ମୁଣ୍ଡାପଲା ଠାରେ ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ବହୁମୁଖି ଆଇନ ସଚେତନତା ଶିବିର ଅନୁଷ୍ଠିତ ।

ନୂଆପଡ଼ା -୨୦/୦୪- ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣ (ଡିଏଲଏସଏ) ଆନୁକୂଲ୍ୟରେ କୋମନା ବ୍ଲକ ଅନ୍ତର୍ଗତ ମୁଣ୍ଡାପଲା ପଞ୍ଚାୟତ ଉଚ୍ଚବିଦ୍ୟାଳୟ ପରିସରରେ ଏକ ବିଶାଳ ଆଇନ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ସାମାଜିକ ନ୍ୟାୟ ଏବଂ ସୁରକ୍ଷାକୁ ପ୍ରାଧାନ୍ୟ ଦେଇ ଆୟୋଜିତ ଏହି କାର୍ଯ୍ୟକ୍ରମରେ ବିଭିନ୍ନ ଗୁରୁତ୍ୱପୂର୍ଣ୍ଣ ଆଇନ ସମ୍ପର୍କରେ ଆଲୋକପାତ କରାଯାଇଥିଲା।
ଶିବିରରେ ମୁଖ୍ୟତଃ ନିମ୍ନଲିଖିତ ବିଷୟବସ୍ତୁ ଉପରେ ବିସ୍ତୃତ ଆଲୋଚନା କରାଯାଇଥିଲା ।
କାର୍ଯ୍ୟକ୍ଷେତ୍ରରେ ମହିଳାଙ୍କ ଯୌନ ଉତ୍ପୀଡ଼ନ ନିରାକରଣ ଆଇନ : ମହିଳାମାନଙ୍କୁ କାର୍ଯ୍ୟକ୍ଷେତ୍ରରେ ସୁରକ୍ଷିତ ପରିବେଶ ଯୋଗାଇଦେବା ଓ ସେମାନଙ୍କ ଅଧିକାର ବିଷୟରେ ଅବଗତ କରାଯାଇଥିଲା।
ଅନୁସୂଚିତ ଜାତି ଓ ଜନଜାତି (ଅତ୍ୟାଚାର ନିରାକରଣ) ଆଇନ : ସମାଜର ବଞ୍ଚିତ ଶ୍ରେଣୀ ଙ୍କୁ ସାମାଜିକ ନିର୍ଯାତନାରୁ ରକ୍ଷା କରିବା ପାଇଁ ଥିବା ଆଇନଗତ ବ୍ୟବସ୍ଥା ଉପରେ ଗୁରୁତ୍ୱାରୋପ କରାଯାଇଥିଲା।
ସାମ୍ପ୍ରତିକ ନ୍ୟାୟିକ ନିଷ୍ପତ୍ତି : ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ମାମଲା “ଶଶି ଓରଫ ଶାହୀ ଚିକନା ବିବେକାନନ୍ଦ ଯୁମାନୀ ବନାମ ମହାରାଷ୍ଟ୍ର ରାଜ୍ୟ (ଏସଏଲପି ୧୨୬୯୦/୨୦୨୫) ସମ୍ବନ୍ଧରେ ଉପସ୍ଥିତ ଜନସାଧାରଣ ଓ ଛାତ୍ରଛାତ୍ରୀଙ୍କୁ ଶିକ୍ଷା ଦିଆଯାଇଥିଲା। ବହୁମୁଖି ଆଇନ ସଚେତନତା ଶିବିର ରେ ଜିଲ୍ଲା ଆଇନ ସେବା ପ୍ରାଧିକରଣ ର ସଚିବ ନବନୀତା ଦାଶ ମୁଖ୍ୟ ଅତିଥି ଭାବେ ଯୋଗଦେଇ ଉପରୋକ୍ତ ଆଇନଗୁଡ଼ିକ ର ପ୍ରାସଙ୍ଗିକତା ଓ ବ୍ୟବହାରିକ ଦିଗ ଉପରେ ମାର୍ଗଦର୍ଶନ କରିଥିଲେ। ଅନ୍ୟମାନଙ୍କ ମଧ୍ୟରେ ଲଖନା ଥାନା ଭାରପ୍ରାପ୍ତ ଅଧିକାରୀ ରଞ୍ଜନ କୁମାର ନାୟକ
ସି.ଆର.ସି.ସି (ଲଖନା) ସୁଧୀର ନନ୍ଦ
ସ୍ଥାନୀୟ ମୁଣ୍ଡାପଲା ସରପଞ୍ଚ ରଜନୀ ମାଝୀ
ପି.ଇ.ଓ ଲଳିତ କୁମାର ସାହୁ
ଭାରପ୍ରାପ୍ତ ପ୍ରଧାନଶିକ୍ଷକ ତପନ କୁମାର ବହିଦାର
ଅଧିକାର ମିତ୍ର ଅଜୀମ ଅଲ୍ଲୀ
ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ ଓ ବହୁ ସଂଖ୍ୟାରେ ଛାତ୍ରଛାତ୍ରୀ ଏହି କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରିଥିଲେ।
କେବଳ ଆଇନ ସଚେତନତା ନୁହେଁ, ବରଂ ପରିବେଶ ସୁରକ୍ଷାର ସନ୍ଦେଶ ଦେଇ କାର୍ଯ୍ୟକ୍ରମ ଶେଷରେ ମୁଣ୍ଡାପଲା ଗ୍ରାମରେ ଏକ ପ୍ଲାଷ୍ଟିକ ଆବର୍ଜନା ସଫେଇ ଅଭିଯାନ ଆୟୋଜନ କରାଯାଇଥିଲା। ଏହି ଅଭିଯାନ ମାଧ୍ୟମରେ ପ୍ରାୟ ୧୨ କେଜି ପ୍ଲାଷ୍ଟିକ ଆବର୍ଜନା ସଂଗ୍ରହ କରାଯାଇ ଗ୍ରାମବାସୀଙ୍କୁ ପରିବେଶ ପ୍ରତି ସଚେତନ କରାଯାଇଥିଲା।
ଆଇନଗତ ଜ୍ଞାନ ସହିତ ସାମାଜିକ ଦାୟିତ୍ୱବୋଧର ଏହି ମିଳିତ ପ୍ରୟାସକୁ ସ୍ଥାନୀୟ ଅଞ୍ଚଳରେ ବେଶ ପ୍ରଶଂସା କରାଯାଇଛି।