ନୂଆପଡ଼ାରେ ଚାଷୀଙ୍କ ପାଇଁ ଆଧୁନିକ ଜ୍ଞାନକୌଶଳ : ଯାନ୍ତ୍ରିକ ପ୍ରଣାଳୀରେ ଧାନ ବୁଣା ତାଲିମ ଶିବିର ସଫଳତାର ସହ ସମ୍ପନ୍ନ

ନୂଆପଡ଼ା -୧୦/୬- ଧାନ ଚାଷରେ ଜଳ ଓ ଶ୍ରମିକ ସମସ୍ୟାର ସମାଧାନ ସହ ଚାଷୀଙ୍କ ରୋଜଗାର ବଢ଼ାଇବା ପାଇଁ ଏକ ଅଭିନବ ପ୍ରୟାସ। ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ କୁରୁମପୁରୀ ଗ୍ରାମଠାରେ ଆଜି ଯାନ୍ତ୍ରିକ ପ୍ରତ୍ୟକ୍ଷ ବିହନ ବୁଣା (mDSR – Mechanized Direct Seeded Rice) ସମ୍ବନ୍ଧୀୟ ଏକ ମହତ୍ତ୍ୱପୂର୍ଣ୍ଣ ପ୍ରଶିକ୍ଷଣ କାର୍ଯ୍ୟକ୍ରମ ସଫଳତାର ସହ ଆୟୋଜିତ ହୋଇଯାଇଛି। ଆନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନ (ଆଇଆରଆରଆଇ), କୃଷି ବିଭାଗ ଏବଂ ସ୍ଥାନୀୟ ଏନଜିଓ ‘ଭରସା’ର ମିଳିତ ସହଯୋଗରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
ଏହି ଉଚ୍ଚସ୍ତରୀୟ ପ୍ରଶିକ୍ଷଣ ଶିବିରରେ କୃଷି ବିଜ୍ଞାନ କେନ୍ଦ୍ର (କେଭିକେ)ର ବୈଜ୍ଞାନିକ, ବ୍ଲକ କୃଷି ଅଧିକାରୀ , ସହକାରୀ କୃଷି ଅଧିକାରୀ ,ଗ୍ରାମ କୃଷି କର୍ମଚାରୀ ଏବଂ କୃଷି ଅଧିକାରୀ ପ୍ରମୁଖ ଉପସ୍ଥିତ ଥିଲେ। ଏହା ସହିତ ଅଞ୍ଚଳର ଚାଷୀ ଏବଂ ଟ୍ରାକ୍ଟର ଚାଳକ ମାନଙ୍କୁ ମିଶାଇ ପ୍ରାୟ ୭୦ ରୁ ଉର୍ଦ୍ଧ ବ୍ୟକ୍ତି ଏହି କାର୍ଯ୍ୟକ୍ରମ ରେ ଯୋଗଦେଇ ଆଧୁନିକ ଚାଷ ପ୍ରଣାଳୀ ବିଷୟରେ ଜ୍ଞାନ ଆହରଣ କରିଥିଲେ।
ଶିବିରରେ ଉପସ୍ଥିତ କୃଷି ବୈଜ୍ଞାନିକମାନେ ଯାନ୍ତ୍ରିକ ପ୍ରତ୍ୟକ୍ଷ ବିହନ ବୁଣା ପ୍ରଣାଳୀର ଅନେକ ଉପକାରିତା ବିଷୟରେ ଆଲୋକପାତ କରିଥିଲେ। ସେମାନଙ୍କ ମତରେ,ଏହି ପ୍ରଣାଳୀ ଦ୍ୱାରା ପ୍ରଚୁର ଜଳ ସଞ୍ଚୟ ହେବା ସହ ଶ୍ରମିକ ଖର୍ଚ୍ଚ କମିଥାଏ।
ଧାନ ଚାଷର ଉତ୍ପାଦନ ଖର୍ଚ୍ଚ ହ୍ରାସ ପାଉଥିବାରୁ ଏହା ଚାଷୀଙ୍କ ପାଇଁ ଅଧିକ ଲାଭଜନକ ସାବ୍ୟସ୍ତ ହେବ।
ଚାଷୀ ଓ ଟ୍ରାକ୍ଟର ଚାଳକ ମାନଙ୍କୁ ସ୍ୱତନ୍ତ୍ର mDSR ଯନ୍ତ୍ରର ବ୍ୟବହାର, ସଠିକ୍ ବିହନ ବୁଣା ପ୍ରକ୍ରିୟା ଏବଂ ଉନ୍ନତ ଫସଲ ପରିଚାଳନା ସମ୍ବନ୍ଧରେ ବ୍ୟବହାରିକ ଜ୍ଞାନ ପ୍ରଦାନ କରାଯାଇଥିଲା।
ମରୁଡ଼ି ମୁକାବିଲା ପାଇଁ ବଡ଼ ପଦକ୍ଷେପ- ପ୍ରକାଶ ଥାଉ କି, ଭାରତ ସରକାରଙ୍କ ବିପର୍ଯୟ ପ୍ରଶମନ ବିଭାଗ, ଓଡ଼ିଶା ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ, ‘ଇରି’ ଏବଂ ‘ଇକ୍ରୀସାଟ’ ର ମିଳିତ ସହଯୋଗରେ ନୂଆପଡା ଜିଲ୍ଲା କୋମନା ବ୍ଲକର ବିଭିନ୍ନ ସ୍ଥାନରେ ଏଭଳି ୧୭ ଟି ସ୍ୱତନ୍ତ୍ର କାର୍ଯ୍ୟକ୍ରମ ହାତକୁ ନିଆଯାଇଛି। ଏହି ବ୍ୟାପକ ଅଭିଯାନ ମାଧ୍ୟମରେ ମରୁଡ଼ି ପ୍ରପୀଡ଼ିତ ଅଞ୍ଚଳରେ ଚାଷ ର କ୍ଷତି କୁ କମ୍ କରାଯାଇପାରିବ ଏବଂ ଆଧୁନିକ ପ୍ରଯୁକ୍ତିବିଦ୍ୟା ବ୍ୟବହାର କରି ଚାଷୀମାନେ ନିଜ ଜୀବନ ଜୀବିକାରେ ଉନ୍ନତି ଆଣିପାରିବେ।
ଏହି କାର୍ଯ୍ୟକ୍ରମ ଯୋଗୁଁ ସ୍ଥାନୀୟ ଅଞ୍ଚଳର ଚାଷୀମାନଙ୍କ ମଧ୍ୟରେ ଯାନ୍ତ୍ରିକ ଚାଷ ପ୍ରତି ଆଗ୍ରହ ଓ ଉତ୍ସାହ ବେଶ ବୃଦ୍ଧି ପାଇଥିବା ଦେଖିବାକୁ ମିଳିଛି।