ଜିଲ୍ଲାସ୍ତରୀୟ ଆଇ ସି ଡ଼ି ଏସ ସମୀକ୍ଷା ବୈଠକ : ଶିଶୁ ଓ ମାତୃ ସ୍ୱାସ୍ଥ୍ୟ ସେବାକୁ ଅଧିକ କ୍ରିୟାଶୀଳ କରିବାକୁ ଜିଲ୍ଲାପାଳଙ୍କ ନିର୍ଦ୍ଦେଶ।

ନୂଆପଡ଼ା -୩୦/୪- ନୂଆପଡ଼ା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ସମନ୍ୱିତ ଶିଶୁ ବିକାଶ ଯୋଜନା (ଆଇ ସି ଡ଼ି ଏସ) ର ଏକ ଗୁରୁତ୍ୱପୂର୍ଣ୍ଣ ଜିଲ୍ଲାସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଜିଲ୍ଲାରେ ଚାଲୁଥିବା ବିଭିନ୍ନ ପ୍ରକଳ୍ପର କାର୍ଯ୍ୟଦକ୍ଷତା, ଆଧାର ସଂଯୋଗୀକରଣ ଏବଂ ଭିତ୍ତିଭୂମିର ବିକାଶ ଉପରେ ପୁଙ୍ଖାନୁପୁଙ୍ଖ ଆଲୋଚନା କରାଯାଇଛି।

ଜିଲ୍ଲାରେ ଆଇ ସି ଡି ଏସ ଯୋଜନାରେ ସମୁଦାୟ ୭୬,୦୨୬ ଜଣ ହିତାଧିକାରୀ ପଞ୍ଜିକୃତ ହୋଇଛନ୍ତି। ସବୁଠାରୁ ଉଲ୍ଲେଖନୀୟ ବିଷୟ ହେଉଛି, ଏହି ସମସ୍ତ ହିତାଧିକାରୀଙ୍କ ୧୦୦ ପ୍ରତିଶତ ଆଧାର ଅପଡେଟ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ରିପୋର୍ଟ ପ୍ରଦାନ କରାଯାଇଛି। ବ୍ଲକ୍ ଅନୁଯାୟୀ ହିତାଧିକାରୀଙ୍କ ସଂଖ୍ୟା ନିମ୍ନରେ ପ୍ରଦତ୍ତ:
ନୂଆପଡ଼ା- ୧୯,୮୧୫
କୋମନା- ୧୬,୩୧୭
ଖରିଆର- ୧୪,୯୪୫
ସିନାପାଲି -୧୩,୨୮୭
ବୋଡେନ- ୧୦,୬୬୨ ସବୁ ମିଶାଇ ଜିଲ୍ଲା ରେ ମୋଟ ୭୬୦୨୬ ହିତାଧିକାରୀ ଅଛନ୍ତ।
ବୈଠକରେ ଜିଲ୍ଲାର କର୍ମଚାରୀ ନିଯୁକ୍ତି ସମ୍ପର୍କରେ ସୂଚନା ଦିଆଯାଇଥିଲା। ସି ଡ଼ି ପି ଓ ସ୍ତରରେ ସମସ୍ତ ୫ଟି ପଦବୀ ପୂରଣ ହୋଇଥିବା ବେଳେ, ସୁପରଭାଇଜର କ୍ଷେତ୍ରରେ ୫୫ଟି ପଦବୀରୁ ୨୫ଟି ପଦବୀ ଖାଲି ରହିଛି। ସେହିପରି ଆଙ୍ଗନବାଡ଼ି କର୍ମୀ ଓ ସହାୟିକା ପଦବୀ ପ୍ରାୟତଃ ପୂରଣ ହୋଇଥିବା ଜଣାପଡ଼ିଛି।
ଆଙ୍ଗନବାଡ଼ି କେନ୍ଦ୍ର ସ୍ଥିତି
ମୋଟ କେନ୍ଦ୍ର ସଂଖ୍ୟା: ୧୪୦୮
ନିଜସ୍ୱ ଗୃହରେ ପରିଚାଳିତ ୧୨୦୪ କେନ୍ଦ୍ର
ଭଡ଼ା ଘର ଓ ଅନ୍ୟାନ୍ୟ ଭବନ ୧୭୭ ଓ ନିର୍ମାଣାଧୀନ ରହିଛି ୭୯ ଗୋଟି।
ଉଲ୍ଲେଖନୀୟ କାର୍ଯ୍ୟ ପାଇଁ କର୍ମଚାରୀ ଓ ହିତାଧିକାରୀଙ୍କୁ ପୁରସ୍କୃତ କରାଯାଇଥିଲା:
ଶ୍ରେଷ୍ଠ କର୍ମୀ ରୁପେ ସାଲେପଡ଼ା କେନ୍ଦ୍ରର ନିର୍ଗୁଣୀ ଦଳ (୧୦୦% ପ୍ରି-ସ୍କୁଲ୍ ଉପସ୍ଥାପନା ପାଇଁ)।
ଶ୍ରେଷ୍ଠ ପୋଷଣ ବାଟିକା ନିମନ୍ତେ ଚନାମୁଣ୍ଡା କେନ୍ଦ୍ରର ସୁଭଦ୍ରା ମାଝୀ।
ଶ୍ରେଷ୍ଠ ଶାଶୁ-ବହୁ ଆଶୋକ କୁମାରୀ ସାହୁ ଓ ରୀମା ସାହୁ।
ଶ୍ରେଷ୍ଠ ଦମ୍ପତି ରୁପେ ପୂଜା ରାଣୀ ନାୟକ ଓ ନଦ୍ଦକୁ ଡୋଙ୍ଗ୍ରୀ।
“ଜିଲ୍ଲାରେ ଶିଶୁ ଏବଂ ମାତୃ ସ୍ୱାସ୍ଥ୍ୟର ଉନ୍ନତି ପାଇଁ ସମସ୍ତ ବିଭାଗ ମଧ୍ୟରେ ସମନ୍ୱୟ ରହିବା ଜରୁରୀ। ଆମକୁ ଶତପ୍ରତିଶତ ସେବା ପ୍ରଦାନ ଉପରେ ଗୁରୁତ୍ୱ ଦେବାକୁ ହେବ।” ବୋଲି ଜିଲ୍ଲାପାଳ ଶ୍ରୀ ଦାଶ ଗୁରୁତ୍ୱାରୋପ କରିଥିଲେ ।
ଏହି ବୈଠକରେ ଉପ-ଜିଲ୍ଲାପାଳ ସୂର୍ମି ସୋରେନ, ଜିଲ୍ଲା ସମାଜ କଲ୍ୟାଣ ଅଧିକାରୀ ଏସ୍‌. ଗୀତା ଏବଂ ବିଭିନ୍ନ ବ୍ଲକର ସିଡ଼ିପିଓ ଓ ସୁପରଭାଇଜରମାନେ ଉପସ୍ଥିତ ଥିଲେ। ଶେଷରେ ଧନ୍ୟବାଦ ଅର୍ପଣ ସହ ବୈଠକ ସାଙ୍ଗ ହୋଇଥିଲା।