ନୂଆପଡ଼ାରେ ଟେଲିକମ୍ ଗ୍ରାହକ ସଚେତନତା କର୍ମଶାଳା:ଉଚିତ ମୂଲ୍ୟରେ ଉଚିତ ସେବା ଓ ସାଇବର ଠକେଇରୁ ସୁରକ୍ଷା ଉପରେ ଗୁରୁତ୍ୱ।

ନୂଆପଡ଼ା -୦୮/୦୯- ଭାରତ ସରକାରଙ୍କ ଟ୍ରାଇ (TRAI) ସହଯୋଗରେ ଉପଭୋକ୍ତା ଓକିଲାତି ସଂଘ ‘ବାର୍ଡ’ ପକ୍ଷରୁ ନୂଆପଡ଼ା ନ୍ୟାସନାଲ ମହାବିଦ୍ୟାଳୟର ସଭାଗୃହରେ ‘ଟେଲିକମ୍ ଗ୍ରାହକଙ୍କୁ ଉଚିତ ମୂଲ୍ୟରେ ଉଚିତ ସେବା ଓ ସଶକ୍ତିକରଣ’ ଶୀର୍ଷକ ଏକ ସଚେତନତା କର୍ମଶାଳା ଆୟୋଜିତ ହୋଇଛି।କର୍ମଶାଳାକୁ ସିଏସ୍‌ଓ ତ୍ରିନାଥ ଭୋଇ ମୁଖ୍ୟଅତିଥି ଭାବେ ଯୋଗଦେଇ ଉଦ୍‌ଘାଟନ କରିଥିବା ବେଳେ ନ୍ୟାସନାଲ ମହାବିଦ୍ୟାଳୟର ଅଧ୍ୟକ୍ଷ ହିତେଶ କୁମାର ସାହୁ ସଭାପତିତ୍ୱ କରିଥିଲେ। ଡିଜିଟାଲ ଯୁଗରେ ମୋବାଇଲ୍‌, ଇଣ୍ଟରନେଟ୍‌ ଓ ଇ-ସେବା ଆମ ଦୈନନ୍ଦିନ ଜୀବନର ଅବିଚ୍ଛେଦ୍ୟ ଅଙ୍ଗ ପାଲଟିଥିବାରୁ ଗ୍ରାହକମାନଙ୍କ ଡିଜିଟାଲ ସାକ୍ଷରତା ଓ ସଚେତନତା ଅତ୍ୟନ୍ତ ଜରୁରୀ ବୋଲି ଅତିଥିମାନେ ମତ ରଖିଥିଲେ।

⚠️ ସାଇବର ଠକେଇରୁ ସତର୍କ ରହିବାକୁ ପରାମର୍ଶ

ସମ୍ମାନିତ ଅତିଥି ଭାବେ ଯୋଗଦେଇ ସାଇବର ଥାନା ଅଧିକାରୀ ଦିଲ୍ଲୀପ କୁମାର ସାହୁ ସାଇବର ଅପରାଧ ସମ୍ପର୍କରେ ସଚେତନ କରିଥିଲେ। ଅଜଣା ଲିଙ୍କ, ଅଜଣା ଆପ୍‌, ସନ୍ଦେହଜନକ ମେସେଜ୍‌, ଫେକ୍ ୱେବସାଇଟ୍‌, ଇ-ମେଲ୍‌ ଓ ସୋସିଆଲ ମିଡିଆ ମାଧ୍ୟମରେ ଆସୁଥିବା ପ୍ରଲୋଭନଠାରୁ ଦୂରେଇ ରହିବା ସହ କୌଣସି ପରିସ୍ଥିତିରେ ଅଜଣା ବ୍ୟକ୍ତିଙ୍କୁ OTP ପ୍ରଦାନ ନକରିବାକୁ ସେ ପରାମର୍ଶ ଦେଇଥିଲେ।‘OTP ଅଜଣା ବ୍ୟକ୍ତିଙ୍କୁ ଦେବା ଅର୍ଥ ନିଜେ ନିଜର ସୁରକ୍ଷାକୁ ବିପଦରେ ପକାଇବା’ ବୋଲି ସେ ସଚେତନ କରିଥିଲେ।

