ନୂଆପଡ଼ା ଜିଲ୍ଲା ସ୍ୱାସ୍ଥ୍ୟ ସମୀକ୍ଷା : ସିକିଲ୍ ସେଲ୍ ନିୟନ୍ତ୍ରଣ ଓ ମାତୃ ସ୍ୱାସ୍ଥ୍ୟ ଉପରେ ଜିଲ୍ଲାପାଳଙ୍କ ଗୁରୁତ୍ୱ।

ନୂଆପଡ଼ା -୩୦/୪- ନୂଆପଡ଼ା ଜିଲ୍ଲା ସ୍ୱାସ୍ଥ୍ୟ ସେବାରେ ବ୍ୟାପକ ସଂସ୍କାର ଓ ସିକିଲ୍ ସେଲ୍ ଭଳି ଗମ୍ଭୀର ରୋଗର ମୂଳୋତ୍ପାଟନ ପାଇଁ ପ୍ରଶାସନ ତତ୍ପରତା ପ୍ରକାଶ କରିଛି। ଆଜି ଜିଲ୍ଲା ମୁଖ୍ୟାଳୟ ସମ୍ମିଳନୀ କକ୍ଷରେ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜିଲ୍ଲାସ୍ତରୀୟ ସ୍ୱାସ୍ଥ୍ୟ ସମୀକ୍ଷା ବୈଠକରେ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି।
ସିକିଲ୍ ସେଲ୍ ମୁକ୍ତ ଅଭିଯାନ ଓ ନୂତନ ରଣନୀତି
ଜିଲ୍ଲାରେ ସିକିଲ୍ ସେଲ୍ ରୋଗର ନିୟନ୍ତ୍ରଣ ପାଇଁ ଜିଲ୍ଲାପାଳ ଏକ ବ୍ୟାପକ ରୋଡମ୍ୟାପ୍ ପ୍ରସ୍ତୁତ କରିଛନ୍ତି।
ଘରକୁ ଘର ସର୍ଭେ : ଏଏନଏମ  ଓ ଅଙ୍ଗନବାଡ଼ି କର୍ମୀଙ୍କ ସହାୟତାରେ ଜିଲ୍ଲାବ୍ୟାପୀ ସର୍ଭେ କରାଯାଇ ରୋଗୀ ଚିହ୍ନଟ କରାଯିବ।
ନବ ଦମ୍ପତିଙ୍କ ପରୀକ୍ଷା : ଜିଲ୍ଲାରେ ସମସ୍ତ ନବ ବିବାହିତ ଦମ୍ପତିଙ୍କର ରକ୍ତ ସିକୁଳି ପରୀକ୍ଷା ବାଧ୍ୟତାମୂଳକ କରାଯିବ।
ସିକିଲ୍ ସେଲ୍ ପୀଡ଼ିତ ମହିଳାଙ୍କ ପାଇଁ ଗର୍ଭଧାରଣ ବିପଜ୍ଜନକ ହୋଇଥିବାରୁ, ସେମାନଙ୍କୁ ପୋଷ୍ୟ ସନ୍ତାନ ଗ୍ରହଣ କରିବା ପାଇଁ ସ୍ୱତନ୍ତ୍ର ପରାମର୍ଶ ଓ ସଚେତନତା କାର୍ଯ୍ୟକ୍ରମ ଆୟୋଜନ କରାଯିବ।
ସ୍ୱାସ୍ଥ୍ୟ ସେବାରେ ସ୍ୱଚ୍ଛତା ଓ କଠୋର ଆଭିମୁଖ୍ୟ
ଜିଲ୍ଲାରେ ଲିଙ୍ଗ ଅନୁପାତରେ ସୁଧାର ଆଣିବା ପାଇଁ ଜିଲ୍ଲାପାଳ ‘ଲିଙ୍ଗ ନିରୂପଣ’ ପରି ବେଆଇନ କାର୍ଯ୍ୟ ବିରୋଧରେ କଡ଼ା ଚେତାବନୀ ଦେଇଛନ୍ତି।
