10
ନୂଆପଡ଼ା -୧୩/୬ ବିଶ୍ୱ ଶିଶୁ ଶ୍ରମ ନିଷେଧ ଦିବସ ଅବସର ରେ ଗତକାଲି ନୂଆପଡ଼ା ଜିଲ୍ଲାରେ ଶିଶୁ ଶ୍ରମିକ ପ୍ରଥାର ସମ୍ପୂର୍ଣ୍ଣ ନିରାକରଣ ପାଇଁ ଏକ ବଡ଼ ପଦକ୍ଷେପ ନିଆଯାଇଛି। ଜିଲ୍ଲା ପ୍ରଶାସନ ପକ୍ଷରୁ ଏକ ୧୫ ଦିନିଆ ସ୍ୱତନ୍ତ୍ର ସଚେତନତା ଅଭିଯାନ ର ଆନୁଷ୍ଠାନିକ ଶୁଭାରମ୍ଭ ହୋଇଯାଇଛି, ଯାହା ଆସନ୍ତା ଜୁନ୍ ୧୨ ରୁ ଜୁନ୍ ୨୬ ପର୍ଯ୍ୟନ୍ତ ସମଗ୍ର ଜିଲ୍ଲାରେ ଜାରି ରହିବ।
ଜିଲ୍ଲା ମୁଖ୍ୟାଳୟ ପରିସରରୁ ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶ ‘ଶିଶୁ ଶ୍ରମିକ ନିରାକରଣ ସଚେତନତା ରଥ’କୁ ସବୁଜ ପତାକା ଦେଖାଇ ଯାତ୍ରାର ଆରମ୍ଭ କରିଥିଲେ। ଏହି ରଥ ଜିଲ୍ଲାର ସହରାଞ୍ଚଳ ଠାରୁ ଆରମ୍ଭ କରି ଦୁର୍ଗମ ଗ୍ରାମାଞ୍ଚଳ ଓ ବ୍ଲକ ମୁଖ୍ୟାଳୟ ବୁଲି ଲୋକଙ୍କୁ ଶିଶୁ ଶ୍ରମ ବିରୋଧରେ ଜାଗ୍ରତ କରିବ।
ଏହି ଶୁଭାରମ୍ଭ କାର୍ଯ୍ୟକ୍ରମରେ ଜିଲ୍ଲାର ଅନେକ ବରିଷ୍ଠ ଅଧିକାରୀ ସାମିଲ ହୋଇ ଶିଶୁମାନଙ୍କ ସୁରକ୍ଷା ପାଇଁ ସଂକଳ୍ପ ନେଇଥିଲେ :
ସୁବାଷ ଚନ୍ଦ୍ର ରଇତ (ଅତିରିକ୍ତ ଜିଲ୍ଲାପାଳ)
ରବୀନ୍ଦ୍ର ବାର୍ଲା ପ୍ରଭାଗୀୟ ଶ୍ରମ ଆୟୁକ୍ତ,ଜସ୍ମିନ ସାହୁ ଜିଲ୍ଲା ଶ୍ରମ ଅଧିକାରୀ,
ଖଡ଼ିଆଳ ଠାରେ ବିଶାଳ ରାଲି ଓ ମହାସଭା
ଅନ୍ୟପକ୍ଷରେ, ଖଡ଼ିଆଳ ସହରରେ ବିଭିନ୍ନ ସ୍ୱେଚ୍ଛାସେବୀ ସଙ୍ଗଠନ, ସ୍କୁଲ-କଲେଜର ଛାତ୍ରଛାତ୍ରୀ ଏବଂ ସରକାରୀ କର୍ମଚାରୀମାନଙ୍କୁ ନେଇ ଏକ ବିଶାଳ ଜନସଚେତନତା ରାଲି ଆୟୋଜନ କରାଯାଇଥିଲା। ଏହାପରେ ଖଡ଼ିଆଳସ୍ଥିତ କ୍ଷତ୍ରିୟ ସମାଜ ଭବ ଠାରେ ଏକ ଜିଲ୍ଲାସ୍ତରୀୟ ସାଧାରଣ ସଭା ଅନୁଷ୍ଠିତ ହୋଇଥିଲା।
କଡ଼ା ଆଭିମୁଖ୍ୟ: ହୋଟେଲ, ଢାବା ଓ ଦୋକାନରେ ହେବ ଚଢ଼ାଉ
ଏହି ସଭାରେ ଶିଶୁ ଓ କିଶୋର ଶ୍ରମ (ନିଷେଧ ଓ ନିୟନ୍ତ୍ରଣ) ଆଇନ, ୧୯୮୬ କୁ ଜିଲ୍ଲାରେ ଅଧିକ କଡ଼ାକଡ଼ି ଭାବେ ଲାଗୁ କରିବା ପାଇଁ ରଣନୀତି ପ୍ରସ୍ତୁତ କରାଯାଇଛି।
ପ୍ରଶାସନର ଚେତାବନୀ : ଅଭିଯାନ ଚାଲୁଥିବା ସମୟରେ ‘ଜିଲ୍ଲା ଶିଶୁ ଶ୍ରମ ଟାସ୍କଫୋର୍ସ’ ପକ୍ଷରୁ ବିଭିନ୍ନ ରାସ୍ତାକଡ଼ ହୋଟେଲ, ଢାବା, ରେଷ୍ଟୁରାଣ୍ଟ, ଦୋକାନ ଏବଂ ବ୍ୟବସାୟିକ ପ୍ରତିଷ୍ଠାନ ଉପରେ ହଠାତ୍ ଚଢ଼ାଉ (Surprise Raid) କରାଯିବ। ଯଦି କୌଣସି ସ୍ଥାନରେ ଶିଶୁ ଶ୍ରମିକ ନିୟୋଜିତ ଥିବା ଜଣାପଡ଼େ, ତେବେ ମାଲିକଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଜିଲ୍ଲା ପ୍ରଶାସନର ଆହ୍ୱାନ
“ଶିଶୁମାନଙ୍କ ହାତରେ କାମ ନୁହେଁ, ବହି ଓ କଲମ ରହିବା ଦରକାର।” ଏକ ‘ଶିଶୁ ଶ୍ରମମୁକ୍ତ ନୂଆପଡ଼ା’ ଏବଂ ସମୃଦ୍ଧ ଓଡ଼ିଶା ଗଠନ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ନାଗରିକଙ୍କୁ ସହଯୋଗ କରିବାକୁ ଅନୁରୋଧ କରାଯାଇଛି। କୌଣସି ସ୍ଥାନରେ ଶିଶୁ ଶ୍ରମିକ ଦେଖିଲେ ତୁରନ୍ତ ପ୍ରଶାସନକୁ ଜଣାଇବା ପାଇଁ ଆହ୍ୱାନ ଦିଆଯାଇଛି।
