ନୂଆପଡ଼ାରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ କୁଷ୍ଠ ନିରାକରଣ କାର୍ଯ୍ୟକ୍ରମର ସମୀକ୍ଷା: ଜିଲ୍ଲାରେ ୪୬ ଜଣ କୁଷ୍ଠ ରୋଗୀ ଚିହ୍ନଟ।

ନୂଆପଡ଼ା -୩୧/୦୮-ନୂଆପଡ଼ା ଜିଲ୍ଲାରେ ଜାତୀୟ କୁଷ୍ଠ ନିରାକରଣ କାର୍ଯ୍ୟକ୍ରମ (NLEP) ଅଧୀନରେ ଚାଲିଥିବା କୁଷ୍ଠ ରୋଗ ଚିହ୍ନଟ ଅଭିଯାନର ଅଗ୍ରଗତି ସମ୍ପର୍କରେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଜିଲ୍ଲା ମୁଖ୍ୟାଳୟ ସମ୍ମିଳନୀ କକ୍ଷରେ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଜିଲ୍ଲାରେ କୁଷ୍ଠ ନିରାକରଣ ପାଇଁ ନିଆଯାଉଥିବା ପଦକ୍ଷେପ ଗୁଡ଼ିକର ବିସ୍ତୃତ ଆଲୋଚନା କରାଯାଇଥିଲା।
🔷 ଅଗଷ୍ଟ ୨୭ ସୁଦ୍ଧା ୪୬ କୁଷ୍ଠ ରୋଗୀ ଚିହ୍ନଟ:
ବୈଠକରୁ ମିଳିଥିବା ସୂଚନା ଅନୁଯାୟୀ, ଚଳିତ ଅଭିଯାନରେ ଗତ ଅଗଷ୍ଟ ୨୭ ତାରିଖ ସୁଦ୍ଧା ଜିଲ୍ଲାରେ ମୋଟ ୪୬ ଜଣ ସନ୍ଦିଗ୍ଧ କୁଷ୍ଠ ରୋଗୀ ଚିହ୍ନଟ ହୋଇଛନ୍ତି। ଏଥିମଧ୍ୟରୁ ୩ ଜଣ ପିବି ଏବଂ ୨ ଜଣ ଏମ୍‌ବି ବର୍ଗର ବୟସ୍କଙ୍କଠାରେ କୁଷ୍ଠ ରୋଗ ନିଶ୍ଚିତ ହୋଇଛି। ସମସ୍ତ ସନ୍ଦିଗ୍ଧ ରୋଗୀଙ୍କ ସ୍ୱାସ୍ଥ୍ୟ ପରୀକ୍ଷା ଏବଂ ରୋଗ ନିଶ୍ଚିତକରଣ ପ୍ରକ୍ରିୟା ମେଡିକାଲ ଅଫିସର ତଥା ଜିଲ୍ଲା NLEP ଟିମ୍ ଦ୍ୱାରା ଯୁଦ୍ଧକାଳୀନ ଭିତ୍ତିରେ ଜାରି ରହିଛି।
🔷 ୩୧ ଅଗଷ୍ଟ ପର୍ଯ୍ୟନ୍ତ ଚାଲିବ ଅଭିଯାନ:
ଏହି ସ୍ୱତନ୍ତ୍ର କୁଷ୍ଠ ରୋଗ ଚିହ୍ନଟ ଅଭିଯାନ ଆସନ୍ତା ୩୧ ଅଗଷ୍ଟ ପର୍ଯ୍ୟନ୍ତ ଚାଲିବ। ଅଭିଯାନ ସମୟରେ ସନ୍ଦିଗ୍ଧ ରୋଗୀଙ୍କୁ ତୁରନ୍ତ ଚିହ୍ନଟ କରି ରୋଗ ନିଶ୍ଚିତ କରିବା ସହ ତୁରନ୍ତ ଉପଯୁକ୍ତ ଚିକିତ୍ସା ଯୋଗାଇଦେବା ଉପରେ ଜିଲ୍ଲାପାଳ ବିଶେଷ ଗୁରୁତ୍ୱାରୋପ କରିଛନ୍ତି।
🔷 ଜିଲ୍ଲାପାଳ ଙ୍କ ନିର୍ଦ୍ଧେଶ:
ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ସ୍ତରରେ ମେଡିକାଲ ଅଫିସରମାନେ ସନ୍ଦିଗ୍ଧ ରୋଗୀଙ୍କ ପରୀକ୍ଷା କରି ରୋଗ ନିଶ୍ଚିତ କରିବା, ଆଶା କର୍ମୀମାନେ ତୁରନ୍ତ ସନ୍ଦିଗ୍ଧଙ୍କୁ ରେଫର କରିବା ଏବଂ ହେଲଥ୍ ସୁପରଭାଇଜରମାନେ ନିୟମିତ ତଦାରଖ ଓ କ୍ଷେତ୍ରସ୍ତରୀୟ ଅନୁଧ୍ୟାନ ସୁନିଶ୍ଚିତ କରିବାକୁ ସମସ୍ତ ସ୍ୱାସ୍ଥ୍ୟ ଅଧୀକ୍ଷକଙ୍କୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି।
ବୈଠକର ପ୍ରାରମ୍ଭରେ ଜିଲ୍ଲା କୁଷ୍ଠ ପରାମର୍ଶଦାତା ଡା. ଅନିତା ସାହୁ ଏନଏଲଇପି କାର୍ଯ୍ୟକ୍ରମର ଅଗ୍ରଗତି ଓ ବର୍ତ୍ତମାନର ସ୍ଥିତି ସମ୍ପର୍କରେ ତଥ୍ୟ ଉପସ୍ଥାପନ କରିଥିଲେ। ଏହି ସମୀକ୍ଷା ବୈଠକରେ ଭାରପ୍ରାପ୍ତ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା. ଦ୍ୱାରିକାନାଥ ଶତପଥୀ, ଏଡିପିଏଚଓ (କୁଷ୍ଠ) ଡା. ତନ୍ମୟ ତ୍ରିପାଠୀ, ଏଡିପିଏଚଓ(ଟିବି) ଡା. ଦିଲୀପ ଦାସ, ଏଡିପିଏଚଓ (ଏଫଡବ୍ଲ୍ୟୁ) ଡା. ଜ୍ୟୋତିର୍ମୟୀ ସୁବେନ୍ଦୁ ଦାସ, ଏଡିପିଏଚଓ (ଡିସି) ଡା. ମଞ୍ଜୁରାଣୀଙ୍କ ସମେତ ଜିଲ୍ଲା ସ୍ୱାସ୍ଥ୍ୟ ବିଭାଗର ବହୁ ବରିଷ୍ଠ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ।