ଟୋକନ୍ ଥାଇ ବି ବିକ୍ରି ହେଲାନି ଧାନ, ମାନସିକ ଚାପରେ ବିଷ ପିଇ ଚାଷୀଙ୍କ ଆତ୍ମହତ୍ୟା : ଶବ ରଖି ଜାତୀୟ ରାଜପଥ ଅବରୋଧ।

ନୂଆପଡ଼ା -୨୩/୬- ରାଜ୍ୟରେ ଚାଷୀ ଆତ୍ମହତ୍ୟାର ଏକ ସଙ୍ଗିନ ତଥା ହୃଦୟବିଦାରକ ଅଭିଯୋଗ ସାମନାକୁ ଆସିଛି। ଧାନ ବିକ୍ରି ପାଇଁ ସରକାରୀ ଟୋକନ୍ ମିଳିଥିଲେ ମଧ୍ୟ ମଣ୍ଡିରେ ଧାନ ବିକ୍ରି ନହେବାରୁ ମାନସିକ ଚାପ ସହ୍ୟ କରିନପାରି ଜଣେ ଚାଷୀ ବିଷ ପିଇ ଜୀବନ ହାରିଛନ୍ତି। ଏହି ଅଭାବନୀୟ ଘଟଣାଟି ନୂଆପଡ଼ା ଜିଲ୍ଲା କୋମନା ଥାନା ଅନ୍ତର୍ଗତ ଜଡ଼ାମୁଣ୍ଡା ଗାଁରୁ ଆସିଛି। ମୃତ ଚାଷୀଜଣକ ହେଲେ ଜଡ଼ାମୁଣ୍ଡା ଗୋଲେଇପଡ଼ାର ନେପାଳ ମାଝି (୪୪)।      ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି। ବିଜେଡି ଜିଲ୍ଲା ସଭାପତି ଅବନୀ ରଞ୍ଜନ ଯୋଷୀ ,ଜିଲ୍ଲା କଂଗ୍ରେସ ସଭାପତି ଘାସିରାମ ମାଝି ଓ ଜିଲ୍ଲା ଆଦିବାସୀ କଲ୍ୟାଣ ସଂଘ ର ସାଧାରଣ ସମ୍ପାଦକ ଭକ୍ତବନ୍ଧୁ ଧରୁଆ ଙ୍କ ନେତୃତ୍ବରେ ସହ ସହ ଚାଷି ଓ ମୃତ ଚାଷୀଙ୍କ ପରିବାର ବର୍ଗ ଶବକୁ ରାସ୍ତାରେ ରଖି କ୍ଷତିପୂରଣ ଦାବିରେ ଜାତୀୟ ରାଜପଥ-୩୫୩ କୁ ୩ ଘଣ୍ଟା ରୁ ଉର୍ଦ୍ଧ୍ କାଳ ଅବରୋଧ କରିଥିଲେ।
ଟୋକନ୍ ମିଳିବାର ୨୪ ଦିନ ପରେ ବି ବିକ୍ରି ହେଲାନି ଧାନ। ମିଳିଥିବା ସୂଚନା ଅନୁଯାୟୀ, ନେପାଳ ମାଝି ଚଳିତ ରବି ଋତୁରେ ୩ ଏକର ଜମିରେ ଧାନ ଓ ୨ ଏକର ଜମିରେ ଚିନାବାଦାମ ଚାଷ କରିଥିଲେ। ଧାନ ବିକ୍ରି ପାଇଁ ସେ ନିୟମାନୁଯାୟୀ ଆବେଦନ କରି ଗତ ୩୦ ମେ’ ୨୦୨୬ ରେ ସରକାରୀ ଟୋକନ୍ ମଧ୍ୟ ପାଇଥିଲେ। ତାଙ୍କୁ ୩୬.୯୬ କ୍ଵିଣ୍ଟାଲ ଧାନ ବିକ୍ରି କରିବା ପାଇଁ ଅନୁମତି ମିଳିଥିଲା। ହେଲେ ଦୁର୍ଭାଗ୍ୟର ବିଷୟ, ଟୋକନ୍ ପାଇବାର ୨୪ ଦିନ ବିତିଯାଇଥିଲେ ମଧ୍ୟ ମଣ୍ଡି ଅବ୍ୟବସ୍ଥା ଯୋଗୁଁ ତାଙ୍କ ଧାନ ବିକ୍ରି ହୋଇପାରି ନଥିଲା।
ଋଣ ବୋଝ ଓ ପରିବାର ପ୍ରତିପୋଷଣ ଚିନ୍ତା ବଢ଼ାଇଲା। ମାନସିକ ଚାପ
ଧାନ ବିକ୍ରି ନହେବାରୁ ଚାଷ କାର୍ଯ୍ୟରେ ଲାଗିଥିବା ଟ୍ରାକ୍ଟର ଓ ଥେସର ମେସିନର ମାଲିକଙ୍କୁ ପାଉଣା ଦେବା ନେପାଳଙ୍କ ପାଇଁ କଷ୍ଟକର ହୋଇପଡ଼ିଥିଲା। ଏହା ସହିତ ପରିବାର ଚଳାଇବା ଏବଂ ନିଜର ୩ ଟି ଛୁଆଙ୍କ ପାଠପଢ଼ା ଖର୍ଚ୍ଚକୁ ନେଇ ସେ ପ୍ରବଳ ମାନସିକ ଚାପରେ ଗତି କରୁଥିଲେ।