📱 TRAIର ବିଭିନ୍ନ ସେବା ସମ୍ପର୍କରେ ତାଲିମ

ବାର୍ଡ ଖାଉଟି ସଂଘ ତଥା TRAIର CAG ପ୍ରକାଶ ଚନ୍ଦ୍ର ସାହୁ ସାଧନକର୍ମୀ ଭାବେ ଯୋଗଦେଇ PPT ମାଧ୍ୟମରେ TRAIର ବିଭିନ୍ନ ଆପ୍‌ ଓ ସେବା ସମ୍ପର୍କରେ ତାଲିମ ପ୍ରଦାନ କରିଥିଲେ। DND, MySpeed, MyCall, Sanchar Saathi, Chakshu, Pratibimb ସମେତ ହେଲ୍ପଲାଇନ୍ ୧୯୩୦ ଓ cybercrime.gov.in ଭଳି ଗୁରୁତ୍ୱପୂର୍ଣ୍ଣ ସେବାର ବ୍ୟବହାର ସମ୍ପର୍କରେ ଗ୍ରାହକମାନଙ୍କୁ ଅବଗତ କରାଯାଇଥିଲା।

📶 ଗ୍ରାମାଞ୍ଚଳରେ ନେଟୱର୍କ ସମସ୍ୟା ନେଇ ଉଦ୍‌ବେଗ

କର୍ମଶାଳାରେ ନୂଆପଡ଼ା ଜିଲ୍ଲାର ବିଭିନ୍ନ ବ୍ଲକ୍‌ର ଗ୍ରାମାଞ୍ଚଳରେ ଟେଲିକମ୍ ସେବାକୁ ନେଇ ଉପଭୋକ୍ତାମାନେ ଅସନ୍ତୋଷ ପ୍ରକାଶ କରିଥିଲେ। ଅନେକ ଅଞ୍ଚଳରେ ନେଟୱର୍କ ନ ଆସିବା, ଇଣ୍ଟରନେଟ୍‌ର ଗତି ଧିମା ରହିବା ଓ ସେବା ଅନୁପାତରେ ଅଧିକ ରିଚାର୍ଜ ମୂଲ୍ୟ ନେଇ ପ୍ରଶ୍ନ ଉଠିଥିଲା।

୩୦ ଦିନ ପରିବର୍ତ୍ତେ ୨୮ ଦିନର ପ୍ଲାନ୍‌, କମ୍ ମୂଲ୍ୟର ପ୍ଲାନ୍‌ର ଅଭାବ, ଉଚିତ ମୂଲ୍ୟ ଦେଇ ଉଚିତ ସେବା ନମିଳିବା ଓ ଅଭିଯୋଗ ପ୍ରକ୍ରିୟାକୁ ଆହୁରି ସରଳ କରିବା ନେଇ ଆଲୋଚନା ହୋଇଥିଲା।

ବରିଷ୍ଠ ଆଇନଜୀବୀ ନାରାୟଣ ପ୍ରସାଦ ଯୋଶୀ ଟେଲିକମ୍ ନିୟମ ଉଲ୍ଲଂଘନ ହେଲେ ନିୟମାନୁସାରେ ଅର୍ଥଦଣ୍ଡ ସହ ଅନ୍ୟାନ୍ୟ କାର୍ଯ୍ୟାନୁଷ୍ଠାନର ବ୍ୟବସ୍ଥା ଥିବା ଉଲ୍ଲେଖ କରିଥିଲେ। ଗ୍ରାମାଞ୍ଚଳରେ ଅଧିକରୁ ଅଧିକ ଗ୍ରାହକ ସଚେତନତା କର୍ମଶାଳା ଆୟୋଜନ ସହ ଓଡ଼ିଆ ଭାଷାରେ ଅଭିଯୋଗ ବ୍ୟବସ୍ଥା ଓ ଟୋଲ୍‌-ଫ୍ରି ସେବାକୁ ସୁଗମ କରିବାକୁ ସେ ଗୁରୁତ୍ୱାରୋପ କରିଥିଲେ।କାର୍ଯ୍ୟକାରୀ ସଂଯୋଜକ ତଥା ରୋଜଗାର ପରାମର୍ଶଦାତା ଶୁକଦେବ ଭୀଲ ସ୍ୱାଗତ ଭାଷଣ ଦେଇଥିବା ବେଳେ ଶାରୀରିକ ବିଭାଗର ପ୍ରକାଶ କୁମାର ସାହୁ ଧନ୍ୟବାଦ ଅର୍ପଣ କରିଥିଲେ।କର୍ମଶାଳାରେ BSNL, Airtel ଓ Jioର କ୍ଷେତ୍ର ଅଧିକାରୀଙ୍କ ସମେତ ଶତାଧିକ ଛାତ୍ରଛାତ୍ରୀ ଓ ଗ୍ରାହକ ଅଂଶଗ୍ରହଣ କରି ଟେଲିକମ୍ ସେବା, ଗ୍ରାହକ ଅଧିକାର ଓ ସାଇବର ସୁରକ୍ଷା ସମ୍ପର୍କରେ ଜ୍ଞାନ ଆହରଣ କରିଥିଲେ।