ନୂଆପଡ଼ାରେ ଜିଲ୍ଲା ଶିଶୁ ସୁରକ୍ଷା ୟୁନିଟ୍‌ ର ସମୀକ୍ଷା ବୈଠକ : ଦୁଇ ଦମ୍ପତିଙ୍କୁ ପୋଷ୍ୟ ସନ୍ତାନ ପ୍ରମାଣପତ୍ର ପ୍ରଦାନ କଲେ ଜିଲ୍ଲାପାଳ।

ନୂଆପଡ଼ା- ୧୧/୬- ଜିଲ୍ଲାରେ ଶିଶୁମାନଙ୍କ ସୁରକ୍ଷା, ଶିକ୍ଷା ଓ ଅଧିକାରକୁ ଅଧିକ ସୁଦୃଢ଼ କରିବା ପାଇଁ ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ମୁଖ୍ୟାଳୟ ସମ୍ମିଳନୀ କକ୍ଷରେ ଆୟୋଜିତ ଜିଲ୍ଲା ଶିଶୁ ସୁରକ୍ଷା ୟୁନିଟ୍‌ (ଡିସିପିୟୁ)ର ଏହି ବୈଠକରେ ଶିଶୁ କଲ୍ୟାଣ ପାଇଁ ଅନେକ ବଡ଼ ନିଷ୍ପତ୍ତି ନିଆଯିବା ସହ ଦୁଇଜଣ ଅନାଥ ଶିଶୁଙ୍କୁ ନୂଆ ପରିବାର ମିଳିଛି।
ବୈଠକ ପ୍ରାରମ୍ଭରେ ଜିଲ୍ଲା ଶିଶୁ ସୁରକ୍ଷା ଅଧିକାରୀ ସୁଚିସ୍ମିତା ମାହାଉତି ସମସ୍ତଙ୍କୁ ସ୍ୱାଗତ ଜଣାଇବା ସହ ଜିଲ୍ଲାରେ ଚାଲିଥିବା ବିଭିନ୍ନ ଶିଶୁ ସୁରକ୍ଷା କାର୍ଯ୍ୟକ୍ରମର ଅଗ୍ରଗତି ସମ୍ପର୍କରେ ସୂଚନା ଦେଇଥିଲେ।
୮୧୧ ଶିଶୁଙ୍କ ଉପସ୍ଥାପନ:- ଚଳିତ ବର୍ଷ ଜିଲ୍ଲାରେ ମୋଟ ୮୧୧ ଜଣ ଶିଶୁଙ୍କୁ ଶିଶୁ କଲ୍ୟାଣ ସମିତି ସମ୍ମୁଖରେ ଉପସ୍ଥାପନ କରାଯାଇଛି।
ଚାଇଲ୍ଡ ହେଲ୍ପଲାଇନ୍‌ ର ସଫଳତା :- କେବଳ ମେ ମାସରେ ଚାଇଲ୍ଡ ହେଲ୍ପଲାଇନ୍‌ ମାଧ୍ୟମରେ ୯୯ ଜଣ ଶିଶୁଙ୍କୁ ଉଦ୍ଧାର କରାଯାଇ ଉପସ୍ଥାପନ କରାଯାଇଛି।
ଜିଲ୍ଲାରେ ଚିହ୍ନଟ ୧୮୭୭ ଜଣ ଏକକ ମାତାଙ୍କ ମଧ୍ୟରୁ ଏପ୍ରିଲ ସୁଦ୍ଧା ୬୩୬ ଜଣଙ୍କ ପଞ୍ଜୀକରଣ ଶେଷ ହୋଇଛି। ବାକି ହିତାଧିକାରୀଙ୍କ ପଞ୍ଜୀକରଣ କାର୍ଯ୍ୟକୁ ତୁରନ୍ତ ଶେଷ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି।
ଜିଲ୍ଲାପାଳଙ୍କ ପ୍ରମୁଖ ନିର୍ଦ୍ଦେଶ ଓ ଜନ କଲ୍ୟାଣକାରୀ ଯୋଜନା –
ପ୍ରବାସୀ ଶ୍ରମିକଙ୍କ ପିଲାଙ୍କ ପାଇଁ ସ୍ୱତନ୍ତ୍ର ସର୍ଭେ – ଆସନ୍ତା ବର୍ଷ ମାଟ୍ରିକ ପରୀକ୍ଷା ଦେବାକୁ ଥିବା ପ୍ରବାସୀ ଶ୍ରମିକ ପରିବାରର ଶିଶୁମାନଙ୍କ ପାଇଁ ଏକ ସ୍ୱତନ୍ତ୍ର ସର୍ଭେ କରି ରିପୋର୍ଟ ଦେବାକୁ ଜିଲ୍ଲା ଶିକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି, ଯଦ୍ୱାରା ସେମାନଙ୍କ ଶିକ୍ଷା ଜାରି ରହିପାରିବ।
