ଅସହାୟ ଦିବ୍ୟାଙ୍ଗ ମୋହନଙ୍କ ପାଖରେ ପହଞ୍ଚିଲା ଆଇନ ସେବା ପ୍ରାଧିକରଣ; ମିଳିଲା ମଧୁବାବୁ ପେନ୍‌ସନ୍‌, ଫୁଟିଲା ହସ।

ନୂଆପଡ଼ା -୦୨/୧୧(ସୁରେନ୍ଦ୍ର ତିୱାରୀ) ଦୁଃଖ ଓ ଦୁର୍ଦ୍ଦଶା ଭିତରେ ଦିନ କାଟୁଥିବା ଜଣେ ଅସହାୟ ଦିବ୍ୟାଙ୍ଗଙ୍କ ପାଖରେ ପହଞ୍ଚିଛି ଆଇନ ସେବା ପ୍ରାଧିକରଣ। ଦୀର୍ଘଦିନର ଅପେକ୍ଷା ଓ ସରକାରୀ କାର୍ଯ୍ୟାଳୟକୁ ବାରମ୍ବାର ଦୌଡ଼ିବା ପରେ ଶେଷରେ ମଧୁବାବୁ ପେନ୍‌ସନ୍‌ ଯୋଜନାରେ ଭତ୍ତା ପାଇଛନ୍ତି ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ ଜରନ୍ଦ୍ରାମୁଣ୍ଡା ଗ୍ରାମର ଦିବ୍ୟାଙ୍ଗ ମୋହନ ମାଝୀ (୪୫)। ପ୍ରଥମଥର ପାଇଁ ନିଜ ହାତରେ ଭତ୍ତା ଟଙ୍କା ପାଇବା ପରେ ତାଙ୍କ ମୁହଁରେ ଖୁସି ଫୁଟି ଉଠିଛି।
ସୂଚନା ଅନୁସାରେ, ମୋହନଙ୍କ ନିକଟରେ ଦିବ୍ୟାଙ୍ଗ ପ୍ରମାଣପତ୍ର ନଥିବାରୁ ସେ ମଧୁବାବୁ ପେନ୍‌ସନ୍‌ ଯୋଜନାରେ ଦିବ୍ୟାଙ୍ଗ ଭତ୍ତା ପାଇବାରୁ ବଞ୍ଚିତ ହୋଇଥିଲେ। ଆର୍ଥିକ ଅନଟନ ମଧ୍ୟରେ ତାଙ୍କ ଜୀବନ ଅତି ଦୁର୍ବିଷହ ହୋଇପଡ଼ିଥିଲା। ତାଙ୍କର ଦୁଇଜଣ ନାବାଳକ ପୁଅଙ୍କ ବୟସ ପ୍ରାୟ ୧୦ ଓ ୧୨ ବର୍ଷ। ମୋହନଙ୍କ ଅସୁସ୍ଥ ଓ ଅସହାୟ ଅବସ୍ଥା ଯୋଗୁଁ ତାଙ୍କ ପତ୍ନୀ କିଛି ବର୍ଷ ପୂର୍ବରୁ ତାଙ୍କୁ ଛାଡ଼ି ଚାଲିଯାଇଥିବାରୁ ଦୁଇ ପୁଅଙ୍କ ଲାଳନପାଳନ ସହ ନିଜର ଦୈନନ୍ଦିନ ଆବଶ୍ୟକତା ପୂରଣ କରିବା ତାଙ୍କ ପାଇଁ ଏକ ବଡ଼ ଆହ୍ୱାନ ପାଲଟିଥିଲା।
ଏହି ସମସ୍ୟାର ସମାଧାନ ପାଇଁ ମୋହନ ବିଭିନ୍ନ ସରକାରୀ କାର୍ଯ୍ୟାଳୟକୁ ଅନେକଥର ଯାଇ ଆବେଦନ କରିଥିଲେ ମଧ୍ୟ କୌଣସି ସୁଫଳ ପାଇନଥିଲେ। ଶେଷରେ ତାଙ୍କ ଦୁର୍ଦ୍ଦଶା ସମ୍ପର୍କରେ ବିଭିନ୍ନ ଖବରକାଗଜରେ ଖବର ପ୍ରକାଶ ପାଇବା ପରେ ଓଡ଼ିଶା ରାଜ୍ୟ ଆଇନ ସେବା ପ୍ରାଧିକରଣ ଏହି ଘଟଣାକୁ ଗୁରୁତ୍ୱର ସହ ନେଇଥିଲେ। ମୋହନଙ୍କୁ ତୁରନ୍ତ ନିଃଶୁଳ୍କ ଆଇନ ସେବା ଯୋଗାଇଦେବା ସହ ଆବଶ୍ୟକୀୟ ସହାୟତା ପ୍ରଦାନ ପାଇଁ ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣର ସଚିବଙ୍କୁ ନିର୍ଦ୍ଦେଶ ଦିଆଯାଇଥିଲା।
