ଖଡ଼ିଆଳ ବନଖଣ୍ଡ ପକ୍ଷରୁ ୭୭ତମ ବନ ମହୋତ୍ସବ ପାଳିତ: “ଗଛ ଲଗାଇବା, ପରିବେଶ ବଞ୍ଚାଇବା” ପାଇଁ ସାମୂହିକ ସଂକଳ୍ପ।

ନୂଆପଡ଼ା -୮/୦୭- ପରିବେଶ ସୁରକ୍ଷା, ବନ ସଂରକ୍ଷଣ ଏବଂ ଜଳବାୟୁ ପରିବର୍ତ୍ତନର ସଫଳ ମୁକାବିଲା ପାଇଁ ଏକ ସବୁଜ ବାର୍ତ୍ତା ନେଇ ଓଡ଼ିଶା ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଆନୁକୂଲ୍ୟରେ ସିନାପାଲି ବନାଞ୍ଚଳ ଅଧୀନ ଖଡ଼ିଆଳ ବନଖଣ୍ଡ ପକ୍ଷରୁ ରାମଗଡ଼ – ଗଣ୍ଡାବାହାଲି ଠାରେ ୭୭ତମ ବନ ମହୋତ୍ସବ–୨୦୨୬ ଆଡମ୍ବର ସହକାରେ ପାଳିତ ହୋଇଯାଇଛି। ଏହି କାର୍ଯ୍ୟକ୍ରମରେ ସ୍ଥାନୀୟ ଅଞ୍ଚଳର ବହୁ ଜନସାଧାରଣ ଓ ଛାତ୍ରଛାତ୍ରୀ ଉତ୍ସାହର ସହ ଅଂଶଗ୍ରହଣ କରିଥିଲେ।ବୃକ୍ଷରୋପଣ ଏକ ସାମାଜିକ ଦାୟିତ୍ୱ: ମୁଖ୍ୟ ଅତିଥି
ଏହି ଉତ୍ସବରେ ସହକାରୀ ବନ ସଂରକ୍ଷକ (ଏସିଏଫ୍) ପ୍ରସନ୍ନଜିତ ନାୟକ ମୁଖ୍ୟ ଅତିଥି ଭାବେ ଯୋଗଦେଇ କହିଥିଲେ ଯେ, “ବୃକ୍ଷରୋପଣ କେବଳ ଏକ ଦିନର ଆନୁଷ୍ଠାନିକ କାର୍ଯ୍ୟକ୍ରମ ନୁହେଁ, ବରଂ ଆଗାମୀ ପିଢ଼ି ପାଇଁ ଏକ ସୁସ୍ଥ, ସୁନ୍ଦର ଓ ସବୁଜ ପରିବେଶ ଗଢ଼ି ତୋଳିବା ଆମ ସମସ୍ତଙ୍କର ସାମାଜିକ ଦାୟିତ୍ୱ।” ସେ ପ୍ରକୃତିର ସୁରକ୍ଷା ପାଇଁ ସମସ୍ତଙ୍କୁ ସଚେତନ ହେବାକୁ ଆହ୍ୱାନ ଦେଇଥିଲେ।
ଜଳବାୟୁ ପରିବର୍ତ୍ତନ ଆଜିର ସବୁଠାରୁ ବଡ଼ ଚ୍ୟାଲେଞ୍ଜ।
ଗଣ୍ଡାବାହାଲି ଶିଶୁବିଦ୍ୟା ମନ୍ଦିରର ପ୍ରଧାନ ଆଚାର୍ଯ୍ୟ ଭଗବାନ ଚଳାନ ମୁଖ୍ୟ ବକ୍ତା ଭାବେ ଯୋଗଦେଇ କହିଥିଲେ, “ବର୍ତ୍ତମାନର ଜଳବାୟୁ ପରିବର୍ତ୍ତନ ସମଗ୍ର ମାନବ ସମାଜ ପାଇଁ ଏକ ବଡ଼ ବିପଦ। ଏହାର ସ୍ଥାୟୀ ସମାଧାନ ପାଇଁ ବ୍ୟାପକ ବୃକ୍ଷରୋପଣ ସହିତ ପ୍ରତ୍ୟେକ ବୃକ୍ଷର ସୁରକ୍ଷା ଓ ଯତ୍ନ ନେବା ଆଜିର ସମୟର ସବୁଠାରୁ ବଡ଼ ଆବଶ୍ୟକତା।”
