କୋମନା ବାଳିକା ଉଚ୍ଚ ବିଦ୍ୟାଳୟରେ ଆଇନ ସଚେତନତା ଶିବିର: ସୁପ୍ରିମକୋର୍ଟଙ୍କ ଐତିହାସିକ ‘ବିଶାଖା ଗାଇଡଲାଇନ’ ଉପରେ ଗୁରୁତ୍ୱାରୋପ।

ନୂଆପଡ଼ା -୩୦/୦୮-ଜିଲ୍ଲା ଆଇନ ସେବା ପ୍ରାଧିକରଣ (DLSA), ନୂଆପଡ଼ା ଆନୁକୂଲ୍ୟରେ କୋମନା ସ୍ଥିତ ସରକାରୀ ବାଳିକା ଉଚ୍ଚ ବିଦ୍ୟାଳୟର ‘ଛାତ୍ର ଆଇନ ସାକ୍ଷରତା କ୍ଲବ’ ପରିସରରେ ଏକ ସ୍ୱତନ୍ତ୍ର ଆଇନ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ମାନ୍ୟବର ସର୍ବୋଚ୍ଚ ନ୍ୟାୟାଳୟଙ୍କ ଐତିହାସିକ ‘ବିଶାଖା ଓ ଅନ୍ୟମାନେ ବନାମ ରାଜସ୍ଥାନ ସରକାର’ ମାମଲାର ରାୟ ଏବଂ ଏହାର ଓଡ଼ିଆ ଅନୁବାଦ ସମ୍ପର୍କରେ ଛାତ୍ରୀମାନଙ୍କୁ ବିସ୍ତୃତ ଧାରଣା ପ୍ରଦାନ କରାଯାଇଥିଲା।
ଶିବିରରେ ମୁଖ୍ୟ ବକ୍ତା ଭାବେ ଯୋଗଦେଇ DLSA ସଚିବ ନବନୀତା ଦାଶ କାର୍ଯ୍ୟକ୍ଷେତ୍ରରେ ମହିଳାମାନଙ୍କ ସୁରକ୍ଷା, ଯୌନ ନିର୍ଯାତନା ନିରୋଧ ଆଇନ (POSH) ଏବଂ ମହିଳାଙ୍କ ସାମ୍ବିଧାନିକ ଅଧିକାର ଉପରେ ଆଲୋକପାତ କରିଥିଲେ। ଏଥିସହ:
🔷 ଅସହାୟ ତଥା ଆବଶ୍ୟକ ଲୋକଙ୍କ ପାଇଁ ଉଦ୍ଦିଷ୍ଟ ମାଗଣା ଆଇନ ସେବା ଓ ସହାୟତା ସମ୍ପର୍କରେ ସୂଚନା ଦେଇଥିଲେ।
🔷 ସମାଜରେ ଆଇନଗତ ସଚେତନତା ସୃଷ୍ଟି କରିବାରେ ବିଦ୍ୟାଳୟ ସ୍ତରୀୟ ଛାତ୍ର ଆଇନ ସାକ୍ଷରତା କ୍ଲବର ଗୁରୁତ୍ୱପୂର୍ଣ୍ଣ ଭୂମିକା ଉପରେ ବୁଝାଇଥିଲେ।
କାର୍ଯ୍ୟକ୍ରମରେ ଅନ୍ୟତମ ଅତିଥି, ସ୍ଥାନୀୟ ଅଭିଯୋଗ କମିଟି (Local Complaints Committee) ର ପୂର୍ବତନ ଅଧ୍ୟକ୍ଷା ତଥା ବିଶିଷ୍ଟ ସମାଜସେବୀ ସୋନାଲି ପାଣିଗ୍ରାହୀ ଯୌନ ନିର୍ଯାତନାର ବିଭିନ୍ନ ଦିଗ ଏବଂ ଜିଲ୍ଲା ସ୍ତରରେ ଏହାର ପ୍ରତିରୋଧ ପାଇଁ ଗ୍ରହଣ କରାଯାଇଥିବା ପ୍ରଶାସନିକ ପଦକ୍ଷେପ ସମ୍ପର୍କରେ ଛାତ୍ରୀମାନଙ୍କୁ ସଚେତନ କରାଇଥିଲେ।

ଏହି ସଚେତନତା କାର୍ଯ୍ୟକ୍ରମରେ ବିଦ୍ୟାଳୟର ପ୍ରଧାନଶିକ୍ଷକ ପ୍ରଭୁଦତ୍ତ ପୁରୋହିତ, ସମସ୍ତ ଶିକ୍ଷକ-ଶିକ୍ଷୟିତ୍ରୀ, ଅଧିକାର ମିତ୍ର ଏବଂ ବହୁ ସଂଖ୍ୟାରେ ଛାତ୍ରୀମାନେ ଉପସ୍ଥିତ ରହି ସକ୍ରିୟ ଭାଗ ନେଇଥିଲେ।