ନୂଆପଡ଼ା ଜିଲ୍ଲା କୋର୍ଟ ଓ ଉପ-କାରାଗାର ରେ ପାଳିତ ହେଲା ଆନ୍ତର୍ଜାତୀୟ ଯୋଗ ଦିବସ।

ନୂଆପଡ଼ା -୨୧/୬-ସାରା ବିଶ୍ୱ ସହ ନୂଆପଡ଼ା ଜିଲ୍ଲା ରେ ମଧ୍ୟ ଆନ୍ତର୍ଜାତୀୟ ଯୋଗ ଦିବସ ବେଶ୍ ଉତ୍ସାହର ସହ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ନୂଆପଡ଼ା ଜିଲ୍ଲା କୋର୍ଟ ପରିସରରେ ଜିଲ୍ଲା କୋର୍ଟ ଏବଂ ଜିଲ୍ଲା ଆଇନ ସେବା ପ୍ରାଧିକରଣ ର ମିଳିତ ଆନୁକୂଲ୍ୟରେ ଏକ ବିଶେଷ ଯୋଗ ଶିବିରର ଆୟୋଜନ କରାଯାଇଥିଲା।ଏହି କାର୍ଯ୍ୟକ୍ରମରେ ଜିଲ୍ଲା ଜଜ୍ ତଥା ଜିଲ୍ଲା ଆଇନ ସେବା ପ୍ରାଧିକରଣର ଅଧ୍ୟକ୍ଷ ସମର ବିଳାସ ବେହେରା ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ଜିଲ୍ଲା କୋର୍ଟର ସମସ୍ତ ବିଚାରପତି, କର୍ମଚାରୀ ଏବଂ ପ୍ରାଧିକରଣର ଅଧିକାର ମିତ୍ରମାନେ ଏକତ୍ରିତ ହୋଇ ଶୃଙ୍ଖଳିତ ଭାବେ ଯୋଗ ଅଭ୍ୟାସ କରିବା ସହ ସୁସ୍ଥ ଶରୀର ଓ ଶାନ୍ତ ମନ ପାଇଁ ଏହାର ଆବଶ୍ୟକତା ଉପରେ ଗୁରୁତ୍ୱ ଦେଇଥିଲେ।
ଉପ-କାରାଗାର ରେ ଯୋଗର ବାର୍ତ୍ତା : ସାମିଲ ହେଲେ ଜେଲ ଅନ୍ତେବାସୀ।
କୋର୍ଟ ପରିସର ପରେ, ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ନୂଆପଡ଼ା ଉପ-କାରାଗାର ପରିସରରେ ମଧ୍ୟ ଏକ ଯୋଗ ଶିବିର ଅନୁଷ୍ଠିତ ହୋଇଥିଲା। ଏହି ଅଭିନବ ପ୍ରୟାସରେ ଜେଲର ସମସ୍ତ କଏଦୀ ଏବଂ ଜେଲ୍ କର୍ମଚାରୀମାନେ ଅତ୍ୟନ୍ତ ଉତ୍ସାହର ସହ ସାମିଲ ହୋଇ ଯୋଗାସନ ଓ ପ୍ରାଣାୟାମ କରିଥିଲେ।କାର୍ଯ୍ୟକ୍ରମ ର ଶେଷ ରେ ପ୍ରାଧିକରଣ (ଡିଏଲଏସଏ) ର ସଚିବ ନବନୀତା ଦାଶ କଏଦୀମାନ ଙ୍କୁ ଯୋଗର ଉପାଦେୟତା ଏବଂ ଏହାର ସୁଫଳ ବିଷୟ ରେ ବୁଝାଇବା ସହ ପ୍ରତିଦିନ ନିଜ ଜୀବନ ରେ ଯୋଗକୁ ଆପଣେଇବାକୁ ଆହ୍ୱାନ ଦେଇଥିଲେ।
“ଦୈନନ୍ଦିନ ଜୀବନ ରେ ନିୟମିତ ଯୋଗ କଲେ ମାନସିକ ଚାପ ଦୂର ହେବା ସହ ଜୀବନରେ ସକାରାତ୍ମକ ପରିବର୍ତ୍ତନ ଆସିଥାଏ।” ।
ଏହି କାର୍ଯ୍ୟକ୍ରମ ଜେଲ୍‌ ର ଅନ୍ତେବାସୀମାନଙ୍କ ମଧ୍ୟରେ ଏକ ନୂତନ ଶକ୍ତି ଓ ଆଶାର ସଞ୍ଚାର କରିଥିବା ଦେଖିବାକୁ ମିଳିଛି।