ଜିଲ୍ଲାସ୍ତରୀୟ ରାଜସ୍ୱ ସମୀକ୍ଷା ବୈଠକ : ରାଜସ୍ୱ ସଂଗ୍ରହରେ ବଡ଼ ସଫଳତା, ବୋଡେନ ତହସିଲ ର ମନବୋଧ ମାଝୀଙ୍କୁ ‘ରାଜସ୍ୱ ମିତ୍ର ପୁରସ୍କାର’।

ନୂଆପଡ଼ା -୬/୬- ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଆଜି ଜିଲ୍ଲା ମୁଖ୍ୟାଳୟ ସମ୍ମିଳନୀ କକ୍ଷରେ ଏକ ଗୁରୁତ୍ୱପୂର୍ଣ୍ଣ ଜିଲ୍ଲାସ୍ତରୀୟ ରାଜସ୍ୱ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜିଲ୍ଲାର ବିଭିନ୍ନ ବିଭାଗର ରାଜସ୍ୱ ସଂଗ୍ରହ, ଆଇନଶୃଙ୍ଖଳା ପରିସ୍ଥିତି, ଜମି ସମ୍ବନ୍ଧୀୟ ମାମଲା ଏବଂ ଖଣିଜ ସମ୍ପଦର ସୁରକ୍ଷା ବାବଦରେ ବିସ୍ତୃତ ସମୀକ୍ଷା କରାଯାଇଛି।
ମଣ୍ଡି ପରିଚାଳନା ଓ ଅବୈଧ ଖଣି ଉପରେ କଡ଼ା ନଜର ବୈଠକ ପ୍ରାରମ୍ଭରେ ଜିଲ୍ଲାପାଳ ରବି ଧାନ ଅଧିଗ୍ରହଣ ପ୍ରକ୍ରିୟାକୁ ଶୃଙ୍ଖଳିତ କରିବା ପାଇଁ ସମସ୍ତ ତହସିଲଦାରମାନଙ୍କୁ ନିର୍ଦ୍ଦେଶ ଦେଇଛନ୍ତି। ମଣ୍ଡି ପରିଚାଳନା ଉପରେ ତୀକ୍ଷ୍ଣ ନଜର ରଖିବା ସହ ଆଇନଶୃଙ୍ଖଳା ବଜାୟ ରଖିବାକୁ ସେ କହିଛନ୍ତି। ସେହିପରି ଅବୈଧ ଖଣି କାରବାର ବିରୋଧରେ ଶୂନ୍ୟ ସହନଶୀଳତା ନୀତି ଆପଣାଇବାକୁ ଖଣି ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଆବଶ୍ୟକ ସ୍ଥଳେ ବେଆଇନ ଖନନ ଅଞ୍ଚଳରେ ଧାରା ୧୪୪ ଜାରି କରିବାକୁ ଜିଲ୍ଲାପାଳ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି।

ଚଳିତ ବର୍ଷ ମେ ମାସ ସୁଦ୍ଧା ଜିଲ୍ଲାରେ ଜମି ରାଜସ୍ୱ ଓ ବକେୟା ଆଦାୟ କ୍ଷେତ୍ରରେ ଗତ ବର୍ଷ ତୁଳନାରେ ଉଲ୍ଲେଖନୀୟ ସଫଳତା ମିଳିଛି।
ଡି ସି ବି ସଂଗ୍ରହ ହାର ଚଳିତ ବର୍ଷ ଏହା ୧୪.୦୬ ପ୍ରତିଶତ ରେ ପହଞ୍ଚିଛି, ଯାହା ଗତ ବର୍ଷ ସମାନ ଅବଧିରେ ମାତ୍ର ୪.୨୨ ପ୍ରତିଶତ ଥିଲା। ରାଜସ୍ୱ ଆଦାୟର ଏହି ଗତିକୁ ଆହୁରି ତ୍ୱରାନ୍ୱିତ କରିବାକୁ ସମସ୍ତ ତହସିଲକୁ ନିର୍ଦ୍ଦେଶ ଦିଆଯାଇଛି।
ମାମଲା ଫଇସଲା ଏବଂ ବିଭାଗୀୟ ସମୀକ୍ଷା
ଜମି ଜମା ଓ ଅନ୍ୟାନ୍ୟ ମାମଲାର ସମୀକ୍ଷା ସମୟ ରେ ନିମ୍ନଲିଖିତ ତଥ୍ୟ ସାମ୍ନାକୁ ଆସିଛ-
