ବିଶିଷ୍ଟ ଶିକ୍ଷାବିତ୍ ତଥା ସଙ୍ଗୀତଜ୍ଞ ଡ. ସୁପ୍ରିୟୋ ଚାଟ୍ଟାର୍ଜୀଙ୍କ ଅକାଳ ବିୟୋଗ: ଖଡ଼ିଆଳ ସ୍ୱୟଂଶାସିତ ମହାବିଦ୍ୟାଳୟରେ ଶୋକ ସଭା।

ନୂଆପଡ଼ା-୧୯/୦୯- ଖଡ଼ିଆଳ ମହାବିଦ୍ୟାଳୟର ପୂର୍ବତନ ଇଂରାଜୀ ପ୍ରାଧ୍ୟାପକ ତଥା ଅଧ୍ୟକ୍ଷ, ବିଶିଷ୍ଟ ଶିକ୍ଷାବିତ୍ ଏବଂ ସଙ୍ଗୀତଜ୍ଞ ସ୍ୱର୍ଗତ ଡ. ସୁପ୍ରିୟୋ ଚାଟ୍ଟାର୍ଜୀଙ୍କର ଅକାଳ ବିୟୋଗ ଘଟିଛି। ତାଙ୍କର ଏହି ବିୟୋଗରେ ସମଗ୍ର ଖଡ଼ିଆଳ ଅଞ୍ଚଳ ତଥା ଶିକ୍ଷା ଜଗତରେ ଗଭୀର ଶୋକର ଛାୟା ଖେଳିଯାଇଛି।
ଏହି ଅବସରରେ ମହାବିଦ୍ୟାଳୟ ପରିସରରେ ଏକ ଶୋକ ସଭା ଆୟୋଜିତ ହୋଇଥିଲା। ବର୍ତ୍ତମାନର ଅଧ୍ୟକ୍ଷ ପ୍ରଶାନ୍ତ କୁମାର ପଣ୍ଡାଙ୍କ ସମେତ ସମସ୍ତ ଅଧ୍ୟାପକ, ଅଧ୍ୟାପିକା, ସହଯୋଗୀ କର୍ମଚାରୀ ଏବଂ ଛାତ୍ରଛାତ୍ରୀ ଉପସ୍ଥିତ ରହି ତାଙ୍କର ସ୍ମୃତି ଚାରଣ କରିଥିଲେ। ଡ. ଚାଟ୍ଟାର୍ଜୀ କେବଳ ଜଣେ ଆଦର୍ଶ ଶିକ୍ଷକ ନଥିଲେ, ବରଂ ସେ ଥିଲେ ଜଣେ ଛାତ୍ରବତ୍ସଳ, ଗୁଣୀ ଓ ଅତ୍ୟନ୍ତ ଜ୍ଞାନୀ ବ୍ୟକ୍ତି। ଅଧ୍ୟକ୍ଷ ଥିବା ସମୟରେ ସେ ମହାବିଦ୍ୟାଳୟର ବହୁବିଧ ଉନ୍ନତି, ପ୍ରଗତି ଓ ବିକାଶମୂଳକ କାର୍ଯ୍ୟ କରିବା ସହ ନିଜ ବୃତ୍ତିଗତ ଜୀବନରେ ସମୟାନୁବର୍ତ୍ତିତା ଓ ଶୃଙ୍ଖଳାକୁ ସର୍ବଦା ଗୁରୁତ୍ୱ ଦେଉଥିଲେ।
ଶିକ୍ଷାଦାନ ବ୍ୟତୀତ ସାହିତ୍ୟ ଓ ସଙ୍ଗୀତ କ୍ଷେତ୍ରରେ ମଧ୍ୟ ତାଙ୍କର ଅବଦାନ ଥିଲା ଅତୁଳନୀୟ। ଖଡ଼ିଆଳ ସହରରେ ସେ “ସୁର ଝଙ୍କାର” ନାମକ ଏକ ସଙ୍ଗୀତ ବିଦ୍ୟାଳୟ ପ୍ରତିଷ୍ଠା କରି ଅଞ୍ଚଳର ଛାତ୍ରଛାତ୍ରୀଙ୍କ ମଧ୍ୟରେ ସଙ୍ଗୀତ ଏବଂ ବାଦ୍ୟଯନ୍ତ୍ର ଶିକ୍ଷା ପ୍ରତି ବ୍ୟାପକ ଆଗ୍ରହ ସୃଷ୍ଟି କରିଥିଲେ। ସେ ନିଜେ ଜଣେ ଉଚ୍ଚକୋଟୀର ଶାସ୍ତ୍ରୀୟ ସଙ୍ଗୀତ କଣ୍ଠଶିଳ୍ପୀ ଏବଂ ‘ବିଶାରଦ’ ଥିଲେ। ଏଥିସହ ସାହିତ୍ୟ ପ୍ରତି ତାଙ୍କର ଗଭୀର ରୁଚି ଥିଲା। ତାଙ୍କ ଦ୍ୱାରା ଲିଖିତ ଅନେକ ଉଚ୍ଚକୋଟୀର ପ୍ରବନ୍ଧ ‘ଓଡ଼ିଶା ପ୍ରସଙ୍ଗ’ ସମେତ ରାଜ୍ୟର ବିଭିନ୍ନ ଲବ୍ଧପ୍ରତିଷ୍ଠିତ ପତ୍ରିକାରେ ପ୍ରକାଶିତ ହୋଇ ପାଠକୀୟ ଆଦୃତି ଲାଭ କରିଛି।
ଶେଷରେ, ଉପସ୍ଥିତ ସମସ୍ତ ବ୍ୟକ୍ତିବିଶେଷ ସମସ୍ତଙ୍କର ପ୍ରିୟ ସ୍ୱର୍ଗତ ଡ. ସୁପ୍ରିୟୋ ଚାଟ୍ଟାର୍ଜୀଙ୍କ ଅମର ଆତ୍ମାର ସଦଗତି କାମନା କରିବା ସହ ଈଶ୍ୱରଙ୍କ ନିକଟରେ ନୀରବ ପ୍ରାର୍ଥନା କରିଥିଲେ।