କୋମନା ରେ ଜିଲ୍ଲାପାଳଙ୍କ ମିଳିତ ଅଭିଯୋଗ ଶୁଣାଣି ଶିବିର : ୫୯ ଟି ମାମଲାର ବିଚାର, ବିଭିନ୍ନ ଜନ କଲ୍ୟାଣକାରୀ କାର୍ଯ୍ୟକ୍ରମ ।

ନୂଆପଡ଼ା -୧୮/୦୫ – ନୂଆପଡ଼ା ଜିଲ୍ଲା କୋମନା ବ୍ଲକ ପରିସରରେ ଜିଲ୍ଲା ପ୍ରଶାସନ ତରଫରୁ ଏକ ଜିଲ୍ଲାପାଳଙ୍କ ମିଳିତ ଅଭିଯୋଗ ଶୁଣାଣି ଶିବିର ସଫଳତାର ସହ ଅନୁଷ୍ଠିତ ହୋଇଯାଇଛି। ଏହି ଶିବିରରେ ଜିଲ୍ଲାପାଳ ମଧୁସୂଦନ ଦାଶ ମୁଖ୍ୟ ଭାବେ ଯୋଗଦେଇ ଜନସାଧାରଣଙ୍କ ବିଭିନ୍ନ ସମସ୍ୟାର ସିଧାସଳଖ ଶୁଣାଣି କରିଛନ୍ତି।

୫୯ଟି ଅଭିଯୋଗର ଶୁଣାଣି ଓ ତତ୍କାଳ ସହାୟତା।
ଆଜିର ଏହି ଶିବିରରେ ମୋଟ ୫୯ଟି ଅଭିଯୋଗ ପତ୍ର ଗ୍ରହଣ କରାଯାଇଥିଲା। ସେଥିମଧ୍ୟରୁ ୫୦ଟି ବ୍ୟକ୍ତିଗତ ସମସ୍ୟା ଭିତ୍ତିକ ହୋଇଥିବା ବେଳେ ୯ଟି ଗୋଷ୍ଠୀଗତ ସମସ୍ୟା ରହିଥିଲା। ଜିଲ୍ଲାପାଳ ପ୍ରତ୍ୟେକ ଅଭିଯୋଗକୁ ଗମ୍ଭୀରତାର ସହ ଶୁଣିବା ସହ ସେଗୁଡ଼ିକର ସମାଧାନ ପାଇଁ ସଂପୃକ୍ତ ଜିଲ୍ଲା ସ୍ତରୀୟ ଅଧିକାରୀମାନଙ୍କୁ ତୁରନ୍ତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି। ଏହି ଅବସରରେ ଜଣେ ଅସହାୟ ବ୍ୟକ୍ତିଙ୍କୁ ମୁଖ୍ୟମନ୍ତ୍ରୀ ସହାୟତା ପାଣ୍ଠିରୁ ୫ ହଜାର ଟଙ୍କାର ଆର୍ଥିକ ସହାୟତା ତତ୍କାଳ ପ୍ରଦାନ କରାଯାଇଥିଲା।
ଏହି ସମୀକ୍ଷା ଓ ଶୁଣାଣି ଶିବିରରେ ଜିଲ୍ଲାପାଳଙ୍କ ସହ ଅଜିଜ ଖାନ (ବନଖଣ୍ଡ ଅଧିକାରୀ)
ଲମ୍ବୋଦର ଧରୁଆ (ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ),
ସୁର୍ମି ସୋରେନ୍ (ଉପ-ଜିଲ୍ଲାପାଳ) ଓ
ଡଃ ଦ୍ବାରିକାନାଥ ଶତପଥୀ (ଜିଲ୍ଲା ମୁଖ୍ୟ ଚିକିତ୍ସାଧିକାରୀ) ପ୍ରମୁଖ ମଞ୍ଚାସୀନ ଥିଲେ।
ଡେପୁଟୀ ଜିଲ୍ଲାପାଳ ଚିନ୍ମୟ ସାଗର ଶିବିରର ସୂଚାରୁ ପରିଚାଳନାରେ ପ୍ରମୁଖ ସହଯୋଗ କରିଥିଲେ। ଏଥିସହିତ ସମସ୍ତ ଜିଲ୍ଲା ସ୍ତରୀୟ ଅଧିକାରୀ, ବିଭିନ୍ନ ବିଭାଗର ଯନ୍ତ୍ରୀ, ଲାଇନ୍ ବିଭାଗର ଅଧିକାରୀ, ବ୍ଲକ ସ୍ତରୀୟ କର୍ମଚାରୀ ଓ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ।
ସ୍ଵାସ୍ଥ୍ୟ ଶିବିର ଓ ବ୍ୟାପକ ସଚେତନତା କାର୍ଯ୍ୟକ୍ରମ।
ଏହି ଅଭିଯୋଗ ଶୁଣାଣି ଅବସରରେ ବ୍ଲକ୍ ପରିସରରେ ବରିଷ୍ଠ ନାଗରିକମାନଙ୍କ ପାଇଁ ଏକ ସ୍ୱତନ୍ତ୍ର ସ୍ଵାସ୍ଥ୍ୟ ଶିବିର ତଥା ‘ଆୟୁଷ୍ମାନ ଆରୋଗ୍ୟ ଶିବିର’- ଆୟୋଜନ କରାଯାଇ ମାଗଣା ଚିକିତ୍ସା ଓ ପରାମର୍ଶ ଦିଆଯାଇଥିଲା।ଜଟଗଡ ଗ୍ରାମ ପଞ୍ଚାୟତରେ ଏହି ଅବସରରେ ଏକାଧିକ ସାମାଜିକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ “ପ୍ରବାସୀ ଶ୍ରମିକ ସଚେତନତା ଶିବିର”, ପରିବେଶ ସୁରକ୍ଷା ପାଇଁ “ଝିଅ ପାଇଁ ଗଛଟିଏ”, ମାତୃ ଓ ଶିଶୁ ସ୍ଵାସ୍ଥ୍ୟ ପାଇଁ “ଗର୍ଭସ୍ଥ ଶିଶୁ ପାଇଁ ଦିନଟିଏ” ଏବଂ “ପ୍ଲାଷ୍ଟିକ ମୁକ୍ତ ଅଭିଯାନ” ସାମିଲ ଥିଲା। ଏହା ସହିତ ଗୃହପାଳିତ ପଶୁପକ୍ଷୀଙ୍କ ସ୍ଵାସ୍ଥ୍ୟ ରକ୍ଷା ପାଇଁ ପ୍ରାଣୀ ସମ୍ପଦ ବିଭାଗ ପକ୍ଷରୁ “ପ୍ରାଣୀ ପାଇଁ ଦିନଟିଏ” ଶୀର୍ଷକ ଏକ ସ୍ୱତନ୍ତ୍ର ଚିକିତ୍ସା ଶିବିର ମଧ୍ୟ ଆୟୋଜିତ ହୋଇଯାଇଛି।ଜିଲ୍ଲା ପ୍ରଶାସନର ଏଭଳି ମିଳିତ ପ୍ରୟାସ ଓ ଜନହିତକର କାର୍ଯ୍ୟକ୍ରମକୁ ସ୍ଥାନୀୟ ଅଞ୍ଚଳରେ ବେଶ୍ ପ୍ରଶଂସା କରାଯାଇଛି।