ଗତ ସୋମବାର ଦିନ ଧାନ ବିକ୍ରି ଦାବିରେ ଜଡ଼ାମୁଣ୍ଡା ମଣ୍ଡିର ଚାଷୀମାନେ ଜିଲ୍ଲା ମୁଖ୍ୟାଳୟ ସ୍ଥିତ ସିଏସଓ ଅଫିସ୍ ସମ୍ମୁଖରେ ଧାରଣା ଦେଇଥିଲେ, ଯେଉଁଥିରେ ନେପାଳ ମଧ୍ୟ ସାମିଲ ଥିଲେ। ଅପରାହ୍ନରେ ସେଠାରୁ ନିରାଶ ହୋଇ ଘରକୁ ଫେରିବା ପରେ ଟଙ୍କା ପଇସାକୁ ନେଇ ପରିବାର ଲୋକଙ୍କ ସହ ତାଙ୍କର ବାକ୍‌ ବିତଣ୍ଡା ହୋଇଥିଲା। “ଧାନ ବିକ୍ରି ହେଉନି, ଟଙ୍କା କେଉଁଠୁ ଆସିବ? ଟଙ୍କା ଆସିଲେ ସିନା ଧାର-ଉଧାର ସୁଝିବି ଓ ପରିବାର ଚଳାଇବି” ବୋଲି ସେ ପ୍ରତି-ଉତ୍ତର ଦେଇଥିଲେ।
ମାନସିକ ଭାରସାମ୍ୟ ହରାଇ ପିଇଦେଲେ ବିଷ।
ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଏହି ବାକ୍‌ ବିତଣ୍ଡା ପରେ ଅତ୍ୟଧିକ ଚାପ ଯୋଗୁଁ ସେ ମାନସିକ ଭାରସାମ୍ୟ ହରାଇ ବିଷ ପିଇ ଦେଇଥିଲେ। ଗୁରୁତର ଅବସ୍ଥାରେ ପରିବାର ଲୋକେ ତାଙ୍କୁ ଉଦ୍ଧାର କରି ସୋମବାର ସଂଧ୍ୟା ରେ ନୂଆପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ହେଲେ ଚିକିତ୍ସାଧୀନ ଅବସ୍ଥାରେ ସନ୍ଧ୍ୟା ସମୟରେ ତାଙ୍କର ମୃତ୍ୟୁ ହୋଇଯାଇଥିଲା। ଘଟଣା ସମ୍ପର୍କରେ ଖବର ପାଇ ପୁଲିସ୍ ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ, ଘଟଣାର ତଦନ୍ତ ଆରମ୍ଭ କରିଥିଲା। ଅପରପକ୍ଷରେ, ଜଣେ ଚାଷୀଙ୍କର ଏଭଳି ଅକାଳ ବିୟୋଗ ପାଇଁ ପ୍ରଶାସନିକ ଅବହେଳା କୁ ଦାୟୀ କରି ଆଜି ସ୍ଥାନୀୟ ଚାଷୀକୂଳ ଏବଂ ମୃତକଙ୍କ ପରିବାର ଲୋକେ ଜାତୀୟ ରାଜପଥ ଅବରୋଧ କରିବା ସହ ଉଚିତ୍ କ୍ଷତିପୂରଣ ଦାବି କରିଛନ୍ତି। ଆନ୍ଦୋଳନ ରେ କୃଷକ ନେତା ଇସାକ ମହମ୍ମଦ, ନେତା ହେମନ୍ତ କର,ସୁଧୀର ମିଶ୍ର,ବିରଞ୍ଚି ବାଗ, ଜିଲ୍ଲା ପରିଷଦ ସଭ୍ୟ ଭରତ ରାଉତ ପ୍ରମୁଖ ଉପସ୍ଥିତ ଥିଲେ । ଘଟଣା ସ୍ଥଳ କୁ ଉପ ଜିଲ୍ଲାପାଳ ସୂର୍ମୀ ସୋରେନ୍ ଆସି ଆନ୍ଦୋଳନ ରତ ବିକ୍ଷୋଭକାରୀଙ୍କ ସହ ଆଲୋଚନା କରି ବୁଝା ସୁଝା କରିଥିଲେ। ମୃତକ ପରିବାର କୁ ୨୦ ଲକ୍ଷ କ୍ଷତି ପୂରଣ ଓ ତାଙ୍କ ପୁଅ ଝିଅ ଙ୍କୁ ପାଠ ପଢ଼ାଇ ବା ପାଇଁ ସାହାଯ୍ୟ, ଧାନ ଉଠାଇବା ବ୍ୟବସ୍ଥା ଇତ୍ୟାଦି ଦାବି କୁ ଉପ ଜିଲ୍ଲାପାଳ ଶ୍ରୀମତି ସୋରେନ୍ ଗୁରୁତ୍ଵ ଦେଇ ଶୁଣିଲେ ଓ ରେଡ କ୍ରସ ପାଣ୍ଠି ରୁ ତୁରନ୍ତ ୫୦ ହଜାର ଟଙ୍କା ସହାୟତା ପ୍ରଦାନ୍ କରିଥିଲେ। ରାସ୍ତା ରୋକ ଆନ୍ଦୋଳନ ରୁ ଚାଷୀ ଓହରି ଥିଲେ।