରତିଟି ପରିବାର ତଥା ସମାଜର ପରମ କର୍ତ୍ତବ୍ୟ ।
ମୁଖ୍ୟ ଆଇନଗତ ଓ ସରକାରୀ ଯୋଜନା ସମ୍ପର୍କରେ ସୂଚନା :-
ମାତା,ପିତା ଓ ବରିଷ୍ଠ ନାଗରିକ ଭରଣପୋଷଣ ଓ କଲ୍ୟାଣ ଆଇନ, ୨୦୦୭ :- ଏହା ଅଧୀନରେ ବୟସ୍କମାନେ କିପରି ନିଜର ହକ୍ ଓ ଆଇନଗତ ସହାୟତା ପାଇପାରିବେ, ସେ ବିଷୟରେ ବିସ୍ତୃତ ଆଲୋଚନା କରାଯାଇଥିଲା।
ସରକାରୀ ଯୋଜନା :- ପ୍ରଧାନମନ୍ତ୍ରୀ ବୟ ବନ୍ଦନା ଯୋଜନା ଏବଂ ମଧୁବାବୁ ପେନସନ ଯୋଜନା ସମ୍ପର୍କରେ ସୂଚନା ପ୍ରଦାନ କରାଯାଇଥିଲା।
ସ୍ୱାସ୍ଥ୍ୟ ସୁବିଧା :- ପ୍ରଧାନମନ୍ତ୍ରୀ ଆୟୁଷ୍ମାନ ଯୋଜନା ଅଧୀନରେ ୭୦ ବର୍ଷରୁ ଉର୍ଦ୍ଧ୍ୱ ସମସ୍ତ ବରିଷ୍ଠ ନାଗରିକଙ୍କ ପାଇଁ ମାଗଣା ଚିକିତ୍ସା ସୁବିଧା ଉପଲବ୍ଧ ରହିଛି ବୋଲି ସମସ୍ତଙ୍କୁ ସୂଚିତ କରାଯାଇଥିଲା।
ଏହି ସଚେତନତା ସଭାରେ କୋମନା ଅଞ୍ଚଳ ଏବଂ ଜିଲ୍ଲାର ଏକମାତ୍ର ଜରାଶ୍ରମ— ହୋଲି ହୋମ୍ ବୃଦ୍ଧାଶ୍ରମ (ସିନାପାଲି, କୁରୁମପୁରୀ) ରୁ ବହୁ ସଂଖ୍ୟାରେ ବରିଷ୍ଠ ନାଗରିକ ସାମିଲ ହୋଇ ଆଇନଗତ ସହାୟତା ଓ ସରକାରୀ ସୁବିଧା ବିଷୟରେ ଅବଗତ ହୋଇଥିଲେ। ଜିଲ୍ଲା ଆଇନ ସେବା ପ୍ରାଧିକରଣର ପ୍ରତିଭା ପାଣିଗ୍ରାହୀ ଓ ଅନ୍ୟାନ୍ୟ ଅଧିକାର ମିତ୍ରମାନେ ଏହି ସଭାଟିକୁ ସୁଚାରୁରୂପେ ପରିଚାଳନା କରିଥିଲେ।
ସଭା ଶେଷରେ ପ୍ରାଧିକରଣ ପକ୍ଷରୁ ଏକ ପ୍ରଶଂସନୀୟ ପଦକ୍ଷେପ ସ୍ୱରୂପ ‘ପ୍ଲାଷ୍ଟିକ ଆବର୍ଜନା ସଫେଇ ଅଭିଯାନ’ ଆୟୋଜନ କରାଯାଇଥିଲା। ଏଥିରେ ପ୍ରାୟ ୧୩୦ କେଜିରୁ ଉର୍ଦ୍ଧ୍ୱ ପ୍ଲାଷ୍ଟିକ ଆବର୍ଜନା ସଫା କରାଯିବା ସହ ସମଗ୍ର ନୂଆପଡ଼ା ଜିଲ୍ଲାକୁ ସ୍ୱଚ୍ଛ ଓ ପ୍ଲାଷ୍ଟିକ୍ ମୁକ୍ତ କରିବା ପାଇଁ ସମସ୍ତେ ସମୂହ ଶପଥପାଠ କରିଥିଲେ।