ଜୁନାନୀ ସରକାରୀ ବିଦ୍ୟାଳୟ ଖେଳ ପଡିଆ ଭୂମୀ ଜାଲିଆତି : ୫ ଗିରଫ -ସବରେଜିଷ୍ଟ୍ରାର,ଆରଆଇ,କିରାଣୀ ଓ ଆଇନଜିବୀ ଙ୍କ ବିରୋଧ ରେ ତଦନ୍ତ ଓ କାର୍ଯ୍ୟାନୁଷ୍ଠାନ କେବେ ?

ନୂଆପଡ଼ା -୧୨/୩- ନୂଆପଡ଼ା ବ୍ଳକ୍ ଜୁନାନୀ ଗାଁର ସରକାରୀ ସ୍କୁଲ ଭୂମୀକୁ ଜାଲିଆତି କରି ହଡ଼ପ କରି ନିଆଯାଇଥିବା ଅଭିଯୋଗ ହୋଇଥିଲା| ଆଜି ଏହି ଘଟଣାରେ ପୁଲିସ୍ ୫ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତମାନେ ହେଲେ ଜୋଙ୍କ ଥାନା ଖରିଆର ରୋଡ଼ ଗୁରୁ ନାନକ ନଗରର ରାଜେଶ ଚୌବେ (୨୭), ପରମଜିତ ସିଂ ବଗା (୫୮), ଧରମବନ୍ଧା ଥାନା କେନ୍ଦୁବାହାରା ଗାଁର ମାନ ବାଈ ରାଉତ (୫୫), ଭରତ ମାଝୀ (୫୬) ଓ ନେମି ଚନ୍ଦ ହରିଜନ (୫୪) ଉପରୋକ୍ତ ଅଭିଯୁକ୍ତ ଙ୍କ ଜାମିନ ନାମଞ୍ଜୁର ହେବାରୁ ଅଭିଯୁକ୍ତମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏହାର ଅଧିକ ତଦନ୍ତ ଜାରି ରହିଥିବା ନୂଆପଡ଼ା ଥାନା ଆଇଆଇସି ଗଙ୍ଗାଧର ମେହେର ସୂଚନା ପ୍ରଦାନ କରିଛନ୍ତି। ଖେଳ ପଡିଆ ଭୂମି ଜାଲିଆତି ମାମଲାରେ ଜମି ମାଫିଆ ଗିରଫ ହୋଇଥିବା ବେଳେ ଉପରୋକ୍ତ କେସ ରେ ସମ୍ପୃକ୍ତ ସବ୍‌ ରେଜିଷ୍ଟ୍ରାର, କିରାଣି, ରାଜସ୍ବ ନିରୀକ୍ଷକ, ଓକିଲଙ୍କ ବିରୋଧରେ ଆଇନଗତ କାର୍ଯ୍ୟନୁଷ୍ଠାନ କେବେ ଗ୍ରହଣ କରାଯିବ ବୋଲି ଜୁନାନି ଗ୍ରାମବାସୀ ପ୍ରଶ୍ନ କରିଛନ୍ତି ?
