ଖରିଆର ରୋଡ୍ ଏନଏସି ର ୨୧ ତମ କାଉନ୍ସିଲ୍ ବୈଠକ : ସର୍ବସମ୍ମତିରେ ପାରିତ ହେଲା ବିକାଶର ଏକାଧିକ ଗୁରୁତ୍ୱପୂର୍ଣ୍ଣ ପ୍ରସ୍ତାବ।

ନୂଆପଡ଼ା -୭/୦୮- ଖରିଆର ରୋଡ୍ ଏନଏସି ର ୨୧ ତମ କାଉନ୍ସିଲ୍ ବୈଠକ ଅଧ୍ୟକ୍ଷା ଡ଼ା. ସୋନିଆ ଜୈନଙ୍କ ଅଧ୍ୟକ୍ଷତାରେ ସଫଳତାର ସହ ଅନୁଷ୍ଠିତ ହୋଇଛି। ବୈଠକ ଅବସରରେ ନୂଆପଡ଼ା ବିଧାୟକ ଜୟ ଢୋଲକିଆ ଙ୍କୁ ଗତ ଚାରି ବର୍ଷର ଐତିହାସିକ ବିକାଶ ମୂଳକ କାର୍ଯ୍ୟର ରିପୋର୍ଟ କାର୍ଡ ବୁକଲେଟ୍ ପ୍ରଦାନ କରାଯାଇଥିଲା। ଏହା ସହ ନଗରର ସାମଗ୍ରିକ ବିକାଶ ସହ ଜଡିତ ଅନେକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ସର୍ବସମ୍ମତି କ୍ରମେ ଅନୁମୋଦିତ ହୋଇଥିଲା।
ବୈଠକରେ ୩ କୋଟି ଟଙ୍କା ବ୍ୟୟରେ ୱାର୍ଡ ନଂ–୪ ରେ ନିର୍ମାଣ ହେବାକୁ ଥିବା ମଡେଲ୍ ମଙ୍ଗଳ ବଜାର (ମିନି କୋଲ୍ଡ ଷ୍ଟୋରେଜ୍ ସହିତ) ର ନାମ ଡ଼ା. ଶ୍ୟାମା ପ୍ରସାଦ ମୁଖାର୍ଜୀଙ୍କ ନାମରେ ନାମିତ କରିବାକୁ ନିଷ୍ପତ୍ତି ହୋଇଛି।
ସେହିପରି ୨ କୋଟି ଟଙ୍କା ବ୍ୟୟରେ ୱାର୍ଡ ନଂ–୩ ଓ ୧୮ ମଧ୍ୟରେ ନିର୍ମାଣ ହେବାକୁ ଥିବା ଚୌପାଟିର ନାମ ପୂର୍ବତନ ଚେୟାରମ୍ୟାନ୍ ସ୍ୱର୍ଗତ ନେମୀଚନ୍ଦ ଡାଗାଙ୍କ ନାମରେ ରଖିବା ପାଇଁ ସର୍ବସମ୍ମତି ମିଳିଛି।
୧.୨୫ କୋଟି ଟଙ୍କା ବ୍ୟୟରେ ୱାର୍ଡ ନଂ–୪ରେ ନିର୍ମାଣ ହେବାକୁ ଥିବା ସ୍ମାର୍ଟ ପାର୍କର ନାମ ପଣ୍ଡିତ ଦୀନଦୟାଳ ଉପାଧ୍ୟାୟଙ୍କ ନାମରେ ଏବଂ ୱାର୍ଡ ନଂ–୧୩ ରେ ନିର୍ମାଣ ହେବାକୁ ଥିବା ସ୍ମାର୍ଟ ପାର୍କର ନାମ ଜନ ପ୍ରିୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଙ୍କ ନାମରେ ନାମିତ କରିବାକୁ ମଧ୍ୟ ନିଷ୍ପତ୍ତି ଗ୍ରହଣ କରାଯାଇଛି।
ଏହା ବ୍ୟତୀତ ୱାର୍ଡ ନଂ–୧ (ବନକା) ସ୍ଥିତ ସ୍ମାର୍ଟ ପାର୍କରେ ସ୍ୱର୍ଗତ ରାଜୁ ଭାଇ ଧୋଲକିଆ ଙ୍କ ପ୍ରତିମୂର୍ତ୍ତି ସ୍ଥାପନ ଏବଂ ନାମକରଣ କାର୍ଯ୍ୟ ଶୀଘ୍ର ଆରମ୍ଭ କରିବା ସମ୍ପର୍କରେ ଆଲୋଚନା ହୋଇଥିଲା।
ସହର ର କେନ୍ଦ୍ରସ୍ଥଳ ରେ ୨୭ କୋଟି ଟଙ୍କା ବ୍ୟୟରେ ନିର୍ମାଣାଧୀନ ଅଟଳ ବସଷ୍ଟାଣ୍ଡ ରେ ଭାରତରତ୍ନ ସ୍ୱର୍ଗତ ଅଟଳ ବିହାରୀ ବାଜପେୟୀ ଙ୍କ ପ୍ରତିମୂର୍ତ୍ତି ସ୍ଥାପନ ଏବଂ ୱାର୍ଡ ନଂ–୯ ସ୍ଥିତ ପୁରୁଣା ବସ୍ ଷ୍ଟାଣ୍ଡ ୱେଣ୍ଡିଂ ଜୋନରେ ମଟନ୍ ମାର୍କେଟ୍ ସ୍ଥାପନ ନେଇ ସକାରାତ୍ମକ ଆଲୋଚନା କରାଯାଇଥିଲା।
ବୈଠକରେ ୫ କୋଟି ଟଙ୍କା ବ୍ୟୟ ରେ ଭବ୍ୟ ଗୌଶାଳା, ୧.୩୦ କୋଟି ଟଙ୍କାର ରୋଡ୍ ସ୍ୱିପିଂ ମେସିନ୍, ୫୦ ଲକ୍ଷ ଟଙ୍କାର ଅତ୍ୟାଧୁନିକ ଆମ୍ବୁଲାନ୍ସ, ୫ କୋଟି ଟଙ୍କା ବ୍ୟୟରେ ନୂତନ ଏନ ଏ ସି କାର୍ଯ୍ୟାଳୟ ଭବନ, ନିର୍ମାଣାଧୀନ ଟର୍ଫ କ୍ରିକେଟ୍ ଗ୍ରାଉଣ୍ଡ ଏବଂ ସ୍ୱିମିଂ ପୁଲ୍ର କାର୍ଯ୍ୟ ଶୀଘ୍ର ସମାପ୍ତ କରି ଜନସାଧାରଣଙ୍କୁ ଉତ୍ସର୍ଗ କରିବା ଉପରେ ମଧ୍ୟ ବିସ୍ତୃତ ଆଲୋଚନା ହୋଇଥିଲା।
ଏହି ବୈଠକରେ ଏନ ଏ ସି ଉପାଧ୍ୟକ୍ଷ ନିଶାନ୍ତ ଡାଗା, କଳାହାଣ୍ଡି ସାଂସଦଙ୍କ ପ୍ରତିନିଧି ଗୋଲ୍ଡି ସୋମନାଥ ଅଗ୍ରୱାଲ, କାର୍ଯ୍ୟନିର୍ବାହୀ ଅଧିକାରୀ କୁରୁକ୍ଷେତ୍ର ନାୟକ, ସମସ୍ତ କାଉନ୍ସିଲର, ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ।“ସଂକଳ୍ପରୁ ସିଦ୍ଧି ପର୍ଯ୍ୟନ୍ତ—ଖଡ଼ିଆଳ ରୋଡ୍ ଏନଏସି ର ବିକାଶ ଯାତ୍ରା ଅବିରତ ଜାରି ରହିଛି।”