Table of Contents
ନୂଆପଡ଼ା -୧୩/୦୮- ଯୁବପିଢ଼ିଙ୍କ ମଧ୍ୟରେ ଉଦ୍ୟମିତା, ନୂତନ ଚିନ୍ତାଧାରା ଓ ଆତ୍ମନିର୍ଭରତାର ଭାବନାକୁ ଉତ୍ସାହିତ କରିବା ଲକ୍ଷ୍ୟରେ ନୂଆପଡ଼ା ଜିଲ୍ଲା ଶିଳ୍ପ କେନ୍ଦ୍ର ଏବଂ ନୂଆପଡ଼ା ଜାତୀୟ ମହାବିଦ୍ୟାଳୟର କ୍ୟାରିୟର କାଉନସେଲିଂ ଓ ପ୍ଲେସମେଣ୍ଟ ସେଲ୍ର ମିଳିତ ଆନୁକୂଲ୍ୟରେ ଜିଲ୍ଲାସ୍ତରୀୟ ‘ଷ୍ଟାର୍ଟଅପ୍ ଆଉଟରିଚ୍ କାର୍ଯ୍ୟକ୍ରମ’ ଅନୁଷ୍ଠିତ ହୋଇଯାଇଛି।
ମହାବିଦ୍ୟାଳୟ ଅଧ୍ୟକ୍ଷ ପ୍ରିନ୍ସିପାଲ୍ ହିତେଶ କୁମାର ସାହୁ ଏବଂ ବରିଷ୍ଠ ଅଧ୍ୟାପକ ବିଧାନ ଚନ୍ଦ୍ର ମିଶ୍ରଙ୍କ ଉପସ୍ଥିତିରେ ଆୟୋଜିତ ଏହି ସଭାରେ ନୂଆପଡ଼ା ଜିଲ୍ଲା ଶିକ୍ଷା ଅଧିକାରୀ ଡକ୍ଟର ପ୍ରଶାନ୍ତ କୁମାର ମହାନ୍ତି ମୁଖ୍ୟ ଅତିଥି ଭାବେ ଯୋଗଦେଇ ଛାତ୍ରଛାତ୍ରୀଙ୍କୁ ସୃଜନଶୀଳ ଚିନ୍ତାଧାରା ଆପଣାଇବା ସହ ଷ୍ଟାର୍ଟଅପ୍ ଓଡ଼ିଶା ମିଶନ୍ର ବିଭିନ୍ନ ସୁଯୋଗର ସଦୁପଯୋଗ କରିବାକୁ ଆହ୍ୱାନ ଦେଇଥିଲେ।କାର୍ଯ୍ୟକ୍ରମରେ ଜିଲ୍ଲା ଶିଳ୍ପ କେନ୍ଦ୍ରର ଜେନେରାଲ୍ ମ୍ୟାନେଜର (ଡିଆଇସି) ସମ୍ମାନନୀୟ ଅତିଥି ଭାବେ ଯୋଗଦେଇ ଉଦ୍ୟୋଗୀମାନଙ୍କ ପାଇଁ ଉପଲବ୍ଧ ବିଭିନ୍ନ ସରକାରୀ ପ୍ରୋତ୍ସାହନ, ସବ୍ସିଡି ଓ ସହାୟତା ସମ୍ପର୍କରେ ଛାତ୍ରଛାତ୍ରୀଙ୍କୁ ଅବଗତ କରାଇଥିଲେ।ଏହି ଅବସରରେ ଆୟୋଜିତ ବୈଷୟିକ ଅଧିବେଶନରେ ଜିଲ୍ଲା ଶିଳ୍ପ କେନ୍ଦ୍ରର ଇଣ୍ଡଷ୍ଟ୍ରିଜ୍ ପ୍ରୋମୋସନ୍ ଅଫିସର ପ୍ରଜ୍ୟୋତ କୁମାର ମିଶ୍ର ଷ୍ଟାର୍ଟଅପ୍ର ବ୍ୟାବହାରିକ ଓ କାର୍ଯ୍ୟକାରୀ ଯୋଜନା ସମ୍ପର୍କରେ ମାର୍ଗଦର୍ଶନ କରିଥିଲେ। ସେହିପରି ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ)ର ଚିଫ୍ ମ୍ୟାନେଜର ତଥା ମୁଖ୍ୟ ରିସୋର୍ସ ପର୍ସନ୍ ଲିଙ୍କନ ଦାସ ମୁଦ୍ରା ଓ ପିଏମଇଜିପି ଭଳି ଋଣ ଯୋଜନା ମାଧ୍ୟମରେ ଯୁବ ଉଦ୍ୟୋଗୀମାନେ କିପରି ଆର୍ଥିକ ସହାୟତା ପାଇପାରିବେ, ସେନେଇ ବିସ୍ତୃତ ମାର୍ଗଦର୍ଶନ ଦେଇଥିଲେ।