ଏ ଅବସର ରେ ଅଞ୍ଚଳର ବିଶିଷ୍ଟ ବ୍ୟକ୍ତିବିଶେଷ ଙ୍କ ଉପସ୍ଥିତି । ଉପରୋକ୍ତ କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ବିଜେପି ପୂର୍ବତନ ଜିଲ୍ଲା ସଭାପତି ତଥା ବିଶିଷ୍ଟ ଭାଜପା ନେତା ସୁବ୍ରତ ଠାକୁର,
ଗଣ୍ଡାବାହାଲି ପଞ୍ଚାୟତ ସରପଞ୍ଚ କୌଶଲ୍ୟା ମେହେର, ପଞ୍ଚାୟତ ହାଇସ୍କୁଲ ପ୍ରଧାନ ଶିକ୍ଷକ ଜଗନ୍ନାଥ ସେଠୀ, ଗୁଣଧର ମେହେର ଏବଂ ଷଡାନନ ସୁନାନୀ ପ୍ରମୁଖ ମଞ୍ଚାସିନ ଥିଲେ ଓ ବନ ସଂରକ୍ଷଣ ଓ ଜୈବ ବିବିଧତାର ସୁରକ୍ଷା ଉପରେ ନିଜ ନିଜର ମୂଲ୍ୟବାନ ମତାମତ ରଖିଥିଲେ।
ମଞ୍ଚ ପରିଚାଳନା ଓ ସହଯୋଗ – କାମେଶ୍ୱର ତାଣ୍ଡି କାର୍ଯ୍ୟକ୍ରମର ଆବାହକ ଭାବେ ସମସ୍ତ ସମନ୍ୱୟ ରକ୍ଷା କରିଥିବା ବେଳେ ମହାଦେବ ବନ୍ଦୀଛୋର ମଞ୍ଚ ପରିଚାଳନା କରିଥିଲେ। ବନ ବିଭାଗର କର୍ମଚାରୀ କନ୍ଦର୍ପ ସୁନାନୀ, ରମାରଞ୍ଜନ ରାଉତ, ସମୀର ରଞ୍ଜନ ଠାକୁର ଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀମାନେ ଏହି ବୃକ୍ଷରୋପଣ କାର୍ଯ୍ୟକ୍ରମକୁ ସଫଳ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ।ଉତ୍ସବର ଶେଷ ପର୍ଯ୍ୟାୟରେ ସ୍ଥାନୀୟ ଜନପ୍ରତିନିଧି, ଗଣ୍ଡାବାହାଲି ଶିଶୁବିଦ୍ୟା ମନ୍ଦିର ଏବଂ ପଞ୍ଚାୟତ ହାଇସ୍କୁଲର ଶତାଧିକ ଛାତ୍ରଛାତ୍ରୀ ଓ ସ୍ଥାନୀୟ ଜନସାଧାରଣ ଏକତ୍ରିତ ହୋଇ ବୃକ୍ଷରୋପଣ କରିଥିଲେ। ଏହା ସହିତ “ଗଛ ଲଗାଇବା, ଗଛ ବଞ୍ଚାଇବା ଓ ପରିବେଶ ସୁରକ୍ଷା କରିବା” ପାଇଁ ସମସ୍ତେ ସାମୂହିକ ଭାବେ ଶପଥ ଗ୍ରହଣ କରିଥିଲେ।