ନୂଆପଡ଼ା ରେ ଜୋରଦାର ହେବ ‘ନଶା ମୁକ୍ତ ଭାରତ ଅଭିଯାନ’ : ଜୁନ୍ ୨୦ ରୁ ୨୬ ସପ୍ତାହବ୍ୟାପୀ ମେଗା ସଚେତନତା କାର୍ଯ୍ୟକ୍ରମ।

ନୂଆପଡ଼ା – ୧୯/୦୬- ନିଶାମୁକ୍ତ ସମାଜ ଗଠନ ଏବଂ ନିଶାଦ୍ରବ୍ୟର କୁପ୍ରଭାବ ବିରୋଧରେ ଜନସାଧାରଣଙ୍କୁ ସଚେତନ କରିବା ପାଇଁ ନୂଆପଡ଼ା ଜିଲ୍ଲା ପ୍ରଶାସନ ପକ୍ଷରୁ କମର କଷାଯାଇଛି। ଆନ୍ତର୍ଜାତିକ ନିଶାଦ୍ରବ୍ୟ ଅପବ୍ୟବହାର ଓ ଅବୈଧ କାରବାର ନିରୋଧ ଦିବସ-୨୦୨୬ ଉପଲକ୍ଷେ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ମୁଖ୍ୟାଳୟ ସମ୍ମିଳନୀ କକ୍ଷଠାରେ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଭାରତ ସରକାରଙ୍କ ‘ନଶା ମୁକ୍ତ ଭାରତ ଅଭିଯାନ’ର ଅଂଶସ୍ୱରୂପ ଚଳିତ ମାସ ଜୁନ ୨୦ ତାରିଖରୁ ୨୬ ତାରିଖ ପର୍ଯ୍ୟନ୍ତ ଜିଲ୍ଲାବ୍ୟାପୀ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯିବ।
ବୈଠକ ପ୍ରାରମ୍ଭରେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଅନନ୍ତ କୁମାର ହେମ୍ବ୍ରମ ସପ୍ତାହବ୍ୟାପୀ ପାଳନ ହେବାକୁ ଥିବା କାର୍ଯ୍ୟକ୍ରମର ସମ୍ପୂର୍ଣ୍ଣ ରୂପରେଖା ଉପସ୍ଥାପନ କରିଥିଲେ।
ସପ୍ତାହବ୍ୟାପୀ କାର୍ଯ୍ୟସୂଚୀ- କେବେ କେଉଁ କାର୍ଯ୍ୟକ୍ରମ ?
ଜିଲ୍ଲାବାସୀଙ୍କୁ ସଚେତନ କରିବା ପାଇଁ ପ୍ରଶାସନ ପକ୍ଷରୁ ଦିନଧାର୍ଯ୍ୟ ଅନୁଯାୟୀ ଭିନ୍ନ ଭିନ୍ନ କାର୍ଯ୍ୟକ୍ରମ ପ୍ରସ୍ତୁତ କରାଯାଇଛି:
ଜୁନ୍ ୨୦- ସଚେତନତା ରାଲି, ସ୍ୱାକ୍ଷର ଅଭିଯାନ ସହ ଛାତ୍ରଛାତ୍ରୀଙ୍କ ମଧ୍ୟରେ ପ୍ରବନ୍ଧ, ସ୍ଲୋଗାନ, ପୋଷ୍ଟର ଓ ଚିତ୍ରାଙ୍କନ ପ୍ରତିଯୋଗିତା।
ଜୁନ୍ ୨୧ – ଆନ୍ତର୍ଜାତିକ ଯୋଗ ଦିବସ ଅବସରରେ ସ୍ୱେଚ୍ଛାକୃତ ଭାବେ ନିଶା ନିବାରଣ ସଚେତନତା।
ଜୁନ୍ ୨୨ (ପୂର୍ବାହ୍ନ ୧୧ ଟା) – ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟରେ ଅଧିକାରୀ ଓ କର୍ମଚାରୀଙ୍କ ଦ୍ୱାରା ନିଶାମୁକ୍ତି ଶପଥ ଗ୍ରହଣ।
ଜୁନ୍ ୨୩- ବିଭିନ୍ନ ସ୍ଥାନରେ ନିଶାଦ୍ରବ୍ୟ ବିରୋଧୀ ସଚେତନତା ଭିଡିଓ (ଡକ୍ୟୁମେଣ୍ଟାରୀ) ପ୍ରଦର୍ଶନ।
ଜୁନ୍ ୨୪ ସକାଳେ- ଜିଲ୍ଲା ମୁଖ୍ୟାଳୟରୁ ଏକତା ଛକ ପର୍ଯ୍ୟନ୍ତ ବିଶାଳ ଯୁବ ରାଲି ଓ ମାନବ ଶୃଙ୍ଖଳ।
ସନ୍ଧ୍ୟାରେ କଲ୍ୟାଣ ମଣ୍ଡପଠାରେ ପାରମ୍ପରିକ ଓ ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେବ।
ଜୁନ୍ ୨୫ – ନୂଆପଡ଼ା ବସ୍‌ଷ୍ଟାଣ୍ଡଠାରେ ମେଗା ସ୍ୱାସ୍ଥ୍ୟ ଶିବିର ଏବଂ ସଦ୍ଭାବନା ସଭାଗୃହଠାରେ ‘ମାନସିକ ଚାପ ପରିଚାଳନା’ ସମ୍ପର୍କିତ ସେମିନାର।
ଜୁନ୍ ୨୬- ମୁଖ୍ୟ ଦିବସ ଅବସରରେ ଜିଲ୍ଲାସ୍ତରୀୟ ପୁରସ୍କାର ବିତରଣ ଏବଂ ଭବ୍ୟ ଉଦ୍‌ଯାପନୀ ସମାରୋହ।
“ଏକ ସୁସ୍ଥ ଓ ନିଶାମୁକ୍ତ ସମାଜ ଗଠନ କରିବା ପାଇଁ ଜନସଚେତନତା ସବୁଠାରୁ ବଡ଼ ମାଧ୍ୟମ। ଏହି ଅଭିଯାନକୁ ସଫଳ କରିବାକୁ ହେଲେ ଜିଲ୍ଲାର ସମସ୍ତ ବିଭାଗ ମଧ୍ୟରେ ସମନ୍ୱୟ ଏବଂ ଜନସାଧାରଣଙ୍କ ସକ୍ରିୟ ସହଯୋଗ ନିହାତି ଜରୁରୀ।” ବୋଲି  ଜିଲ୍ଲାପାଳ ଶ୍ରୀ ଦାଶ ପ୍ରକାଶ କରିଛନ୍ତି।      ଏହି ଗୁରୁତ୍ୱପୂର୍ଣ୍ଣ ପ୍ରସ୍ତୁତି ବୈଠକରେ ଉପଜିଲ୍ଲାପାଳ ସୁର୍ମୀ ସୋରେନ, ଅବକାରୀ ଅଧୀକ୍ଷକ ସଙ୍ଗମିତ୍ରା ପ୍ରଧାନ, ଜିଲ୍ଲା ସମାଜ ମଙ୍ଗଳ ଅଧିକାରୀ ଏସ୍‌. ଗୀତାଙ୍କ ସମେତ ବିଭିନ୍ନ ବିଭାଗର ଜିଲ୍ଲାସ୍ତରୀୟ ଅଧିକାରୀ ଏବଂ ସ୍ଥାନୀୟ ବୁଦ୍ଧିଜୀବୀମାନେ ଉପସ୍ଥିତ ରହି ନିଜର ସୁଚିନ୍ତିତ ମତାମତ ଦେଇଥିଲେ।