ଏହାପରେ ଜିଲ୍ଲା ଆଇନ ସେବା ପ୍ରାଧିକରଣ, ନୂଆପଡ଼ାର ସଚିବ ନବନୀତା ଦାଶ ଅଧିକାର ମିତ୍ର ସୁବଳ ରଣାଙ୍କୁ ମୋହନଙ୍କ ନିକଟକୁ ପଠାଇଥିଲେ। ସୁବଳ ରଣା ମୋହନ ଓ ତାଙ୍କ ଦୁଇ ପୁଅଙ୍କୁ ଭେଟି ସମସ୍ୟାର ସବିଶେଷ ତଥ୍ୟ ସଂଗ୍ରହ କରିବା ସହ ଆବଶ୍ୟକୀୟ ଦଲିଲପତ୍ର ପ୍ରସ୍ତୁତି ଓ ସରକାରୀ ପ୍ରକ୍ରିୟାରେ ସହାୟତା କରିଥିଲେ।
ମୋହନଙ୍କ ଦିବ୍ୟାଙ୍ଗ ପ୍ରମାଣପତ୍ର ପାଇଁ ତାଙ୍କୁ ଡାକ୍ତରୀ ବୋର୍ଡ ନିକଟକୁ ନେବା ସହ ଚିକିତ୍ସା ପରୀକ୍ଷା ଏବଂ ପ୍ରମାଣପତ୍ର ପାଇଁ ସମ୍ପୃକ୍ତ କର୍ତ୍ତୃପକ୍ଷଙ୍କ ନିକଟରେ ଆବେଦନ କରିବାରେ ସହଯୋଗ କରିଥିଲେ। ସେହିପରି ତାଙ୍କର ଦୁଇ ନାବାଳକ ପୁଅଙ୍କୁ ଶିଶୁ କଲ୍ୟାଣ କମିଟି (CWC) ସମ୍ମୁଖରେ ଉପସ୍ଥାପନ କରାଇ ସେମାନଙ୍କୁ ବିଭିନ୍ନ ସରକାରୀ ଶିଶୁ କଲ୍ୟାଣ ଯୋଜନାରେ ସାମିଲ କରି ସହାୟତା ପ୍ରଦାନ ପାଇଁ ଆବେଦନ କରିଥିଲେ।
ଏଥିସହ ମୋହନଙ୍କ ପାଇଁ ମଧୁବାବୁ ପେନ୍‌ସନ୍‌ ଯୋଜନାରେ ଦିବ୍ୟାଙ୍ଗ ଭତ୍ତା ପାଇବା ନିମନ୍ତେ ମଧ୍ୟ ଆବେଦନ କରାଯାଇଥିଲା। ମୋହନଙ୍କ ଶାରୀରିକ ଅସୁବିଧା ଯୋଗୁଁ ବାରମ୍ବାର ବ୍ୟାଙ୍କକୁ ଯାଇ ଟଙ୍କା ଉଠାଇବା ସମ୍ଭବ ନଥିବାରୁ ତାଙ୍କୁ ନଗଦ ଆକାରରେ ଭତ୍ତା ଟଙ୍କା ପ୍ରଦାନ କରିବାକୁ ମଧ୍ୟ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଅନୁରୋଧ କରାଯାଇଥିଲା।
ଆଇନ ସେବା ପ୍ରାଧିକରଣର ଏହି ତ୍ୱରିତ ହସ୍ତକ୍ଷେପ ପରେ ମୋହନ ପ୍ରଥମଥର ପାଇଁ ନିଜ ହାତରେ ଭତ୍ତା ଟଙ୍କା ପାଇଥିଲେ। ଦୀର୍ଘଦିନର ଅପେକ୍ଷା ପରେ ଏହି ସହାୟତା ତାଙ୍କ ପାଇଁ ଆଶ୍ୱସ୍ତି ଆଣିଦେଇଛି। ଏଥିପାଇଁ ମୋହନ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ନବନୀତା ଦାଶ ଓ ଅଧିକାର ମିତ୍ର ସୁବଳ ରଣାଙ୍କୁ ହୃଦୟରୁ କୃତଜ୍ଞତା ଜଣାଇଛନ୍ତି।
ଅସହାୟ ଓ ଅବହେଳିତ ଲୋକଙ୍କ ନିକଟରେ ଆଇନ ସେବା ପ୍ରାଧିକରଣର ଏଭଳି ସମୟୋଚିତ ହସ୍ତକ୍ଷେପ କେବଳ ଜଣେ ବ୍ୟକ୍ତିଙ୍କୁ ସହାୟତା ନୁହେଁ, ବରଂ ସରକାରୀ ଯୋଜନାରୁ ବଞ୍ଚିତ ଲୋକଙ୍କ ପାଇଁ ଏକ ଆଶାର ଆଲୋକ।