ଶିଶୁ ମିତ୍ର ପୁରସ୍କାର – ଶିଶୁ ସୁରକ୍ଷା, ଶିକ୍ଷା, ସ୍ୱାସ୍ଥ୍ୟ ଏବଂ କଲ୍ୟାଣ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରୁଥିବା ବ୍ୟକ୍ତି ଓ ଅନୁଷ୍ଠାନକୁ “ଶିଶୁ ମିତ୍ର ପୁରସ୍କାର” ରେ ସମ୍ମାନିତ କରାଯିବ। ଏଥିପାଇଁ ଯୋଗ୍ୟ ପ୍ରାର୍ଥୀଙ୍କ ତାଲିକା ମଗାଯାଇଛି।
ଅବିବାହିତ ମାତୃତ୍ୱ ଙ୍କ ପିଲା ଙ୍କୁ ଶିକ୍ଷା ର ମୁଖ୍ୟ ସ୍ରୋତ – ୧୮ ବର୍ଷରୁ କମ୍ ଓ ଅଧିକ ବୟସର ଅବିବାହିତ ମାତୃତ୍ୱ ଙ୍କ ସମ୍ପର୍କରେ ସର୍ଭେ କରି ସେମାନଙ୍କ ପିଲାମାନଙ୍କୁ ନିକଟସ୍ଥ ସ୍କୁଲରେ ନାମଲେଖାଇ ସାଧାରଣ ଶିକ୍ଷାର ମୁଖ୍ୟସ୍ରୋତ ରେ ସାମିଲ କରିବାକୁ ଜିଲ୍ଲା ସାମାଜିକ ସୁରକ୍ଷା ଅଧିକାରୀଙ୍କୁ ଦାୟିତ୍ୱ ଦିଆଯାଇଛି।
ଦୁଇ ଅନାଥ ଶିଶୁଙ୍କୁ ମିଳିଲା ନୂଆ ପରିବାର ଓ ସୁରକ୍ଷିତ ଭବିଷ୍ୟତ।
ଉତ୍କଳ ବାଳାଶ୍ରମ ସ୍ପେଶାଲାଇଜ୍ଡ ଆଡପ୍ସନ୍ ଏଜେନ୍ସି (ଏସ୍‌ଏଏ), ନୂଆପଡ଼ା ପକ୍ଷରୁ ଚଳିତ ବର୍ଷର ୪ର୍ଥ ଓ ୫ମ ପୋଷ୍ୟ ଗ୍ରହଣ ପ୍ରକ୍ରିୟା ସଫଳତାର ସହ ସମ୍ପନ୍ନ ହୋଇଛି। ଚାଇଲ୍ଡ ହେଲ୍ପଲାଇନ୍ ଦ୍ୱାରା ଉଦ୍ଧାର ହୋଇଥିବା ଦୁଇ ଶିଶୁଙ୍କ ସମସ୍ତ ଆଇନଗତ ପ୍ରକ୍ରିୟା ଶେଷ ହେବା ପରେ ଜିଲ୍ଲାପାଳ ଶ୍ରୀ ଦାଶ ଦୁଇ ପୋଷ୍ୟ ସନ୍ତାନ ଗ୍ରହଣକାରୀ ଦମ୍ପତିଙ୍କୁ ଚୂଡ଼ାନ୍ତ ପ୍ରମାଣପତ୍ର ଓ ଆଦେଶ ପତ୍ର ପ୍ରଦାନ କରିଛନ୍ତି।
ଏହି ଦୁଇ ଶିଶୁଙ୍କ ମଧ୍ୟରୁ ଜଣକୁ ପଶ୍ଚିମବଙ୍ଗ ର ଏବଂ ଅନ୍ୟ ଜଣକୁ ଆନ୍ଧ୍ରପ୍ରଦେଶ ର ଏକ ସମ୍ଭ୍ରାନ୍ତ ପରିବାର ପୋଷ୍ୟ ସନ୍ତାନ ଭାବେ ଗ୍ରହଣ କରିଛନ୍ତି। ଶିଶୁ ଦୁଇଟି ଏକ ସୁରକ୍ଷିତ ଭବିଷ୍ୟତ ଓ ପରିବାରର ସ୍ନେହ ପାଇଥିବାରୁ ଜିଲ୍ଲାପାଳ ଗଭୀର ସନ୍ତୋଷ ବ୍ୟକ୍ତ କରିଛନ୍ତି।

ଏହି ଉଚ୍ଚସ୍ତରୀୟ ବୈଠକରେ ଶିଶୁ କଲ୍ୟାଣ ସମିତିର ଅଧ୍ୟକ୍ଷା ବବିତା ମିଶ୍ର, ଜିଲ୍ଲା ସମାଜ ମଙ୍ଗଳ ଅଧିକାରୀ ଏସ୍‌. ଗୀତା, ଜିଲ୍ଲା ଶିକ୍ଷା ଅଧିକାରୀ ଡଃ ପ୍ରଶାନ୍ତ କୁମାର ମହାନ୍ତି, ଅତିରିକ୍ତ ଜିଲ୍ଲା ମଙ୍ଗଳ ଅଧିକାରୀ କୌଶଲ୍ୟା ମାଝୀ, ଜିଲ୍ଲା ଶ୍ରମ ଅଧିକାରୀ ଜାସ୍ମିନ ସାହୁଙ୍କ ସମେତ କିଶୋର ନ୍ୟାୟ ବୋର୍ଡ (ଜେଜେବି)ର ପ୍ରତିନିଧି ଓ ଅନ୍ୟାନ୍ୟ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ।