ଖଡ଼ିଆଳ କେନ୍ଦୁପତ୍ର ରେଞ୍ଜ ରେ ଶ୍ରମିକ ଅସନ୍ତୋଷ : ହକ୍‌ରୁ ବଞ୍ଚିତ ବନ୍ଧାଳୀ, ମୌଳିକ ସୁବିଧା ପାଲଟିଛି ସାତସପନ!

ନୂଆପଡ଼ା ୧୧/୦୭ – ନୂଆପଡ଼ା ଜିଲ୍ଲା ଖଡ଼ିଆଳ କେନ୍ଦୁପତ୍ର ରେଞ୍ଜ ଅଧୀନରେ ଥିବା ବିଭିନ୍ନ ଫଡ଼ିରେ ବର୍ତ୍ତମାନ କେନ୍ଦୁପତ୍ର ବନ୍ଧା କାର୍ଯ୍ୟ ଜୋରସୋର ରେ ଚାଲିଛି। ଏହି ରେଞ୍ଜ ଅଧୀନରେ ଥିବା ୫୩ ଟି ଫଡ଼ିରେ ୭ଟି ବନ୍ଧାଳୀ ପାର୍ଟିର ପ୍ରାୟ ୧୦୫ ଜଣ ଶ୍ରମିକ ନିୟୋଜିତ ଅଛନ୍ତି। ଦୂରଦୂରାନ୍ତରୁ ନିଜ ପରିବାର ସହ ଆସିଥିବା ଏହି ଶତାଧିକ ବନ୍ଧାଳୀ ଦିନରାତି ଏକ କରି କେନ୍ଦୁପତ୍ର ବଛାବଛି ଓ ବନ୍ଧା କାମରେ ଲାଗିଛନ୍ତି। ସକାଳୁ ସଞ୍ଜ ପର୍ଯ୍ୟନ୍ତ କଠିନ ପରିଶ୍ରମ କରି ସେମାନେ ପ୍ରତିଟି କେରି ପ୍ରସ୍ତୁତ କରୁଛନ୍ତି, ହେଲେ ଏହି ଗରିବ ଶ୍ରମିକଙ୍କ ଝାଳବୁହା ଧନକୁ ନେଇ ଏବେ ସାଂଘାତିକ ଅଭିଯୋଗ ସାମ୍ନାକୁ ଆସିଛି।
ବୋନସ ଟଙ୍କା ହଡ଼ପ ଅଭିଯୋଗ। କାହା ପକେଟକୁ ଯାଉଛି ଗରିବଙ୍କ ପ୍ରାପ୍ୟ ?
ସରକାରୀ ନିୟମ ଅନୁସାରେ, ଶ୍ରମିକମାନଙ୍କୁ ପ୍ରତି କେରି ପିଛା ୯୫ ଟଙ୍କା ମଜୁରି ସହ ୫ ଟଙ୍କା ବୋନସ ମିଳିବାର ବ୍ୟବସ୍ଥା ରହିଛି। ଅର୍ଥାତ୍ ପ୍ରତି କେରି ପାଇଁ ସେମାନେ ୧୦୦ ଟଙ୍କା ପାଇବା କଥା। କିନ୍ତୁ ବନ୍ଧାଳୀ ଙ୍କ ଅଭିଯୋଗ ଅନୁଯାୟୀ, ସେମାନଙ୍କୁ କେବଳ ୯୫ ଟଙ୍କା ଦିଆଯାଉଛି ଏବଂ ପ୍ରାପ୍ୟ ୫ ଟଙ୍କାର ବୋନସ ପ୍ରଦାନ କରାଯାଉନାହିଁ। ଅତ୍ୟନ୍ତ କଷ୍ଟକର ପରିଶ୍ରମ ପରେ ମଧ୍ୟ ସରକାରଙ୍କ ନିର୍ଦ୍ଧାରିତ ପ୍ରାପ୍ୟରୁ ସେମାନଙ୍କୁ ବଞ୍ଚିତ କରାଯାଉଥିବାରୁ ଶ୍ରମିକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହି ବୋନସ ଟଙ୍କା କୁଆଡ଼େ ଯାଉଛି ଏବଂ କିଏ ଏହାକୁ ମାରି ଖାଉଛି, ତାହା ଏବେ ଏକ ବଡ଼ ତଦନ୍ତ ସାପେକ୍ଷ ବିଷୟ ପାଲଟିଛି।
କେବଳ ପ୍ରାପ୍ୟ ନୁହେଁ, ଫଡ଼ିରେ କାମ କରୁଥିବା ବନ୍ଧାଳୀ ଓ ସେମାନଙ୍କ ପରିବାରର ଜୀବନଯାପନ ମଧ୍ୟ ବେଶ୍ କଷ୍ଟଦାୟକ ହୋଇପଡ଼ିଛି। ମୌଳିକ ସୁବିଧା କହିଲେ କିଛି ନାହିଁ। ଶ୍ରମିକମାନେ ଫଡ଼ି ବାରଣ୍ଡାରେ ପଲିଥିନ ତଳେ ମୁଣ୍ଡ ଗୁଞ୍ଜି ରାତି ବିତାଉଛନ୍ତି। ପିଇବା ପାଣିର ସୁବିଧା ନଥିବାରୁ ମାଇଲ୍ ମାଇଲ୍ ଦୂରରୁ ପାଣି ବୋହି ଆଣିବାକୁ ପଡ଼ୁଛି। ରାତି ହେଲେ ବିଦ୍ୟୁତ୍ ଆଲୋକ ନଥାଏ, ଫଳରେ ଘନ ଅନ୍ଧାର ଓ ବିଷାକ୍ତ କୀଟପତଙ୍ଗଙ୍କ ଭୟ ମଧ୍ୟରେ ସେମାନଙ୍କୁ ରହିବାକୁ ପଡ଼ୁଛି। ଶୌଚାଳୟ ଏବଂ ସ୍ନାନଘର ଭଳି ଅତି ଜରୁରୀ ଆବଶ୍ୟକତାର ଅଭାବ ସେମାନଙ୍କ ଦୈନନ୍ଦିନ ଜୀବନକୁ ନର୍କତୁଲ୍ୟ କରିଦେଇଛି।
ବନ୍ଧାଳୀମାନଙ୍କ କହିବା କଥା, ବର୍ଷ ବର୍ଷ ଧରି ସେମାନେ ଏଭଳି ଦୁର୍ଦ୍ଦଶା ମଧ୍ୟରେ କାମ କରି ଶୋଷଣର ଶିକାର ହୋଇଆସୁଛନ୍ତି, ମାତ୍ର ସମସ୍ୟାର କୌଣସି ସ୍ଥାୟୀ ସମାଧାନ ହେଉନାହିଁ। ତୁରନ୍ତ ବୋନସ ଟଙ୍କା ପ୍ରଦାନ ସହ ଫଡ଼ିଗୁଡ଼ିକରେ ପାନୀୟ ଜଳ, ବିଦ୍ୟୁତ୍, ଶୌଚାଳୟ ଓ ରହିବା ପାଇଁ ଉନ୍ନତ ବ୍ୟବସ୍ଥା କରିବାକୁ ସେମାନେ ବନ ବିଭାଗ ଏବଂ ଜିଲ୍ଲା ପ୍ରଶାସନ ନିକଟରେ ଦାବି କରିଛନ୍ତି।
ଏ ସମ୍ପର୍କରେ ଖଡ଼ିଆଳ କେନ୍ଦୁପତ୍ର ଡିଏଫ୍‌ଓ ଏ. ମାଧବୀ ଲତାଙ୍କୁ ପଚାରିବାରୁ ସେ କହିଛନ୍ତି, “ଧୀରେ ଧୀରେ ସବୁ ସମସ୍ୟାର ସମାଧାନ ପାଇଁ ବିଭାଗ ପକ୍ଷରୁ ଚେଷ୍ଟା କରାଯାଉଛି।”
ବର୍ଷ ବର୍ଷ ଧରି ନିରୀହ କେନ୍ଦୁପତ୍ର ଶ୍ରମିକଙ୍କ ହକ୍‌କୁ କିଏ ଲୁଟୁଛି ? ପ୍ରଶାସନର ଏହି “ଧୀରେ ଧୀରେ” ପ୍ରକ୍ରିୟା କେବେ ଶେଷ ହେବ ଏବଂ ଗରିବ ଶ୍ରମିକ ସେମାନଙ୍କର ନ୍ୟାର୍ଯ୍ୟ ଅଧିକାର କେବେ ପାଇବେ, ତାହା ଦେଖିବାକୁ ବାକି ରହିଲା।