ନୂଆପଡା -୨୫/୬- ଉତ୍ତରାଖଣ୍ଡର ରଣନୀତିକ ଦୃଷ୍ଟିରୁ ସମ୍ବେଦନଶୀଳ ଉତ୍ତରକାଶୀ ଜିଲ୍ଲାରେ ପ୍ରଥମ ଥର ପାଇଁ ସଫଳତାର ସହ ସମ୍ପନ୍ନ ହୋଇଯାଇଛି ସାତ ଦିନିଆ ‘ବିକସିତ ଭାଇବ୍ରାଣ୍ଟ ଭିଲେଜ’ କାର୍ଯ୍ୟକ୍ରମ। କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ ଏବଂ ‘ମାଇଁ ଭାରତ’ ର ମିଳିତ ଆନୁକୂଲ୍ୟରେ ଆୟୋଜିତ ଏହି ସ୍ୱତନ୍ତ୍ର ଅଭିଯାନରେ ସାରା ଦେଶର ମେଧାବୀ ଯୁବକମାନେ ନିଜର ଦକ୍ଷତା ପ୍ରଦର୍ଶନ କରିଛନ୍ତି। ‘ମାଇଁ ଭାରତ’ ୱେବସାଇଟ୍ ରେ ଆୟୋଜିତ ଏକ ଜାତୀୟ ସ୍ତରର କୁଇଜ୍ ପ୍ରତିଯୋଗିତାର ରାଙ୍କ୍ ଭିତ୍ତିରେ ଏହି ଯୁବ ପ୍ରତିନିଧିମାନଙ୍କୁ ଚୟନ କରାଯାଇଥିଲା।
ଏହି ଯାତ୍ରା ସମୟରେ ଯୁବକମାନେ ପବିତ୍ର ଗଙ୍ଗୋତ୍ରୀ ଧାମ ଏବଂ ଐତିହାସିକ ଜାଦୁଙ୍ଗା ଗ୍ରାମ ପରିଦର୍ଶନ କରିବାର ସୌଭାଗ୍ୟ ଲାଭ କରିଥିଲେ। ଏହା ସହ ୨୦୨୫ ମସିହାରେ ଆସିଥିବା ଭୟାବହ ବନ୍ୟାର ପ୍ରଳୟଙ୍କରୀ ରୂପକୁ ନିକଟରୁ ଅନୁଭବ କରିଥିବା ଦୁଇ ଜଣ ବଞ୍ଚି ଯାଇଥିବା ସ୍ଥାନୀୟ ବ୍ୟକ୍ତିଙ୍କ ସହ ସେମାନେ ଆଲୋଚନା କରିଥିଲେ। ସେମାନଙ୍କ ମୁହଁରୁ ଶୁଣିଥିବା ସେହି ଦୁଃଖଦ ଓ ରୋମାଞ୍ଚକର ଅନୁଭବ ଯୁବ ପ୍ରତିନିଧିଙ୍କୁ ମର୍ମାହତ କରିଥିଲା।
କେବଳ ଭ୍ରମଣ ନୁହେଁ, ବରଂ ସୀମାନ୍ତ ଗ୍ରାମଗୁଡ଼ିକ ର ବିକାଶ ପାଇଁ ଏହି ଯୁବ ଦଳ ନିଜର ସମଗ୍ର ଅନୁଭୂତି, ସମସ୍ୟା ଏବଂ ସେଗୁଡ଼ିକର ସମାଧାନର ସୂତ୍ର କୁ ନେଇ କେନ୍ଦ୍ର ସରକାର ଙ୍କୁ ଏକ ବିସ୍ତୃତ ରିପୋର୍ଟ ପ୍ରଦାନ କରିଛନ୍ତି। ଏହି ରିପୋର୍ଟ ଆଗାମୀ ଦିନରେ ‘ଭାଇବ୍ରାଣ୍ଟ ଭିଲେଜ୍’ ଗୁଡ଼ିକର ରୂପରେଖ ବଦଳାଇବାରେ ସହାୟକ ହେବ ବୋଲି ଆଶା କରାଯାଉଛି।
