ନୂଆପଡ଼ାରେ ‘ଭିବି-ଜୀ ରାମ ଜୀ’ ଯୋଜନାର ପ୍ରଶିକ୍ଷଣ ଶିବିର : ଶ୍ରମିକଙ୍କୁ ୧୨୫ ଦିନର ରୋଜଗାର ସହ ଗ୍ରାମାଞ୍ଚଳ ଭିତ୍ତିଭୂମି ଉପରେ ଗୁରୁତ୍ୱ।

ନୂଆପଡ଼ା- ୩୦/୬- ଗ୍ରାମାଞ୍ଚଳରେ ରୋଜଗାର ବୃଦ୍ଧି, ଆଜୀବିକାର ସୁରକ୍ଷା ଏବଂ ସ୍ଥାୟୀ ଭିତ୍ତିଭୂମି ବିକାଶକୁ ନୂଆ ଦିଗ ଦେବା ପାଇଁ ସରକାରଙ୍କ ମହତ୍ୱାକାଙ୍କ୍ଷୀ ‘ଭିବି-ଜୀ ରାମ ଜୀ’ (ବିକଶିତ ଭାରତ ଗ୍ୟାରେଣ୍ଟି ଫର ରୋଜଗାର ଏଣ୍ଡ ଆଜିବିକା ମିଶନ) ଯୋଜନା ଏବେ ନୂଆପଡ଼ା ଜିଲ୍ଲାରେ କାର୍ଯ୍ୟକାରୀ ହେବାକୁ ଯାଉଛି। ଏହାକୁ ସଫଳ ଭାବେ ରୂପାୟନ କରିବା ଲକ୍ଷ୍ୟରେ ମଙ୍ଗଳବାର ଜିଲ୍ଲା ସଦ୍‌ଭାବନା ସଭାଗୃହ ରେ ଏକ ଦିବସୀୟ ଜିଲ୍ଲାସ୍ତରୀୟ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଥିଲା।
ଜିଲ୍ଲା ପରିଷଦ ଆନୁକୂଲ୍ୟରେ ଆୟୋଜିତ ଏହି ଶିବିରରେ ଜିଲ୍ଲାପାଳ ମଧୁସୂଦନ ଦାଶ ଅଧ୍ୟକ୍ଷତା କରିଥିବା ବେଳେ ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ଲମ୍ବୋଦର ଧରୁଆ, ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ କ୍ଷମା ନିଧି ଭୋଇ, ସମସ୍ତ ବିଡିଓ ଏବଂ ବିଭିନ୍ନ ବିଭାଗର ବରିଷ୍ଠ ଅଧିକାରୀମାନେ ଯୋଗଦେଇଥିଲେ।
୧୨୫ ଦିନର ନିଶ୍ଚିତ ରୋଜଗାର, ସ୍ଥାୟୀ ସମ୍ପତ୍ତି ସୃଷ୍ଟି ଉପରେ ଫୋକସ୍ ।
ଏହି ଯୋଜନା ଅଧୀନରେ ପ୍ରତ୍ୟେକ ଯୋଗ୍ୟ ଗ୍ରାମୀଣ ପରିବାରକୁ ବର୍ଷକୁ ୧୨୫ ଦିନର ମଜୁରି ଭିତ୍ତିକ ନିଶ୍ଚିତ ରୋଜଗାର ପ୍ରଦାନ କରାଯିବ। ଏହା ସହ ଜଳ ସଂରକ୍ଷଣ, ଗ୍ରାମୀଣ ସଡ଼କ, ସାମୁଦାୟିକ ସମ୍ପତ୍ତି ଓ ଅନ୍ୟାନ୍ୟ ଦୀର୍ଘସ୍ଥାୟୀ ବିକାଶମୂଳକ ପ୍ରକଳ୍ପ ମାଧ୍ୟମରେ ଗ୍ରାମାଞ୍ଚଳର ସାମଗ୍ରିକ ବିକାଶକୁ ଗୁରୁତ୍ୱ ଦିଆଯିବ।
‘ଟିମ୍ ସ୍ପିରିଟ୍‌ ରେ କାମ କରନ୍ତୁ’—ଜିଲ୍ଲାପାଳଙ୍କ ବାର୍ତ୍ତା-
“ପ୍ରଶିକ୍ଷଣ ଶିବିରରେ ଜିଲ୍ଲାପାଳ ସମସ୍ତ ବିଭାଗକୁ ସମନ୍ୱୟ ରକ୍ଷା କରି ଦଳଗତ ଭାବେ କାର୍ଯ୍ୟ କରିବାକୁ ଆହ୍ୱାନ ଜଣାଇଥିଲେ। ବିଡିଓ ମାନଙ୍କୁ କ୍ଷେତ୍ରସ୍ତର ରେ ସଠିକ୍ ଓ ସ୍ୱଚ୍ଛ କାର୍ଯ୍ୟାନ୍ୱୟନ ଉପରେ ବିଶେଷ ଗୁରୁତ୍ୱ ଦେବାକୁ ସେ ପରାମର୍ଶ ଦେଇଥିଲେ।
ସେ କହିଥିଲେ, “ଏହି ଯୋଜନା କେବଳ ରୋଜଗାର ସୃଷ୍ଟି ପାଇଁ ନୁହେଁ, ବରଂ ଗ୍ରାମାଞ୍ଚଳର ଭବିଷ୍ୟତ ବିକାଶର ମଜବୁତ ଭିତ୍ତି ସ୍ଥାପନ ପାଇଁ।” ବୁଧବାରଠାରୁ ଯୋଜନାର କାର୍ଯ୍ୟ ଆରମ୍ଭ ହେବାକୁ ଥିବାରୁ ପ୍ରକଳ୍ପସ୍ଥଳ ରେ ତୁରନ୍ତ ସୂଚନା ଫଳକ ସ୍ଥାପନ, ନିୟମିତ କ୍ଷେତ୍ର ପରିଦର୍ଶନ ଓ ଡିଜିଟାଲ୍ ମନିଟରିଂ ସୁନିଶ୍ଚିତ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ।
ପ୍ରବାସୀ ଶ୍ରମିକମାନଙ୍କୁ ଚିହ୍ନଟ କରି ଏହି ଯୋଜନାରେ ସାମିଲ କରିବା ସହ ଶତପ୍ରତିଶତ ନିୟୋଜନ ସୁନିଶ୍ଚିତ କରିବାକୁ ମଧ୍ୟ ଗୁରୁତ୍ୱ ଦିଆଯାଇଛି। ଯୋଜନାରେ କୌଣସି ପ୍ରକାରର ଆର୍ଥିକ ଅନିୟମିତତା କିମ୍ବା ଅବହେଳା ଦେଖାଗଲେ ସମ୍ପୃକ୍ତ ଅଧିକାରୀଙ୍କ ବିରୋଧରେ କଡ଼ା ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲାପାଳ ସ୍ପଷ୍ଟ କରିଛନ୍ତି। ଶିବିର ରେ ଯୋଜନାର ବୈଷୟିକ କାର୍ଯ୍ୟପ୍ରଣାଳୀ, ରୋଡ୍‌ମ୍ୟାପ୍, ଡିଜିଟାଲ୍ ମନିଟରିଂ ଓ ସ୍ୱଚ୍ଛ ରୂପାୟନ ସମ୍ପର୍କରେ ଉପସ୍ଥିତ ଅଧିକାରୀମାନଙ୍କୁ ବିସ୍ତୃତ ତାଲିମ ପ୍ରଦାନ କରାଯାଇଥିଲା।