ଚଢ଼ାଉ ନିର୍ଦ୍ଦେଶ : ସ୍ୱାସ୍ଥ୍ୟ ବିଭାଗର ଏକ ସ୍ୱତନ୍ତ୍ର ଟିମ୍ ବିଭିନ୍ନ ଘରୋଇ କ୍ଲିନିକ ଓ ଔଷଧ ଦୋକାନ ଉପରେ ନିୟମିତ ଚଢ଼ାଉ କରିବାକୁ ନିର୍ଦ୍ଦେଶ ଦିଆଯାଇଛି।
ଦକ୍ଷତା ବୃଦ୍ଧି : ସ୍ୱାସ୍ଥ୍ୟ କର୍ମୀଙ୍କୁ ସରକାରୀ ଯୋଜନା ବିଷୟରେ ଅପଡେଟ୍ ରଖିବା ପାଇଁ ପ୍ରତି ମାସରେ ସେମାନଙ୍କର ଏକ ପରୀକ୍ଷା କରାଯିବ।
ସଫଳତାର ପରିସଂଖ୍ୟାନ
ବୈଠକରେ ଜିଲ୍ଲାର ସ୍ୱାସ୍ଥ୍ୟ ସୂଚକାଙ୍କରେ ହୋଇଥିବା ଉନ୍ନତି ସମ୍ପର୍କରେ ତଥ୍ୟ ରଖାଯାଇଥିଲା।
୨୦୨୫-୨୬ ମସିହାରେ ମୋଟ ଇନ୍‌ଷ୍ଟିଟ୍ୟୁସନାଲ ଡେଲିଭରି ୯୨୬୮କୁ ବୃଦ୍ଧି ପାଇଥିବାବେଳେ ସି-ସେକ୍ସନ ହାର ପ୍ରାୟ ୩୦ ପ୍ରତିଶତ ରହିଛି।
ସି-ସେକ୍ସନ ପ୍ରସବ ହାରକୁ ବିଶ୍ୱ ସ୍ୱାସ୍ଥ୍ୟ ସଂଗଠନର ମାନଦଣ୍ଡ ଅନୁସାରେ ୨୦ ପ୍ରତିଶତକୁ ହ୍ରାସ କରିବା ପାଇଁ ସମସ୍ତ ସ୍ୱାସ୍ଥ୍ୟ କେନ୍ଦ୍ରକୁ ନିର୍ଦ୍ଦେଶ ଦିଆଯାଇଛି।
ଆଗାମୀ ଗ୍ରୀଷ୍ମ ଲହରୀକୁ ମୁକାବିଲା କରିବା ପାଇଁ ସ୍ୱାସ୍ଥ୍ୟ ବିଭାଗ ସମ୍ପୂର୍ଣ୍ଣ ପ୍ରସ୍ତୁତ ଥିବା ବୈଠକରେ ଜଣାପଡ଼ିଛି। ଏହା ସହିତ କିଶୋରୀମାନଙ୍କ ମଧ୍ୟରେ ଜରାୟୁ ମୁଖ କର୍କଟ ରୋକିବା ପାଇଁ ୧୦୦% ଏଚପିଭି  ଟିକାକରଣ ସୁନିଶ୍ଚିତ କରିବାକୁ ଜିଲ୍ଲା ଶିକ୍ଷା ଓ କଲ୍ୟାଣ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି।
ଏହି ସମୀକ୍ଷା ବୈଠକରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା. ଦ୍ୱାରିକାନାଥ ସତପଥୀ, ଡିପିଏମଓ ସତ୍ୟନାରାୟଣ ତ୍ରିପାଠୀ, ଏବଂ ଅନ୍ୟାନ୍ୟ ବରିଷ୍ଠ ଚିକିତ୍ସା ଅଧିକାରୀମାନେ ଉପସ୍ଥିତ ରହି ନିଜ ନିଜ ବିଭାଗର ଅଗ୍ରଗତି ଉପସ୍ଥାପନ କରିଥିଲେ।