ନୂଆପଡ଼ାରେ ପ୍ରବାସୀ ଶ୍ରମିକଙ୍କ କଲ୍ୟାଣ ପାଇଁ ଜିଲ୍ଲାସ୍ତରୀୟ ସମନ୍ୱୟ ବୈଠକ: ପ୍ରବାସ ପ୍ରଥା ରୋକିବାକୁ ଜିଲ୍ଲାପାଳଙ୍କ ମିଶନ-ମୋଡ୍ ଆହ୍ୱାନ।

ନୂଆପଡ଼ା -୨୯/୪- ନୂଆପଡ଼ା ଜିଲ୍ଲାରେ ପ୍ରବାସୀ ଶ୍ରମିକମାନଙ୍କ ସୁରକ୍ଷା, ସାମଗ୍ରିକ କଲ୍ୟାଣ ଏବଂ ପ୍ରବାସ ପ୍ରଥାର ସ୍ଥାୟୀ ନିରାକରଣ ପାଇଁ ପ୍ରଶାସନ ତତ୍ପରତା ପ୍ରକାଶ କରିଛି। ସ୍ଥାନୀୟ ସଦ୍ଭାବନା ସଭାଗୃହ ରେ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ‘ଜିଲ୍ଲାସ୍ତରୀୟ ସମନ୍ୱୟ କମିଟି’ ବୈଠକ ଗତ କାଲି ଅନୁଷ୍ଠିତ ହୋଇଯାଇଛି।
ବୈଠକର ପ୍ରାରମ୍ଭରେ ଜିଲ୍ଲା ଶ୍ରମ ଅଧିକାରୀ ଜସ୍ମିନ ସାହୁ ସମସ୍ତଙ୍କୁ ସ୍ୱାଗତ କରିବା ସହ ବୈଠକର ରୂପରେଖ ଉପସ୍ଥାପନ କରିଥିଲେ। ଜିଲ୍ଲାପାଳ ଶ୍ରୀ ଦାଶ ନିଜ ଅଭିଭାଷଣରେ କହିଛନ୍ତି ଯେ, “ପ୍ରବାସୀ ଶ୍ରମିକ ପ୍ରଥାକୁ ସମ୍ପୂର୍ଣ୍ଣ ଉଚ୍ଛେଦ କରିବା ପାଇଁ ପ୍ରତ୍ୟେକ ବିଭାଗକୁ ମିଳିତ ଓ ସମନ୍ୱିତ ଭାବେ ଦାୟିତ୍ୱ ନିଭାଇବାକୁ ହେବ।” ଏହାକୁ ଏକ ‘ମିଶନ’ ଭାବେ ଗ୍ରହଣ କରି ସମୟୋପଯୋଗୀ ହସ୍ତକ୍ଷେପ କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।

ବିଭିନ୍ନ ଜନ କଲ୍ୟାଣକାରୀ ଯୋଜନାର ସଫଳତା ଉପରେ ଏକ ନଜର –
ବୈଠକରେ ବିଭିନ୍ନ ବିଭାଗ ପକ୍ଷରୁ ପ୍ରବାସୀ ପରିବାରଙ୍କୁ ଦିଆଯାଉଥିବା ସହାୟତା ଓ ସଫଳତା ସମ୍ପର୍କରେ ତଥ୍ୟ ରଖାଯାଇଥିଲା:
ଉଦ୍ୟାନ କୃଷି : ୨୫ ଟି ପ୍ରବାସୀ ପରିବାରକୁ ପିଆଜ ଓ ଅନ୍ୟାନ୍ୟ ଚାଷ ପାଇଁ ୯୦,୬୮୮ ଟଙ୍କାର ଆର୍ଥିକ ସହାୟତା।
ସାମାଜିକ ସୁରକ୍ଷା : ୩୪ ଟି ପରିବାରକୁ ମାସିକ ୧୦୦୦ ଟଙ୍କା ଲେଖାଏଁ ପେନସନ ଏବଂ ୧୧ ଟି ପରିବାରକୁ ପ୍ରଶିକ୍ଷଣ ପାଇଁ ୬୨,୭୦୦ ଟଙ୍କା ବ୍ୟୟ।
ନିଯୁକ୍ତି ସୁଯୋଗ (ସିନାପାଲି) : ୧୬୨ ଜଣ ପ୍ରବାସୀଙ୍କ ପାଇଁ ୩୮୮୮ ମାନବ-ଦିନ ସୃଷ୍ଟି କରାଯାଇ ୧୪,୪୨,୪୪୮ ଟଙ୍କା ମଜୁରି ପ୍ରଦାନ।
ମିଶନ ଶକ୍ତି : ୭୭ ଟି ପରିବାରକୁ ଜୀବିକା ସହାୟତା ବାବଦରେ ୮.୧୫ ଲକ୍ଷ ଟଙ୍କା ପ୍ରଦାନ।
ଜିଲ୍ଲାପାଳ ଜିଲ୍ଲା ଶ୍ରମ ଅଧିକାରୀଙ୍କୁ ପ୍ରବାସୀ ଶ୍ରମିକମାନଙ୍କର ଏକ ସଂପୂର୍ଣ୍ଣ ଡାଟାବେସ୍ ପ୍ରସ୍ତୁତ କରିବାକୁ କଡ଼ା ନିର୍ଦ୍ଦେଶ ଦେଇଛନ୍ତି। ଏହାସହ ସମସ୍ତ ବ୍ଲକ ଉନ୍ନୟନ ଅଧିକାରୀଙ୍କୁ ବ୍ଲକ ସ୍ତରରେ ନିୟମିତ ସମନ୍ୱୟ ବୈଠକ କରିବାକୁ କୁହାଯାଇଛି। “ଯେତେବେଳ ପର୍ଯ୍ୟନ୍ତ ଶ୍ରମିକମାନେ ନିଜ ଗାଁରେ ରୋଜଗାର ନ ପାଇଛନ୍ତି, ସେ ପର୍ଯ୍ୟନ୍ତ ପ୍ରବାସ ପ୍ରଥାକୁ ସମ୍ପୂର୍ଣ୍ଣ ରୋକିବା ସମ୍ଭବ ନୁହେଁ। ତେଣୁ ସ୍ଥାନୀୟ ନିଯୁକ୍ତି ସୃଷ୍ଟି ହିଁ ଆମର ମୁଖ୍ୟ ଲକ୍ଷ୍ୟ।” ବୋଲି ଜିଲ୍ଲାପାଳ ଶ୍ରୀ ଦାଶ ଗୁରୁତ୍ୱାରୋପ କରିଥିଲେ। ଏହି ବୈଠକରେ ଜିଲ୍ଲା ଆରକ୍ଷୀ ଅଧିକ୍ଷକ ଅମ୍ରିତପାଲ ସିଂ, ବନଖଣ୍ଡ ଅଧିକାରୀ ଅଜିଜ ଖାନ, ଉପ-ଜିଲ୍ଲାପାଳ ସୁର୍ମି ସୋରେନ, ଜିଲ୍ଲା ପରିଷଦ ଅତିରିକ୍ତ କାର୍ଯ୍ୟନିର୍ବାହୀ ଅଧିକାରୀ କ୍ଷମାନିଧି ଭୋଇ ଙ୍କ ସମେତ ସମସ୍ତ ତହସିଲଦାର ଓ ବିଡିଓମାନେ ଯୋଗ ଦେଇଥିଲେ।