ଖଡ଼ିଆଳ ରେ ‘ବାନର ସେନା’ ସଂଗଠନର ମହତ ପ୍ରୟାସ : ସେବା, ସଂସ୍କାର ଓ ସମର୍ପଣର ନୂଆ ସଂକଳ୍ପ।

ନୂଆପଡ଼ା -୮/୬ – ସମାଜ ରେ ସେବା ଓ ସଂସ୍କାର ଧର୍ମୀ ପଦକ୍ଷେପ ନେବା ଲକ୍ଷ୍ୟ ରେ ନୂଆପଡ଼ା ଜିଲ୍ଲା ଖଡ଼ିଆଳ ସ୍ଥିତ କଲ୍ୟାଣ ମଣ୍ଡପ -୨ ଠାରେ ଗତକାଲି ‘ବାନର ସେନା ସେବା ସଂଗଠନ’ (ବାନର ସେନା) ସାମାଜିକ ଅନୁଷ୍ଠାନ ତରଫରୁ ଏକ ବିଶାଳ ସାଙ୍ଗଠନିକ ସମାବେଶ ସଫଳତାର ସହ ଅନୁଷ୍ଠିତ ହୋଇଯାଇଛି। ସମାଜ ମଙ୍ଗଳ ଏବଂ ସଙ୍ଗଠନକୁ ଅଧିକ ସୁଦୃଢ଼ କରିବା ଲକ୍ଷ୍ୟରେ ଆୟୋଜିତ ଏହି କାର୍ଯ୍ୟକ୍ରମ ରେ ଶତାଧିକ ସଂଖ୍ୟାରେ ମହିଳା ଓ ପୁରୁଷ ଯୋଗ ଦେଇଥିଲେ।
ଏହି ଭବ୍ୟ ସଭାରେ ବାନର ସେନା ର ସଭାପତି ଶେଷଦେବ ପ୍ରଧାନୀ ମଞ୍ଚ ପରିଚାଳନା କରିଥିଲେ। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଶିଷ୍ଟ ଯୁବ ସଙ୍ଗଠକ ତଥା ବିଜେପି ଜିଲ୍ଲା ସମ୍ପାଦକ ଅଭିନନ୍ଦନ ପଣ୍ଡା ଏବଂ ସମ୍ମାନିତ ଅତିଥି ଭାବେ ଭୁବନେଶ୍ୱର ସ୍ୱପ୍ନା ଫାଉଣ୍ଡେସନ ର ସୌମ୍ୟ ଶେଖର ମିଶ୍ର ଯୋଗ ଦେଇଥିଲେ। ଏହି ଅବସରରେ ଅତିଥିମାନଙ୍କ ଦ୍ୱାରା ବାନର ସେନା ସଙ୍ଗଠନର ‘ଏଜେଣ୍ଡା ପତ୍ର’ ଉନ୍ମୋଚନ କରାଯିବା ସହ ସାଙ୍ଗଠନିକ ଘୋଷଣା ପତ୍ର ପାଠ କରାଯାଇଥିଲା।
ସଙ୍ଗଠନ ର କାର୍ଯ୍ୟକ୍ରମ କୁ ତୃଣମୂଳ ସ୍ତରରେ ପହଞ୍ଚାଇବା ପାଇଁ ବ୍ୟାପକ ସାଙ୍ଗଠନିକ ଅଦଳବଦଳ ଓ ନୂତନ ନିଯୁକ୍ତି ପ୍ରକାଶ କରାଯାଇଛି । ଖଡ଼ିଆଳ ବ୍ଲକ ର ସମଗ୍ର ୨୬ ଟି ପଞ୍ଚାୟତ ପାଇଁ ନୂତନ ସଭାପତି ଓ ଉପ-ସଭାପତିଙ୍କ ନାମ ଘୋଷଣା କରାଯାଇଛି। ସିନାପାଲି ବ୍ଲକ ପ୍ରାଥମିକ ପର୍ଯ୍ୟାୟରେ ୪ ଟି ପଞ୍ଚାୟତ ର ସଭାପତି ଓ ଉପ-ସଭାପତିଙ୍କ ଦାୟିତ୍ୱ ଘୋଷଣା କରାଯାଇଛି।
ଏହି ସମାବେଶରେ ସାଙ୍ଗଠନିକ ଦକ୍ଷତା ବୃଦ୍ଧି ଏବଂ ଜନହିତକର କାର୍ଯ୍ୟ କୁ ଆଗେଇ ନେବା ପାଇଁ ବିଷଦ ଆଲୋଚନା ହୋଇଥିଲା। ‘ବାନର ସେନା’ ଆଗାମୀ ଦିନରେ ନିମ୍ନଲିଖିତ କ୍ଷେତ୍ର ଗୁଡ଼ିକ ଉପରେ ବିଶେଷ ଗୁରୁତ୍ୱ ଦେବ ବୋଲି ବିଶଦ ଭାବେ ଆଲୋଚନା ହୋଇଥିଲା।
ସେବା କାର୍ଯ୍ୟ – ଦିବ୍ୟାଙ୍ଗ ସେବା, ଗୋ-ସେବା ଏବଂ ଅସହାୟଙ୍କୁ ସହାୟତା।
ସ୍ୱାସ୍ଥ୍ୟ ଓ ଜୀବନ ରକ୍ଷା – ରକ୍ତଦାନ ଶିବିର ଏବଂ ମାଗଣା ସ୍ୱାସ୍ଥ୍ୟ ସେବା ଯୋଗାଇଦେବା।
ସାମାଜିକ ସଂସ୍କାର- ନିଶାମୁକ୍ତ ସମାଜ ଗଠନ ଏବଂ ନାରୀ ସଶକ୍ତିକରଣ।
ଯୁବ ପ୍ରଗତି – ଯୁବ ଶକ୍ତିକୁ ସଂଗଠିତ କରିବା, ଡିଜିଟାଲ ଓ କ୍ୟାରିୟର ସଚେତନତା ଏବଂ ଶିକ୍ଷାର ପ୍ରୋତ୍ସାହନ।
ପରିବେଶ ଓ ସଂସ୍କୃତି – ପରିବେଶ ସୁରକ୍ଷା ସହ ଓଡ଼ିଶାର ସଂସ୍କୃତି ଓ ପରମ୍ପରାର ସୁରକ୍ଷା ମୂଲ ଲକ୍ଷ।
ଏହି ବୃହତ କାର୍ଯ୍ୟକ୍ରମକୁ ସଫଳ କରିବାରେ ଘନଶ୍ୟାମ ନାଏକ, ଉମାକାନ୍ତ ସଗରିଆ, ତେଜୁରାମ ନାଏକ, ସ୍ମିତା ମିଶ୍ର, ନାରାୟଣ ବେହେରା, ରଥ ମାଝୀ, ସତ୍ୟବ୍ରତ ସାମଲ, ନୀଳାମ୍ବର ରାଉତ, ପ୍ରିୟଙ୍କା ହଂସ, ମମତା ପ୍ରଧାନ ଏବଂ ଯୁକ୍ତା ଚିନାଗୁନ ପ୍ରମୁଖ ସକ୍ରିୟ ସହଯୋଗ କରିଥିଲେ। ସଙ୍ଗଠନର ଏଭଳି ପ୍ରୟାସକୁ ସ୍ଥାନୀୟ ଅଞ୍ଚଳରେ ବେଶ୍ ପ୍ରଶଂସା କରାଯାଇଛି।