ଚଳିତ ଆର୍ଥିକ ବର୍ଷରେ ମେ ମାସ ସୁଦ୍ଧା ୪,୦୬୫ଟି ମ୍ୟୁଟେସନ୍ ମାମଲା ଗ୍ରହଣ କରାଯାଇଥିବା ବେଳେ ୧,୯୬୮ଟି ମାମଲାର ଫଇସଲା କରାଯାଇଛି।
ଜିଲ୍ଲାରେ ୨୨,୬୫୩ଟି ଆଇଏଫଆର ଦାବି ଗ୍ରହଣ କରାଯାଇଥିବା ବେଳେ ୧୯,୪୪୯ଟି ମାମଲାର ଫଇସଲା କରାଯାଇଛି।
ଏହା ସହିତ ସି ଏଫ ଆର (ଗୋଷ୍ଠୀଗତ ଜଙ୍ଗଲ ଜମି ଅଧିକାର) ଏବଂ ସିଏଫଆରଆର ମାମଲା ଗୁଡ଼ିକର ଶୀଘ୍ର ନିଷ୍ପତ୍ତି ନେବା ସହ ରାଜସ୍ବ ରେକର୍ଡ ସଂଶୋଧନ କାର୍ଯ୍ୟକୁ ତୁରନ୍ତ ଶେଷ କରିବାକୁ କୁହାଯାଇଛି।
ଆବକାରୀ ବିଭାଗ ରୁ ମୋଟ ୧ କୋଟି ୭୧ ଲକ୍ଷ ୬୭ ହଜାର ୫୭୮ ଟଙ୍କା ରାଜସ୍ୱ ସଂଗ୍ରହ କରିଛି। ଏହି ସମୟ ମଧ୍ୟରେ ୧୪୭ଟି ମାମଲା ରୁଜୁ କରାଯାଇ ୮୭ ଜଣଙ୍କୁ ଗିରଫ କରାଯାଇଛି। ପରିବହନ ବିଭାଗ ପକ୍ଷ ରୁ ମେ ମାସରେ ମୋଟ ୧ କୋଟି ୭ ଲକ୍ଷ ୭୮ ହଜାର ୫୫୮ ଟଙ୍କା ରାଜସ୍ୱ ଆଦାୟ ହୋଇଛି। ଜିଲ୍ଲାରେ ଚାଲିଥିବା ସ୍ୱତନ୍ତ୍ର ସଙ୍ଘନ ସଂଶୋଧନ (ଏସଆଇଆର-୨୦୨୬) କାର୍ଯ୍ୟକ୍ରମର ସମୀକ୍ଷା କରି ଜିଲ୍ଲାପାଳ ସମସ୍ତ ବିଡିଓଙ୍କୁ ବୁଥ୍ ସ୍ତରୀୟ ଅଧିକାରୀ (ବି ଏଲ ଓ) ମାନଙ୍କ ସହ ନିୟମିତ ଭର୍ଚୁଆଲ ବୈଠକ କରିବାକୁ କହିଛନ୍ତି। ଗ୍ରାହକ ସ୍ୱାର୍ଥ ରକ୍ଷା ପାଇଁ ଜିଲ୍ଲାର ସମସ୍ତ ଅଳଙ୍କାର ଦୋକାନ ଯାଞ୍ଚ କରି ରିପୋର୍ଟ ଦାଖଲ କରିବାକୁ ଲିଗାଲ ମେଟ୍ରୋଲୋଜି ବିଭାଗକୁ ନିର୍ଦ୍ଦେଶ ଦିଆଯାଇଛି।ରାଜସ୍ୱ ପ୍ରଶାସନ କ୍ଷେତ୍ରରେ ଉଲ୍ଲେଖନୀୟ ସହଯୋଗ, ସକ୍ରିୟ ଭୂମିକା ଓ ଉତ୍କୃଷ୍ଟ ସମନ୍ୱୟ ରକ୍ଷା କରିଥିବାରୁ ବୋଡେନ ତହସିଲର ମନବୋଧ ମାଝୀ ଙ୍କୁ ଜିଲ୍ଲାପାଳଙ୍କ ଦ୍ୱାରା ସମ୍ମାନଜନକ ‘ରାଜସ୍ୱ ମିତ୍ର ପୁରସ୍କାର’ ପ୍ରଦାନ କରାଯାଇଛି।
ଉପରୋକ୍ତ ବୈଠକରେ ଡିଏଫଓ (ପ୍ରାନ୍ତିୟ) ଏମ୍. ଅଜିଜ ଖାନ, ଉପ-ଜିଲ୍ଲାପାଳ ସୁର୍ମୀ ସୋରେନ, ଡେପୁଟି ଜିଲ୍ଲାପାଳ (ରାଜସ୍ୱ) ସୁଚିସ୍ମିତା ମହାଉତୀ, ଡେପୁଟି ଜିଲ୍ଲାପାଳ (ନିର୍ବାଚନ) ଶେଖ ନାସିମଙ୍କ ସମେତ ସମସ୍ତ ବ୍ଲକ ଉନ୍ନୟନ ଅଧିକାରୀ , ତହସିଲଦାର ଏବଂ ବିଭିନ୍ନ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।