ନୂଆପଡ଼ାରେ ‘ଭାରତୀୟ ନାଗରିକ ସୁରକ୍ଷା ସଂହିତା-୨୦୨୩’ ସମ୍ବନ୍ଧୀୟ ଆଇନ ସଚେତନତା ଶିବିର ଅନୁଷ୍ଠିତ ।

ନୂଆପଡ଼ା -୩୦/୪- ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣ ଆନୁକୂଲ୍ୟରେ ସ୍ଥାନୀୟ ଜିଲ୍ଲା ଓକିଲ ସଂଘ ସଭାଗୃହରେ ଏକ ଗୁରୁତ୍ୱପୂର୍ଣ୍ଣ ଆଇନ ସଚେତନତା ଶିବିର ସଫଳତାର ସହ ସମ୍ପନ୍ନ ହୋଇଯାଇଛି। ଦେଶର ପରିବର୍ତ୍ତିତ ଆଇନ ବ୍ୟବସ୍ଥା ଏବଂ ‘ଭାରତୀୟ ନାଗରିକ ସୁରକ୍ଷା ସଂହିତା- ୨୦୨୩’ର ବିଭିନ୍ନ ପ୍ରାବଧାନ ସମ୍ପର୍କରେ ଲୋକଙ୍କୁ ଅବଗତ କରାଇବା ଏହି କାର୍ଯ୍ୟକ୍ରମର ମୂଳ ଲକ୍ଷ୍ୟ ଥିଲା।
ଏହି ଶିବିରରେ ପ୍ରଶାସନିକ ଓ ନ୍ୟାୟିକ ବିଭାଗର ବହୁ ବିଶିଷ୍ଟ ବ୍ୟକ୍ତିବିଶେଷ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ ।
ଜିଲ୍ଲାପାଳ ମଧୁସୂଦନ ଦାଶ, ମୁଖ୍ୟ ବିଚାର ବିଭାଗୀୟ ଦଣ୍ଡାଧିକାରୀ ସୁଶାନ୍ତ କୁମାର ମିଶ୍ର,
ବରିଷ୍ଠ ଦେୱାନୀ ବିଚାରପତି ଦୁର୍ବାସା ଦୁର୍ଗା, ଜିଲ୍ଲା ଆଇନ ସେବା ପ୍ରାଧିକରଣ ସଚିବ ନବନୀତା ଦାଶ,
ନ୍ୟାୟିକ ଅଧିକାରୀ ଏସ୍.ଡି.ଜେ.ଏମ୍ ସ୍ନାତକୀ ଦାଶ ଓ ପ୍ରୋଵେସନ ଜଜ୍ କାହ୍ନୁ କିସ୍କୁ,
ପୋଲିସ ପ୍ରଶାସନ ଅତିରିକ୍ତ ଆରକ୍ଷୀ ଅଧୀକ୍ଷକ ରଣଜିତ ନାୟକ ଓ ନୂଆପଡ଼ା ଏସଡିପିଓ ସ୍ୱାଧୀନ ମିଶ୍ର,
ଶିକ୍ଷାବିତ୍ ମହାମାୟା ଆଇନ ମହାବିଦ୍ୟାଳୟର ଅଧ୍ୟକ୍ଷ ଡଃ ଅନୀଲ କୁମାର ତାଣ୍ଡି ପ୍ରମୁଖ ଯୋଗଦେଇଥିଲେ।
ସଚେତନତା ଶିବିରରେ ଉପସ୍ଥିତ ବକ୍ତାମାନେ ନୂତନ ଆଇନ ସଂହିତାରେ ଥିବା ଜନକଲ୍ୟାଣକାରୀ ବ୍ୟବସ୍ଥା ଉପରେ ବିସ୍ତୃତ ଭାବେ ଆଲୋକପାତ କରିଥିଲେ। ମୁଖ୍ୟତଃ ନିମ୍ନଲିଖିତ ବିଷୟଗୁଡ଼ିକ ଉପରେ ଗୁରୁତ୍ୱ ଦିଆଯାଇଥିଲା ।
ଏତଲା ଦାୟର କରିବାର ନୂତନ ଶୈଳୀ ଓ ଜାମିନ ପ୍ରକ୍ରିୟାକୁ ସହଜ କରିବା।
କୋର୍ଟ ପ୍ରକ୍ରିୟାରେ ସମନ୍ ଓ ୱାରେଣ୍ଟ ଜାରିର ସଠିକ ନିୟମ।
ପ୍ରତ୍ୟେକ ନାଗରିକଙ୍କର ଆଇନଗତ ସହାୟତା ପାଇବାର ଅଧିକାର।
ମାମଲାର ଶୀଘ୍ର ସମାଧାନ ପାଇଁ ଥିବା ବ୍ୟବସ୍ଥା। “ନୂତନ ଭାରତୀୟ ନାଗରିକ ସୁରକ୍ଷା ସଂହିତା ଦ୍ୱାରା ନ୍ୟାୟ ପ୍ରଦାନ ପ୍ରକ୍ରିୟା ଅଧିକ ସ୍ୱଚ୍ଛ ଓ ତ୍ୱରାନ୍ୱିତ ହେବ, ଯାହା ସାଧାରଣ ଜନତାଙ୍କୁ ଉପଯୁକ୍ତ ସମୟରେ ନ୍ୟାୟ ପ୍ରଦାନ କରିବାରେ ସହାୟକ ହେବ।” ବୋଲି ଅତିଥି ଗଣ କହିଥିଲେ।
ଏହି ଶିବିରରେ ବହୁ ସଂଖ୍ୟାରେ ଓକିଲ, ଆରକ୍ଷୀ ଅଧିକାରୀ ଏବଂ ‘ଅଧିକାର ମିତ୍ର’ ମାନେ ଯୋଗ ଦେଇଥିଲେ। ପରିଶେଷରେ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ନବନୀତା ଦାଶ ସମସ୍ତଙ୍କୁ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ।