ନୂଆପଡ଼ାରେ ନିଶା ବିରୋଧୀ ମହାସଂଗ୍ରାମ : ଗଠନ ହେଲା ବିଶାଳ ମାନବ ଶୃଙ୍ଖଳା, ଦୁଲୁକିଲା ସହର।

ନୂଆପଡ଼ା -୨୪/୬- ଅନ୍ତର୍ଜାତୀୟ ନିଶା ଅପବ୍ୟବହାର ଏବଂ ଅବୈଧ ଚାଲାଣ ବିରୋଧୀ ଦିବସ ଅବସରରେ ନୂଆପଡ଼ା ସହରରେ ଦେଖିବାକୁ ମିଳିଛି ଏକ ଅଭୂତପୂର୍ବ ଦୃଶ୍ୟ। ଯୁବପିଢ଼ିଙ୍କୁ ନିଶାର କରାଳ ଗ୍ରାସରୁ ରକ୍ଷା କରିବା ଏବଂ ଏକ ସୁସ୍ଥ ସମାଜ ଗଠନ ପାଇଁ ଜିଲ୍ଲା ପ୍ରଶାସନ ପକ୍ଷରୁ ଏକ ବିଶାଳ ଜନସଚେତନତା ଅଭିଯାନ ଆୟୋଜିତ ହୋଇଯାଇଛି।
ଜିଲ୍ଲା ସାମାଜିକ ସୁରକ୍ଷା ଏବଂ ଭିନ୍ନକ୍ଷମ ସଶକ୍ତିକରଣ ବିଭାଗ ଓ ଅବକାରୀ ବିଭାଗର ମିଳିତ ଆନୁକୂଳ୍ୟରେ ଏହି ମେଗା ଯୁବ ରାଲି ଏବଂ ମାନବ ଶୃଙ୍ଖଳା କାର୍ଯ୍ୟକ୍ରମ ସଫଳତାର ସହ ସମ୍ପନ୍ନ ହୋଇଛି।
ସକାଳ ଠିକ୍ ୭ଟା ସମୟରେ ଜିଲ୍ଲାପାଳ କାର୍ଯ୍ୟାଳୟ ପରିସରରେ ଉତ୍ସାହର ମାହୋଲ ଦେଖିବାକୁ ମିଳିଥିଲା। ଜିଲ୍ଲାପାଳ ମଧୁସୂଦନ ଦାଶ ସବୁଜ ପତାକା ଦେଖାଇ ଏହି ଭବ୍ୟ ଯୁବ ରାଲିର ଶୁଭାରମ୍ଭ କରିଥିଲେ। ରାଲିଟି ଜ଼ିଲ୍ଲାପାଳଙ୍କ ଅଫିସରୁ ବାହାରି ସହରର ପ୍ରମୁଖ ସ୍ଥାନ ଏକତା ଛକ ପର୍ଯ୍ୟନ୍ତ ଯାଇଥିଲା।

ଏକତା ଛକରୁ ଜିଲ୍ଲାପାଳ ଅଫିସ: ସୃଷ୍ଟି ହେଲା ମାନବ ଶୃଙ୍ଖଳା –
ଏହି ଅଭିଯାନର ସବୁଠାରୁ ଆକର୍ଷଣୀୟ ଦୃଶ୍ୟ ଥିଲା ଏକତା ଛକ ଠାରୁ ଜ଼ିଲ୍ଲାପାଳ ଅଫିସ ପର୍ଯ୍ୟନ୍ତ ଗଠନ ହୋଇଥିବା ଦୀର୍ଘ ମାନବ ଶୃଙ୍ଖଳା ଶହ ଶହ ଲୋକ ହାତକୁ ହାତ ମିଳାଇ ନିଶା ମୁକ୍ତ ସମାଜ ଗଠନ ପାଇଁ ସଂକଳ୍ପ ନେଇଥିଲେ। ଗଗନ ପବନ କମ୍ପାଇ ନିଶାଦ୍ରବ୍ୟ ସେବନର କୁପ୍ରଭାବ ଓ ଅବୈଧ ନିଶା କାରବାର ବିରୋଧରେ ବିଭିନ୍ନ ସଚେତନତା ମୂଳକ ସ୍ଲୋଗାନ ଦିଆଯାଇଥିଲା।

“ନିଶାକୁ ନା, ଜୀବନକୁ ହଁ” — ଏହି ବାର୍ତ୍ତା ସହ ଯୁବପିଢ଼ି ଙ୍କୁ ନିଶା ଠାରୁ ଦୂରେଇ ରହି ଏକ ସୁନ୍ଦର ଓ ପ୍ରଗତିଶୀଳ ସମାଜ ଗଠନରେ ସାମିଲ ହେବାକୁ ପ୍ରଶାସନ ତରଫରୁ ଆହ୍ୱାନ କରାଯାଇଥିଲା। ଶହ ଶହ ସଂଖ୍ୟାର ସାମିଲ ହେଲେ ଜନସାଧାରଣ
ଏହି କାର୍ଯ୍ୟକ୍ରମରେ ଜିଲ୍ଲାର ପ୍ରମୁଖ ପ୍ରଶାସନିକ ଅଧିକାରୀ ଓ ଜନସାଧାରଣ ସ୍ୱତଃସ୍ଫୁର୍ତ୍ତ ଭାବେ ଯୋଗ ଦେଇଥିଲେ।
ଏ ଅବସର ରେ ମୁଖ୍ୟ ଉନ୍ନୟନ ଅଧିକାରୀ ଲମ୍ବୋଦର ଧରୁଆ, ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଅନନ୍ତ ହେମ୍ବ୍ରମ।
ବିଭିନ୍ନ ବିଭାଗର ଜିଲ୍ଲାସ୍ତରୀୟ ଅଧିକାରୀ, ଶିକ୍ଷକ, ସ୍କୁଲ ଓ କଲେଜର ଶହ ଶହ ଛାତ୍ରଛାତ୍ରୀ, ସ୍ୱେଚ୍ଛାସେବୀ ସଂଗଠନର ପ୍ରତିନିଧି ଏବଂ ସ୍ଥାନୀୟ ବୁଦ୍ଧିଜୀବୀ ସକ୍ରିୟ ଅଂଶ ଗ୍ରହଣ କରିଥିଲେ।
ଜିଲ୍ଲା ପ୍ରଶାସନର ଏଭଳି ପ୍ରୟାସକୁ ସହରବାସୀ ଉଚ୍ଚ ପ୍ରଶଂସା କରିଛନ୍ତି ଏବଂ ଏହା ଆଗାମୀ ଦିନରେ ନୂଆପଡ଼ାକୁ ନିଶାମୁକ୍ତ କରିବାରେ ଏକ ବଡ଼ ପଦକ୍ଷେପ ହେବ ବୋଲି ଆଶା ପ୍ରକାଶ ପାଇଛି।