“ନିଶା ନୁହେଁ, ଜୀବନ ଚାହୁଁ” — ନିଶାମୁକ୍ତ ସମାଜ ଗଠନ ପାଇଁ ଜିଲ୍ଲା ପ୍ରଶାସନର ମହା ସଂକଳ୍ପ।

ନୂଆପଡ଼ା -୨୫/୬- ନିଶାମୁକ୍ତ ସମାଜ ଗଠନ ଏବଂ ଏକ ସୁସ୍ଥ ଆଦର୍ଶ ଜିଲ୍ଲା ଗଠନ ଦିଗରେ ନୂଆପଡ଼ା ଜିଲ୍ଲା ପ୍ରଶାସନ ପକ୍ଷରୁ ଏକ ବଡ଼ ପଦକ୍ଷେପ ନିଆଯାଇଛି। ଅନ୍ତର୍ଜାତୀୟ ନିଶା ଅପବ୍ୟବହାର ଏବଂ ଅବୈଧ ଚାଲାଣ ବିରୋଧୀ ଦିବସ-୨୦୨୬ ଉପଲକ୍ଷେ “ନିଶା ନୁହେଁ, ଜୀବନ ଚାହୁଁ” ସଂକଳ୍ପ ସହ ଏକ ଭବ୍ୟ ପାରମ୍ପରିକ ସାଂସ୍କୃତିକ କାର୍ଯ୍ୟକ୍ରମ ସ୍ଥାନୀୟ କଲ୍ୟାଣ ମଣ୍ଡପ ଠାରେ ଅନୁଷ୍ଠିତ ହୋଇଯାଇଛି। ନୂଆପଡ଼ା ଜିଲ୍ଲା ପ୍ରଶାସନ ଏବଂ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ମିଳିତ ଆନୁକୂଲ୍ୟରେ ଏହି ସଚେତନତା ସଭା ଆୟୋଜିତ ହୋଇଥିଲା।

କଳା ଓ ସଂସ୍କୃତି ମାଧ୍ୟମରେ ସଚେତନତାର ବାର୍ତ୍ତା।
ଏହି କାର୍ଯ୍ୟକ୍ରମର ମୁଖ୍ୟ ଆକର୍ଷଣ ସାଜିଥିଲେ ଅଞ୍ଚଳର ବିଭିନ୍ନ ପାରମ୍ପରିକ କଳାଦଳ। ନିଜ ନିଜର ଅପୂର୍ବ କଳା ପ୍ରଦର୍ଶନ ମାଧ୍ୟମରେ ସେମାନେ ନିଶାର କୁପ୍ରଭାବ ଏବଂ ଏହାର ନିବାରଣ ସମ୍ପର୍କରେ ଜନସାଧାରଣଙ୍କୁ ସଚେତନ କରିଥିଲେ।

ଅଂଶଗ୍ରହଣ କରିଥିବା ପ୍ରମୁଖ ଦଳଗୁଡ଼ିକ ହେଲେ , ସ୍ୱର ଶୃଙ୍ଗାର ସାଂସ୍କୃତିକ ଅନୁଷ୍ଠାନ ଟାନୱାଟ, ଜୟ ଭୈରବ ସାଂସ୍କୃତିକ ଅନୁଷ୍ଠାନ, ଟିକରାପଡ଼ା (ପାଲା), ମା’ ପଳସିପଲେନ ସଞ୍ଚାର ଦଳ, ଚାନ୍ଦୋପଲା,
ଜୟ ମା’ ବଂଜାରି ପାଲା ଦଳ, ଗୋହିରପଦର,
ମା’ ବାଞ୍ଜିବହଲେନ୍ ଘୁମୁରା ଦଳ, ବିଶିବାହାଲ,
ଜୟ ଜଗନ୍ନାଥ ପାଲା ଦଳ, ଜଗନ୍ନାଥପାଲି
ଏହି ଅବସରରେ ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶ ଯୋଗଦେଇ ନୂଆପଡ଼ାକୁ ଏକ ନିଶାମୁକ୍ତ ଆଦର୍ଶ ଜିଲ୍ଲା ଭାବେ ଗଢ଼ି ତୋଳିବାକୁ ସମସ୍ତଙ୍କୁ ଆହ୍ୱାନ ଦେଇଥିଲେ। “ନିଶା ପ୍ରଥମେ ମଣିଷର ଜୀବିକାକୁ ପ୍ରଭାବିତ କରେ ଏବଂ ଧୀରେ ଧୀରେ ସମ୍ପୂର୍ଣ୍ଣ ଜୀବନକୁ ବିପର୍ଯ୍ୟସ୍ତ କରିଦିଏ। ଏକ ସୁସ୍ଥ ଓ ନିଶାମୁକ୍ତ ସମାଜ ଗଠନ ପାଇଁ ପ୍ରତ୍ୟେକ ନାଗରିକଙ୍କ ସକ୍ରିୟ ସହଯୋଗ ଏକାନ୍ତ ଆବଶ୍ୟକ।” ବୋଲି ଜିଲ୍ଲାପାଳ ଶ୍ରୀ ଦାଶ, କହିଥିଲେ।
ଉପରୋକ୍ତ କାର୍ଯ୍ୟକ୍ରମ ରେ ଜିଲ୍ଲାର ଅନେକ ବରିଷ୍ଠ ଅଧିକାରୀ ଉପସ୍ଥିତ ରହି ସମାଜକୁ ନିଶାମୁକ୍ତ କରିବାର ସଙ୍କଳ୍ପ ନେଇଥିଲେ।
ଡା. ଦ୍ୱାରିକାନାଥ ସତପଥୀ (ସିଡିଏମଓ),
ପ୍ରଶାନ୍ତ କୁମାର ମହାନ୍ତି (ଜିଲ୍ଲା ଶିକ୍ଷା ଅଧିକାରୀ),
ରାଜେନ୍ଦ୍ର ପ୍ରସାଦ ବଢ଼େଇ (ଜିଲ୍ଲା କ୍ରୀଡ଼ା ଅଧିକାରୀ),
ଅନନ୍ତ କୁମାର ହେମ୍ବ୍ରମ (ଜିଲ୍ଲା ସାମାଜିକ ସୁରକ୍ଷା ଅଧିକାରୀ) ,ରମେଶ ମହରା (ଜିଲ୍ଲା ସଂସ୍କୃତି ଅଧିକାରୀ) ଓ ରମାକାନ୍ତ ବିଶ୍ୱାସ (ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ) ପ୍ରମୁଖ ଉପସ୍ଥିତ ଥିଲେ।
ଏହା ସହିତ ବିପୁଳ ସଂଖ୍ୟାରେ ଛାତ୍ରଛାତ୍ରୀ, ବୁଦ୍ଧିଜୀବୀ ଓ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ। ସ୍ୱଚ୍ଛ ଭାରତ ସଂଯୋଜକ ଅନିଲ କୁମାର ଲେଙ୍କା ସମଗ୍ର କାର୍ଯ୍ୟକ୍ରମକୁ ସଫଳତାର ସହ ପରିଚାଳନା କରିବା ସହିତ ଶେଷରେ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।