ସୂଚନା ଅନୁସାରେ, ଜୁନାନୀ ଗାଁର ସ୍ବର୍ଗତ କାରାବାଈ ରାଉତ ନିଃସନ୍ତାନ ଥିଲେ। ୧୯୭୫ରେ ଗାଁର ଚନ୍ଦ୍ରମଣି ଖର୍ସେଲଙ୍କୁ ସେ ପୌଷ୍ୟ ସନ୍ତାନ ଭାବେ ଗ୍ରହଣ କରିଥିଲେ। କାରାବାଈ ଙ୍କ ନାଁରେ ୨ ଏକର ୬୩ ଡିସିମିଲ ଜମି ଥିଲା। ଏହାକୁ ଚନ୍ଦ୍ରମଣି ଙ୍କ ନାଁରେ ସେ ରେଜିଷ୍ଟ୍ରି କରି ଦେଇଥିଲେ। ୨୦୧୮ରେ ଚନ୍ଦ୍ରମଣି ସେହି ଜମିକୁ ସ୍କୁଲ ଖେଳପଡ଼ିଆ ପାଇଁ ଦାନ କରିଥିଲେ । ଗତ ଜାନୁଆରି ୨୭ ରେ କାରାବାଈ ଙ୍କ ମୃତ୍ୟୁର ୪୫ ବର୍ଷ ପରେ ତାଙ୍କୁ ଜୀବିତ ଦର୍ଶାଇ ଜମି ବିକ୍ରି କରାଯାଇଥିଲା। ଧରମବନ୍ଧା ଥାନା କେନ୍ଦୁବାହାରା ଗାଁର ନକଲି କାରାବାଈ ଙ୍କୁ ନୂଆପଡ଼ା ଉପ ନିବନ୍ଧକଙ୍କ କାର୍ଯ୍ୟାଳୟରେ ଉପସ୍ଥିତ କରାଇ ଖରିଆରରୋଡ଼ ସହରର ଧର୍ମେନ୍ଦ୍ର ବଗା ଓ ସନ୍ତୋଷିନୀ ବଗା ତାଙ୍କ ସମ୍ପର୍କୀୟଙ୍କ ନାଁରେ ଜମିକୁ ରେଜେଷ୍ଟ୍ରି କରି ନେଇଥିଲେ। ଏଥିରେ ୧ ଏକର ୧୬ ଡିସିମିଲ ଖେଳପଡ଼ିଆ ଓ ୧ ଏକର ୪୭ ଡିସିମିଲ ଚନ୍ଦ୍ରମଣି ଙ୍କ ଚାଷଜମି ରହିଥିଲା। ଏପରିକି ପଞ୍ଜୀକରଣ ର ୧ ସପ୍ତାହ ପରେ ସେମାନେ ଜମିର ପଟ୍ଟା ବି କରାଇ ନେଇଥିଲେ। ଫେବ୍ରୁଆରି ୨୪ ରେ ଚନ୍ଦ୍ରମଣି ନିଜ ଚାଷଜମିରେ ଛିଡ଼ା ହୋଇଥିବା ବେଳେ ଧର୍ମେନ୍ଦ୍ର ଓ ସନ୍ତୋଷିନୀ ଆସି ଗାଳିଗୁଲଜ କରିଥିଲେ ବୋଲି ଅଭିଯୋଗ ହୋଇଥିଲା। ଏହା ତାଙ୍କର ଚାଷଜମି ବୋଲି ଦାବିକରି ଧମକଚମକ ଦେଇଥିଲେ । ଏହାପରେ ଚନ୍ଦ୍ରମଣି ନୂଆପଡ଼ା ଥାନାର ଦ୍ବାରସ୍ଥ ହୋଇଥିଲେ କିନ୍ତୁ ନୂଆପଡ଼ା ପୁଲିସ କୌଣସି ପଦକ୍ଷେପ ଗ୍ରହଣ କରିନଥିଲା ବୋଲି ଅଭିଯୋଗ ହେଉଛି । ଏହାକୁ ନେଇ ଗ୍ରାମବାସୀ ଅସନ୍ତୋଷ ପ୍ରକାଶ କରିଥିଲେ | ଚଳିତ ମାସ ୨ ମାର୍ଚ୍ଚ ୨୦୨୬ ତାରିଖ ଦିନ ରେ ଜିଲ୍ଲା କଂଗ୍ରେସ ସଭାପତି ଘାସିରାମ ମାଝୀଙ୍କ ନେତୃତ୍ବରେ ଗାଁର ଶତାଧିକ ପୁରୁଷ, ମହିଳା ଓ ଛାତ୍ରଛାତ୍ରୀ ଏକ ଶୋଭା ଯାତ୍ରା ରେ ଆସି ଜିଲ୍ଲାପାଳଙ୍କ ଅଫିସ ଘେରାଉ କରିବା ସହ ବିକ୍ଷୋଭ ଓ ପ୍ରତିବାଦ କରି ସମ୍ୟକ ଧାରଣା ମଧ୍ୟ ଦେଇଥିଲେ । ଏହା ପରେ ଗତକାଲି ନୂଆପଡ଼ା ପୁଲିସ୍ ଏହି ଘଟଣାରେ ଅଭିଯୁକ୍ତମାନଙ୍କୁ ଗିରଫ କରିଥିବା ବେଳେ ଜମି ଜାଲିଆତିର ମୁଖ୍ୟ ଷଡ଼ଯନ୍ତ୍ରକାରୀମାନେ ଏବେ ବି ବାହାରେ ନିର୍ଭୟ ରେ ବିଚରଣ କରୁଥିବା ଅଭିଯୋଗ ହୋଇଛି।